جەژن لە ئایینەكاندا، هێمای لێبوردەیی، ئاشتەوایی، سۆزو توندوتۆڵكردنی پەیوەندی و بڕواداریی بە خودا و پەرچووەكانیەتی. ئەم بۆنەیە، وەك بۆنەی هەڵدانەوەی لاپەڕەیەكی سپی و گەردەن ئازادی و جەختكردنەوە لە بە جێگەیاندنی ئەركە ئاینییەكان دەبینرێت، بەڵام بەداخەوە لای بەشێكی هەرە زۆری موسڵمانان، جەژن بە تایبەتیش جەژنی قوربان، بۆنەیەكە بۆ قوربانیدان بە مرۆڤ و بە قوربانیكردنی، ئەمیش لە ڕێگەی ئەو هەموو گرانی و شێواویەی بازاڕ و بەرزكردنەوەی نرخی شتومەك و كاڵاكان، وەك ئەوەی لە جەژنی ڕەمەزان و هاتنی مانگی ڕەمەزانیش دەبینرێت ! ئەم بۆنەیە، دەكرێتە بیانووێك بۆ گرانكردنی نرخی كاڵا و كەل و پەل و پێداویستییەكانی دیكەو بەداخەوە لە غیابی چاودێری بازاڕ و دەزگاكانی حكومەتیش دا، بەشێكی فرۆشیاران بە قەمەی گەورە، نەك سەر، بگرە شان و قۆڵی خەڵكیش دەبڕن. لەوەتەی وەك موسڵمانێك فامم كردووە، هیچ جەژنێكم نەبینیوە، كاڵا و كەل و پەل، بە هەرزانی و بە هەمان نرخی بەر لەو بۆنەیە بفرۆشرێت! ئەمە لە كاتێكدا، ئێمە بە كۆمەڵ هەر كە بانگی دا، بەرە و مزگەوت ڕادەكەین و بۆمان بلوێ، ساڵانە سەد عەمرە دەكەین و كاتێ ناویشمان بۆ حەج دەردەچێت، لە خۆشیان دەگریێین. بەڕاست ئەم خەسڵەتە هاودژانە، كە لە سایكۆلۆژیای زۆربەی هەرە زۆری تاكەكانی كۆمەڵگەی ئێمە هەیە، لەگەڵ ئایینداری ڕاستەقینە و خودایی یەكدەگرێتەوە؟ سەلمان مۆمیكا، قورئانی موسڵمانانی سووتاند، كاتێ لە سوێد چووە ماركێتێك كە خاوەنەكەی مەسیحی بوو، ویستی ببسییەك بكڕێت، خاوەنی ماركێتەكە پێی نەدا، سەلمان پێی گوت، مەگەر تۆ مەسیحی نیت؟ ئەویش گوتی با، بەڵام تۆ كتێبی خودات سووتاندووە، نەك هی موسڵمانان ! بۆیە هەرچییەكی كرد، خاوەنی ماركێتەكە هیچی پێ نەدا. ساڵانێكی زۆرو درێژە، گەیشتوومەتە ئەو باوەڕەی ئایینداری لە نێو ئێمەدا و لای زۆرینەی خەڵكی، تەنها ڕووكەشییە و پەیوەندی بە كۆكردنەوەی توێشوو بۆ دوا ڕۆژ نییە. كە لە نوێژی بە كۆمەڵ هاتنەدەر، هەر لە نێو دەرگای مزگەوت دەست بە غەیبەتی هاوئایینەكەیان دەكەن. دەچنە عەمرە، بەڵام باربۆی منداڵێكی هەتیو و هەژار ناكەن. كەمپین ڕێكدەخەن و بە ناوی كۆمەكی هەژارانەوە پارە كۆدەكەنەوە، بەڵام مەگەر هەرخوا خۆی بزانێت چەند تیایدا پاكن. حەج دەكەن بەڵام گرانفرۆشن، بۆ حەزرەتی ئیسماعیل كە نەكرا قوربانیش دەگریێن، بەڵام هاوزمان و هاوئایینەكەیان دەكەنە قوربانی و نرخ بەرزدەكەنەوە و هیچ سۆزو بەزەیەكیان بە خەڵكی دانایەتەوە. ئێمە لە جەژنی قوربان، دەكرێینە قوربانی، بە داخەوە ئەمەش لە نەبوونی یاسا و ویژدان و چاودێری بازاڕو بەدواداچوونی حكومەت و لە هەمووشی پێویستتر، تێڕوانینی مرۆیانەیە بۆ مرۆڤ !دواجار دەمەوێ ئەوە بڵێم، كە شەڕی ئەمەریكاو ئێرانیش نەبووە، ئەم گرانییە لە جەژنی موسڵمانان هەر هەبوو، كەواتا كەس شەڕەكە نەكاتە پاساو.
