سەلام عومەر
رۆژانی پایز وەرین و
زستانیش پەنجەكانی بەستم
كەچی كانیاوی بەهارێك
نەڕژایە نێو هەردوو مستم
* * *
هەفتەكان بوونە شەماڵ و
رۆژەكانیش وەك رەشەبا
وەلێ بۆنی گوڵێ نایا
هەستی برسیم بۆ خۆی ببا
* * *
چركەكانیشم بروسكەن
هێدی هێدی دەمسوتێنن
هەناسەكانم دەبەن و
ژیانی ماندووم لێدەستێنن
* * *
ئێستا وەك درەختێكی تینوو
گەڵاكانم زەرد دەنوێنن
لقەكانم رامدەژێنن و
جەستەو ئاگایم دەنوێنن.