ئەمە بڵاوبكەوە
FaceBook  Twitter  

 

زۆرن ئەوانەی لە مێژوودا ئیرەیمم پێ بردوون و خۆزگەی ئەوەم خواستوە كە من ئەوان بوومایە، خۆزگەم خواستوە گابریل گارسیا ماركیز بوومایەو تاكو رۆمانی سەد ساڵ تەنیایی من بمنووسیبا – خۆزگە ئەحمەد كایە دەبووم تاكو بەدەنگی هەزار تام گۆرانیم بۆ ژیان بگوتبایەو بەگژ فاشیەكاندا بچوبامەیەوە، خۆزگە من حەسەن زیرەك بوومایە پڕ بەدۆڵ و دەشت و زەندۆڵ و گوندو شار بەشاری بمچریكاندباو هەواڵی (كیژان دەچنە مێرگۆڵان)م بە شوان و كوڕە عاشقەكان بگەیاندبا، خۆزگە من (د. عیزەدین مستەفا رەسول دەبووم و وەكو ئەو لەسەر عەرشی شانشین و زمان دادەنیشتم و بەدەست و پەنجەی وشە كەپری ئەدەبم دروست دەكردو كاریتەم داویشتێ‌ لەداری سۆر گورێ‌ و دیوارم دەكرد لە سۆتكەو قەنەفرێ‌، دەمڕشاند بە گوڵاوێ‌، خۆزگە د. عیزەدین دەبووم و ئاخر ئەوكات بۆ ماوە شەست ساڵ هەڵكۆڵێنم لەناو زمانی شیرینی كورد دەكرد.

دەیان بەڵگەنامەی بزرو دزراوەو شاراوەی تایبەت بە شاعیران و ئەدەبیات و مرۆڤە مەزنەكانی نەتەوەكەم دەدۆزیەوەو لەسەر رەفە تۆز لەسەر نیشتوەكان و لە نێو ژوورە تاریكەكان دەرم دەهێناو دەمخستەبەر دیدەی خوێندنەوەو كتێبخانەكانم پێ‌ ئاوەدان دەكردەوە، بەراستی د.عیزەدین مستەفا رەسول مرۆڤێكی مەزن بوو داهێنەر بوو- بەشێكی گەورەی جوانی و ئاوەدانی كتێبخانەو ماڵی رۆشنبیری و ئەدەبی كوردی شانازیەكەی دەگەڕێتەوە بۆ "د.عیزەدین مستەفا رەسول" ئەو مرۆڤە بەرزو زانایە رۆڵێكی گەورەی هەبوو لە دامەزراندنی یەكێتی نوسەرانی كورد، ئەو یەكێتیەی هەر لەگەڵ دامەزراندنی بووە سەنگەرێكی بەهێزی بوژاندنەوەو بەگری كردن لە زمان و ئەدەبی كوردی و هەر خۆیشی لە كۆنگرەی راپەریندا، بووە سەرۆكی ئەو یەكێتیە، بەراستی كارو بەرهەم و شاكارو خزمەتە گەورەكانی ئەو مرۆڤە لە هەژمار نایەت ، جگە لەمەش كە د. عیزەدین مستەفا رەسول بەدرێژایی دەیان ساڵ بەوێنەی فەرهادێك لەسەر تەوێلی بێستوونی ئەدەب و زمان نەخشەو نیگاری كرد، هەروەها كوڕی (مەلا مستەفا سەفوەت) یشە كەئەویش مرۆڤێًكی مەزن بوو خۆشەویستی بۆ نەتەوەكەی وای كردبوو كە مزگەوت و ماڵی ئاینی و خانەدانی خۆی كردبووە چراخانی زەمان و جوانی و تازەگەری، د. عیزەدین برای كاك (فاروقی مەلا مستەفایە) كە بەهەق مرۆڤێكی مەزنە، ئەگەرچی ئەو یەكێكە لەسەرمایەدارە گەورەكانی كوردستان، بەڵام هەبوونی و سەرمایەداری وای نەكرد كە مرۆڤ بوونی خۆی لە بیربچێتەوە، نەك هەر ئەمە بەڵكو لە رۆژگاری ئەمڕۆدا فاروقی مەلا مستەفا بەمانای وشە بۆتە سایەو سێبەرێكی مەزن بەسەر سەری هەمووانەوە.

تۆش ماڵئاوا د. عیزەدین مستەفا رەسول، كە لە پایزی 2019 كۆچی دوایت كردو بەمەش نیشتمانێكت خستە ناو كۆشی پایز، تۆ نەمری دڵنیابە تاماوین ئیشمان بە تۆ دەبێت و مردن بە تۆ ناوێرێت.

  • 1