کارەکانی کۆڕبەندی نێودەوڵەتی دژی تیرۆر و ئیمپریالیزم لە مۆسکۆ دەستیپێکرد، کە تێیدا زیاتر لە ١٨٠ حزبی شیوعی و حکومەت لە سەد وڵاتەوە بەشدارن. لەسەر بانگهێشتی فەرمی حزبی شیوعی ڕووسیا، هیوا عومەر، جێگری سکرتێری کۆمیتەی ناوەندی حزبی شیوعی کوردستان لە کۆڕبەندەکەدا بەشدارە.
گینادی زیوگانۆف، سکرتێری حزبی شیوعی ڕووسیا، ڕایگەیاند کە کۆڕبەندەکە سەکۆیەکە بۆ هاوتەریبکردنی هەوڵە نێودەوڵەتییەکان لە دژی پێشێلکارییەکان. لە ڕۆژی دووەمدا، هیوا عومەر وتارێکی پێشکەش کرد و تێیدا قەیرانەکانی غەززە، ئۆکرانیا، سوودان، عێراق و سووریای وەک ڕەنگدانەوەی قەیرانی سیستمی ئیمپریالیستی و سەرمایەداری لەقەڵەمدا، کە تێیدا خەرجییە سەربازییەکان لە نێوان ٢٠١٦-٢٠٢٥ بە ڕێژەی ٤١٪ زیادیان کردووە.
هیوا عومەر تیشکی خستەسەر دۆزی کورد و ڕایگەیاند، کورد گەورەترین نەتەوەی بێ دەوڵەتە و بەهۆی ڕێککەوتنەکانی سایکس-پیکۆ و لۆزان خاکەکەی دابەشکراوە. ئەو ڕەخنەی لە واشنتۆن گرت کە کوردی وەک دراوی ئاڵوگۆڕ بەکارهێناوە. هەروەها ئاماژەی بەوەکرد کە دوای هاتنەسەرکاری ئەحمەد شەرع (جۆلانی) لە کۆتایی ٢٠٢٤ لە دیمەشق، هێرشەکان بۆ سەر ناوچە کوردییەکان زیادیان کردووە، بە جۆرێک لە ململانێی حەلەب لە نێوان تشرینی یەکەمی ٢٠٢٥ تا کانوونی دووەمی ٢٠٢٦، پتر لە ٤٦ هەزار کورد ئاوارە بوون.
لە کۆتاییدا، جێگری سکرتێری کۆمیتەی ناوەندی حزبی شیوعی کوردستان، جەختی لە پرەنسیپی لینین بۆ مافی بڕیاردانی چارەنووسی نەتەوەکان کردەوە و داوای لە هێزە چەپەکان کرد پشتگیری لە خەباتی کورد بکەن بۆ چەسپاندنی ئاشتی لە ڕۆژهەڵاتی ناوەڕاست.
ئەم کۆڕبەندە سێ ڕۆژە (٢٤-٢٦ی ئایاری ٢٠٢٦) بەردەوام دەبێت و بە دەرکردنی ڕاگەیەندراوی مۆسکۆ کۆتایی دێت.
