قوبادی جەلیزادە
1
شەو خۆت لەبەفر گرت
سپی سپی دەچوویتەوە.
لێ؛
گۆی مەمەکانت دوو دەنکە گێلاسی پەمەیی بوون،
دوور بەدوور دەبریقانەوە.
2
شەو،
ڕووت بوویتەوەو پاڵکەوتی
بووی بە جۆگەلەیەک شیری مەڕ.
بەیانی پیاڵە دوای پاڵە
لەو شیرە شیرینەمان خواردەوە.
کە تژی بوو لە وورشەی
گیای ،
دەشتی کۆیە.
3
بەڕووتی چوویتە بەرباران
لەبەر پێتدا ڕووبارێکی پەمەیی خوڕەی هات و
بە بەردەمی هەموو ماڵێکی شاردا، تێپەڕی.
لێوارێکی پەپوولەی شینی لێ سەوز بوو
لێوارێک گوڵی مۆر.
4
لە چیلکەو پووش، ئاگرێکت کردەوە
هەموو جلکەکانت هەڵدایە ناو بڵێسەکەی.
خۆڵەمێشی جلکەکانت؛
بۆنی بەهەشتیان لێدەهات
5
لە ڕۆخی بەنداوە قشتیلەکەی حەمامۆک"،
وێنەیەکمان گرت.
تۆ پەیکەرێک بووی لە ئاوی باران
من پەیکەرێک لە پەلکەزێڕینە.