لەڕوانگەی چینایەتیەوە
عوسمان زیندانی
ماوەیەكە دەسەڵاتی هەرێم بەشێوازی جۆرا وجۆر و بەبەرنامە و پاڵپشتی سەرۆكایەتی حكومەت و میدیا فەرمی و سێبەرەكانیان بانگەشە بۆ كار و چالاكی و دەستكەوتەكانی حكومەتی هەرێم بەتایبەت كابینەی نۆیەم دەكات ٠
دیارە هەر دەسەڵات وحكومەتێك مافی خۆیەتی كە ئەوەی هەیەتی و نیەتی بیخاتە ڕوو و بانگشەی بۆ بكات
بەڵام دەبێت لەسەر بنەمای ڕاستی و دەلیل وبەڵگە بێت٠
لەهەمان كاتدا جەماوەر و هێز ولایەنی ئۆپۆزسیۆنیش مافی خۆیەتی و ئەركیەتی كە خاڵە لاواز و كەموكورتیەكانی حكومەت بخاتە ڕوو و ڕەخنەگرانە بڕوانێتە كار وبەرنامەكانی وهەڵسەنگاندن بكات بۆهەڵوێستەكانی ، بەرژەوەندی گشتی و یاسا ومافی مرۆڤ بكاتە بنەمای تێڕوانینەكانی بەتایبەت مافی چینی كرێكار و توێژە پەراوێز خراوەكان ٠
خاڵی یەكەم:
لەماوەی چوار ساڵی كابینەی نۆدا بۆ یەكجاریش بودجە پێشكەشی پەرلەمان نەكراوە كە ئەم خاڵە ئەركێكی سەرەكی حكومەتە٠
خاڵی دووەم:
لەكابینەی نۆدا دواكەوتنی مووچە بەردەوامە و ئێستا (١٦-٧-٢٠٢٣)هێشتا مووچەی مانگی شەش دابەش نەكراوە ئەو بەڵێنەی دایان بەمووچە خۆران و خانەنشینان لەكاتی هەڵبژاردن كەپاشكەوت دەگەڕێنینەوە جێبەجێ نەكراوە حكومەت بەدەیان مووچە قەرزارە٠
خاڵی سێیەم:
ڕاگرتن و ڕاوەستانی پلە بەرزكردنەوەی فەرمانبەران و دەرماڵەكان بەردەوامە كەبێ هیچ بنەمایەكی یاسایی ئەم
كارە كراوە٠
خاڵی چوارەم:
هیچ دامەزراندن وهەلی كارێك بۆ دەرچووانی زانكۆ وپەیمانگاكان لەبەرنامەدا نیە تەنها بەشێوەی نهێنی ودیاركراو بۆ كەسانی سەر بەدەسەڵات وبنەماڵەی حوكمڕان نەبێت كەمافی كاركردن یەكێكە لەبنەماكانی یاسای كار و مافی مرۆڤ٠
خاڵی پێنچەم :
بەدەیان كۆمپانیاو وەبەرهێنەر پرۆژەكانیان وەستاوە لەبەرئەوەی حكومەت سلفەی تەواوەتی وپێوویستی نەداوە پێیان بەم هۆیەشەوە بەسەدان كرێكار بێكار بووە٠
خاڵی شەشەم:
زیاد كردنی باج وڕسومات لەسەر هاوڵاتی وكاسبكاران بەردەوامە و ڕۆژ لەدوای ڕۆژ بەرەو بەرزتری دەبەن كەدواجار خەڵكی كڕیاری هەژار لێی زەرەرمەند دەبێت٠
خاڵی حەوتەم :
جاران ساڵانە دوو بەرمیل نەوت دابەش دەكرا بەسەر هاوڵاتیاندا بەڵام زۆربەی هاوڵاتیان بئ بەشن لەم مافە سەرەتاییەی مرۆڤ٠
خاڵی هەشتەم:
بەرز بوونەوەی نرخی نان وسوتەمەنی خۆراك و زۆربەی پێداوویستیە ڕۆژانەیەكانی جەماوەر یەكێكە لە سیماكانی كابینەی نۆ٠
خاڵی نۆیەم:
كەیەكسانە لەگەل ژمارەی كابینەكانی حكومەت
بەردەوام بوونی حكومەتە لە هەڕاجكردنی كەرتی تەندروستی وخوێندن وئاو و كارەبا و گەشتوگوزار لەڕێگەی فەرامۆشكردن و فرۆشتنی ئەم بورارە ژیارییانەی ناو كۆمەڵ و ئێستا بەهەزاران كەس توانای خەرجی نەشتەرگەری و كڕینی دەرمانین نیە٠
