___ .١ ____
لەسەرجەم بواری ژینا
زانست و پەروەردەو ئەدەب
لەبار دەبەن
هەتا قەڵەمێك گوڵ دەركا
چەندین گوللە
سنوورەكان ئاو دیو دەكا
برسێتی بووەتە بەرگ و
لەبەر نووسین و
شاعیران دەكرێ
ئەمڕۆ سیاسەت بابەتە
بەرپرس و گەندەخۆرەكان
خاوەن دیوان و شانامەن
كوا شاعیرێك
بەزاری خۆی
دەتوانێت تێر بەكوڵ بگری
كوا كتێبێك
لەنێو تۆزی گوڵدانێكا
دەستێكی سۆز
روومەتی رووشاوی دەسڕێ
بەكوێدا دەڕۆی هەر باسی
قەیران و
گەندەڵی و
شان و بازووی كاكە میرە
خەڵكی لەرۆح و
كەناڵ و
خویندنەوەو
ژیانی خۆیشی زویرە
ساتەكانمان
جوینەوەی
سەدان ساڵی پێش ئێستایە
رۆشبیری و
شیعرو رۆمان
لای لاوانمان بێ مانایە
گرنگ گیرفانی رازاوەو
ماشینی ئاخر مۆدیلە
رۆحمان لەجەستەی مردوودا
پەست و دیلە
دەروازەكان
لەراستەوە
بۆچەپ و خواروو سەروومان
پەیكەرێكی درز بردووە
ویژدان
زمان
نیشتمانێكی برین و
دڵێكی پارە پارەیە
هەموو یاساو رێساكانمان
بۆ گەردنی نەدارەكان
كۆت و بەندو سێدارەیە