ئەمرۆ سێشەممە، 16/6/2026لە شاری هەولێر كۆڕیادی چل ڕۆژەی كۆچی دوایی ڕۆشنبیر و تێكۆشەری گەلەكەمان د.سامیە شاكر ناسراو بە مەشخەڵ ، ڕێكخرا.
لەم كۆڕیادەدا، سكرتێری كۆمیتەی ناوەندی حزبی شیوعی كوردستان و بەرپرسانی حكومی و حزبی و نوێنەری هەرسێ حزبی شیوعی ئوردن و عێراق و لوبنان و سەدان كەس لە كەس و كارو مامۆستایان و تێكۆشەران و خانەوادەی کۆچکردو ئامادەبوون .
لە كۆریادەكەدا کە هاوڕێ سەلام عومەر سەرکەوتوانە بەڕێوەی برد، وتاری حزبی شیوعی كوردستان و مامۆستایانی پیشەیی و مەڵبەندی هەولێر و یەكێتی نوسەرانی كورد و تایبەتمەندی کۆمەڵەی ئافرەتان و نامەی دكتۆرە كوردستان موكریانی و خانەوادەكەی پێشکەش کران، دواتر هاورێ بەختیار شەعبی و مامۆستا مغدید حاجی و دكتۆر جمشید حیدەری و دکتۆر محەمەد خدر مەولود و شكورییە رسوڵ قسەیان لەسەر رۆڵی بوێرانە و رچەشکێنی کەلتورەکانی دکتۆرە سامیە کرد، لە دواهەمین بڕگە ئەم کۆڕیادەدا بەڕێز نیهاد قۆجە وتەی بنەماڵەی خوێندەوە و دواتر رۆژنامەی رێگای کوردستان و شیرینی بەسەر ئامادەبواندا دابەشکرا.
(د. سامیە شاكر - مەشخەڵ)، پەروەردەكار، شاعیر و تێكۆشەری شیوعی ئازادیخواز.
لە رێكەوتی ٦ ئایاری ۲۰۲٦لە دەرەوەی وڵات كۆچی دوایی كرد و دواتر گەڕێنرایەوە نیشتمان و لە باوەشی هەولێر بەخاک سپێردرا.
كۆریادەكە لە لایەن مەڵبەندی هەولێری حزبی شیوعی كوردستان و ڕێكخراوی پیشەیی مامۆستایان و مەكتەبی راگەیاندنی ناوەندی حزبی شیوعی كوردستان رێكخرابوو .
