هیوا عومەر: كەیسی سەردەشت و هاوڕێكانی پرسیاری گەورەی لەسەر سیستەمی سیاسی دروستكردووە
ڕۆژی سێشەممە لە مەراسیمێكی تایبەتدا لە شاری هەولێر، بە بەشداری ڕۆژنامەنووسان، چالاكوانان و كەسایەتییە سیاسییەكان، یادی ١٦ ساڵەی تیرۆركردنی ڕۆژنامەنووس "سەردەشت عوسمان" لەسەر مەزارەكەی لە گوندی گردعازەبان بەڕێوەچوو.
لە مەراسیمەكەدا، هیوا عومەر، جێگری سكرتێری كۆمیتەی ناوەندی حزبی شیوعی كوردستان، بۆ دەزگاكانی ڕایگەیاند گوتی: "كەیسی سەردەشت و كاوە گەرمیانی و تەواوی تیرۆركراوانی تری ڕێگای ئازادی، پرسیارێكی گەورەیان لەسەر سیستەمی سیاسی و شێوازی حوكمڕانی لە هەرێمی كوردستان دروستكردووە."
ناوبراو ئاماژەی بەوەش كرد كە كۆمەڵگەی كوردی زۆر لەوە هۆشیارترە كە بە "دەستی تیرۆر" بێدەنگ بكرێت. وتیشی: "لەم یادەدا دووپاتی دەكەینەوە كە دەبێت بكوژانی سەردەشت و ئەوانی تریش ڕووبەڕووی دادگا بكرێن و سزا بدرێن."
لە بەشێكی تری قسەكانیدا، جێگری سكرتێری كۆمیتەی ناوەندی حزبی شیوعی تیشكی خستە سەر دۆخی ئازادییەكان و ڕایگەیاند: "لە كاتێكدا ئەم یادە دەكەینەوە، ڕۆژنامەنووس شێروان شێروانی لە زینداندا مانی لە خواردن گرتووە، بۆیە داوا دەكەین بە زووترین كات ئازاد بكرێت."
سەردەشت عوسمان، ڕۆژنامەنووس و خوێندكاری زانكۆ، لە ساڵی ٢٠١٠ لە بەردەم كۆلێژەكەی لە هەولێر ڕفێندرا و دوای چەند ڕۆژێك تەرمەكەی لە شاری موسڵ دۆزرایەوە، كە تا ئێستاش كەیسەكەی وەك یەكێك لە دۆسیە هەرە جێ مشتومڕەكانی بواری ئازادیی ڕۆژنامەگەری لە هەرێمی كوردستان ماوەتەوە.
