ئەمڕۆ، ٧ی نیسانی ٢٠٢٦، لە ناحیەی زینانەی سنووری گەرمیان، بە ئامادەبوونی کەسوکاری قوربانییان، بەرپرسانی حکومی و حیزبی و جەماوەرێکی زۆری ناوچەکە، مەراسیمێکی شایستە بۆ یادی ٣٨ ساڵەی دەستپێکردنی شاڵاوە بەدناوەکانی ئەنفال بەڕێوەچوو.
مەراسیمەکە بە ساتێک وەستان بۆ ڕێزگرتن لە گیانی پاکی شەهیدان دەستیپێکرد و تێیدا چەندین وتار پێشکەش کران. لە وتارەکاندا تیشک خرایە سەر قەبارەی ئەو تاوانە گەورەیەی کە ڕژێمی پێشوو بەرامبەر گەلی کورد و بەتایبەت خەڵکی ناوچەی گەرمیان ئەنجامی دابوو.
لە بەشێکی تری مەراسیمەکەدا، شاندێکی باڵای مەڵبەندی گەرمیان و ڕێکخستنەکانی کفری و ڕزگاری بە سەرپەرشتی هاوڕێ پێشڕەو بەرپرسی مەڵبەندی گەرمیانی حزبی شیوعیی کوردستان بەشداری ئەو مەراسیمەیان کرد و وەک وەفایەک بۆ ڕێزلێنان لە گیانی پاکی قوربانیانی شاڵاوەکانی پرۆسەی ئەنفال تاجەگوڵینەی مەڵبەندیان لە سەر مۆنۆمێنتی شەهیدان لە ناحیەی زینانە دانا.
