شیعری : شل سیلور ئەستاین
وەرگێڕانی : خدر ئیبراهیم خدر
سێ ساڵان بووم باوکم ماڵی بەجێهێشت
هیچ شتێکی بۆ من و دایکم بەجێنەهێشت
بێجگە لە گیتارێک و شووشەیەکی بەتاڵ !
لەوەی ڕۆیشت و چیتر نەمانبینیەوە
گازاندەی لێ ناکەم
بەڵام خراپترین کاری وی، بەر لە ڕۆیشتنی ئەوە بوو
منی ناونا ( سۆ ) !
ئەگەرچی بەتەواوی دەیزانی ناوێکی کۆمیدی و گاڵتەئامێزە ...
*
چەندە قسەگەلێکی گاڵتەئامیز، سەبارەت بەوە
لە پشت سەری بنیادەمەوە دەوترێن ...
ئیتر دەبێت لە تەواوی تەمەنمدا،
لەم دۆخەدا ... گیرۆدەبم !
زۆر لە کچان لە ژێر لێوەوە پێمپێدەکەنین و ،
وایاندەکرد
ئارەقەی شەرم لە نێوچەوانمدا کۆببێتەوە ...
زۆر لە کوڕانیش دەیانکردمە جێگەی گەمە و
بەتەواوی سەریان گەرم دەکردم ...
بڕوانن ،
بۆ کوڕێک کە ناوی ( سۆ ) ی لێنرابێت
ژیان هێندە ئاسان نییە !
هەڵبەت، من زۆر زوو گەورەبووم و خارام !
مشتەکانم پتەوبوون و، ژیری و زیرەکیشم بەرەو زیاتر چوو
ئێستا ... لە شارێکەوە ڕوو لە شارێکی تر دەکەم
تاکو شەرمەزاریم بشارمەوە
بەڵام پەیمانم لە تەک مانگ و ئەستێرەکاندا بەستووە
هەموو شوێنێکی چەپەڵ بخەمە ژێر پێیەکانمەوە ...
ئەو پیاوەش کە ئەم ناوە سەمەرەیەی لە من نا ،
لە نێو ببەم !
*
لە نێو دڵی هاویندا ، کاتێک بەوپەڕی دژوارییەوە
گەیشتمە ( گاتیلنیرگ )، قورگم وشک و برینگ ببوو ...
بیرمکردەوە، لە شوێنێک ئۆقرەبگرم و شتێک بخۆم
لە ریستۆرانێکی کۆنی سەر شەقامێکی پۆخڵدا
لە پشتی مێزێکەوە پاڵی دابۆوە و
گەمەی بە قۆپچەی قۆڵی کراسەکەی دەکرد،
هەمان ئەو بوونەوەرە نەخوازراوەی ناوی ( سۆ ) ی لە من نابوو !
دیارە ئەوە، باوکە ئازیزەکەی منە ...
لە ڕێی ئەو وێنە شێواوەی کە لە لای دایکم مابۆوە،
بەوەم زانی !
لە ڕێی ئەو چاوە تەڵەکەباز و
ئەو برینەش کە بەسەر ڕوومەتییەوە بوو ، ناسیمەوە !
قەمبوور و پیر و ڕەنگ پەڕیو بوو ...
لێمڕوانی، ترسێک دایگرتم !
پێموت :
" من سۆم ! چۆنیت ! هەر ئێستا لەناوت دەبەم ! "
بە توندی دام لە ناوچەوانی و ... کەوت .
بەڵام بەسەرسامییەوە هەڵسایەوە و ،
بە چەقۆیەک پارچەیەک لە گوێچکەی بڕیم !
کورسییەکم تاودایە و حەواڵەی دەم و لووتیم کرد
تێکچڕژاین و، لە ناوەندی شەقامەکەدا
لە نێو خاک وخۆڵ و، خوێن و، زبڵ و زاڵدا،
بە لەقە و چەقۆ لێکماندا ...
*
بڕوانن !
قەت بووە لە تەک پیاوانی بەهێزتر لە خۆمدا
بکەومە شەڕ ؟
نایەتەوە یادم، کەی بووە ...
وەک گیاندارێک لەقەی داویشت و، وەک تیمساحێکیش
گازی دەگرت،
پێدەکەنی و جنێوی دەدا ...
لەوەدابوو دەستی بۆ دەمانچەکەی ببات
کە .... من زووتر لە ئەو، دەستبەکاربووم .
ڕاوەستابوو، لێیرووانیم و ... زەردەخەنەیەکی بۆ کردم !
پێیوتم :
" دونیا بەرز و نزمی هەیە،
ئەگەر کەسێک بیەوێت، دەرەقەتی بێت ... دەبێت بخارێت !
چونکە دەمزانی ناتوانم لە لات بمێنمەوە و
کۆمەکت پێبکەم
بۆیە، ناومنایت ( سۆ ) و ... ڕۆیشتم .
دەمزانی دەبووایە بخارێیت یاخود بمریت،
هەر ئەوەش، وایکرد بەهێزبیت ! "
پێیوتم :
" لە خۆتەوە،
لە ئاست مندا، هەڵدەشاخێیت
لەئاست مندا، نەفرەت دەکەیت
وەلێ حەقتە، لەناوم ببەیت ...
ئەگەر کارێکی واش بکەیت، هیچ گازاندەیەکم لێت نابێت .
بەڵام دەبێت پێش مردنم، سوپاسم بکەیت ...
سوپاس بۆ ئەوەی توانیومە کارێک بکەم
ئەو هەموو بوێری و جەسوورییە
لە چاوەکانتدا شەپۆل بدات ...
چونکە من هەمان ئەو کەسەم تۆم ناونا ( سۆ ) ! "
هەناسم گیرا و، دەمانچەکەم فڕێدا
هاوارم کرد :
" باوکە "
ئەویش پێیوتم :
" کوڕی خۆم ! "
*
دوواجار بیروڕای خۆم گۆڕی ...
ئەمێستاکە،
هەر کاتێک کارێک ڕایی دەکەم
هەر کاتێک لە کارێکمدا سەرکەوتوو دەبم
بیر دەکەمەوە ...
ئەگەر کوڕێکم هەبێت، گومان دەکەم
ناوی ( بێل ) یاخود ( جۆرج ) ی لێبنێم
چونکە هێشتا ئەو ناوەی خۆم بە نەفرەت دەکەم !
سەرچاوە :
ماهنامە ( تدبیر و زندگی )، شمارە ( ٤ )، اسفند – ١٣٨٣ .