ئەگەر خاڵ ببژێرین لە نۆ خاڵەوە دەچین بۆ نۆسەد خاڵ ئەوە باسی چارە نوسی سنوری هەرێمی كوردستان وكێشەكانی پێشمەرگەو ماددەی ١٤٠ و پرسی نەوت وغاز لەگەڵ عێراق هەر مەكەن وهەر وەكو خۆیەتی ٠
كوشتنی ژنان وەكوجاران بەردەوامەوڕۆژانە پێشێلكاری زەق ومەترسیدار ئەنجام دەدرێت دژی ئافرەتان وئامارەكانی ڕێكخراوەكان ژنان وبەڕێوبەرایەتی بەرەنگاربوونەوەی توندوتیژی خێزانی سەلمێنەری ڕاستی قسەكانمان٠
بێكاری لەناو كرێكاراندا بەردەوامە و ڕۆژانە ڕوداوی مەترسیدار ڕوودەدات لەناوەندەكانی كاردا وبەپێی ئاماری سەندیكای كرێكارانی بیناسازی لەماوەی چوار ساڵدا زیاد لە سەد كرێكار گیانی لەدەستداوە وبەسەدانی تریش بریندار بوون ٠
گرتن و ێشێلكاری بەرامبەر بەڕۆژنامە نوسان بەردەوامە و ئامارەكانی سەنتەری میترۆ و یەكێتی ڕۆژنامەنوسان بەسەدان پێشێلكاری كراوەو ، ئەوان شاهیدی گرتن ولێدان و سوكایەتی و ڕێگریكردنە لە ڕووماڵ وكاری ڕاگەیاندنكاران ٠
پرۆسەی سیاسی بەدۆخێكی پڕ لەتوند وتیژ وململانێ نایاسایی و زیندوكردنەوەی كۆنەپەرستی دەڕوات و هەڵبژاردن لەكاتی خۆیدا ئەنجام نەدراو تەمەنی پەرلەمان بەنایاسای درێژ كرایەوە دواجار دادگای اتحادی بڕیارەكەی هەڵوەشاندەوە ئێستا هەرێم لەبۆشایی یاسایدا ژیانی سیاسی وحوكمڕانی دەكات٠
دەستێوەردانی هەرێمایەتی و كوشتنی تێكۆشەرانی سیاسی وەپەنابەرانی باكور و ڕۆژئاواو ڕۆژهەڵات بەردەوامە و لەشكركێشی و بۆمباران كردن بەردەوامە ، شتێك نەماوە بەناوی سەروەری هەرێمەوە دڵڕازیكردنی دەوڵەتانی ناوچەكە جێگای سیاسەتی نیشتمانی گرتۆتەوە٠
ژیانی كۆمەڵایەتی جەماوەر بەرەو ئاراسەیەكی كۆمەڵایەتی زۆر خراپ دەڕوات و ڕۆژانەكوشتن وهەڵوكوتانە سەر بنەماڵە و یەكتر كوشتن جێگای پێكەوە ژیانی گرتۆتەوە و بەردەوامیش هەندێك ناوەندی ئایینی و بانگخواز سوكایەتی بەژنان وچالاكوانان دەكەن و دەسەڵاتیش بێدەنگ وسەنگ لەسەر كورسی حوكمڕانی دانیشتوە٠
هەموو ئەم هەلومەرجە سیاسی وئابووری و كۆمەڵایەتیەی فەرهەنگیە خراپ و دواكەوتو پڕ لە پێشێلكاریە دەرئەنجامی سیاسەت بەرنامەكانی كابینەی نۆ و پاشماوەی كابینەكانی تری حكومەتی هەرێمە ڕاستر بڵێین دەسەڵاتی یەكێتی وپارتیە كەسەرچاوەی لەبیروباوەڕی بۆرژوازیانەوە گرتوە و گرنگ كۆكردنەوەی سامان و داهاتە لەسە حسابی خەڵكی هەژار و زەحمەتكێش كە ئەمە هەمیشە سیفەت و ئاكاری سیستەم حوكمڕانە سەرمایەدارەكان بوون٠
دواجار ئەگەر ئەم كابینەیە ڕاست دەكات كەخزمەتی بەرچاوی كردوە با وەڵامی ئەم. ئامارانە بداتەوە٠
