میدیاکانی ئەمریکا ئاشکرای دەکەن کە ستیڤ ویتکۆف، نێردەی تایبەتی دۆناڵد ترەمپ بۆ دەستپێکردنی قۆناغی یەکەمی دانوستانە ئەتۆمییەکان لەگەڵ ئێران ڕوودەکاتە سویسرا، هاوکات تاران ڕایدەگەیەنێت کە بۆ کۆبوونەوەکە "پەلە ناکات".
ماڵپەڕی ئاکسیۆس-ی ئەمریکی لە زاری بەرپرسێکی باڵای وڵاتەکەیەوە بڵاویکردەوە، ستیڤ ویتکۆف، نێردەی تایبەتی دۆناڵد ترەمپ، سەرۆکی ئەمریکا بەرەو سویسرا بەڕێکەوتووە بەمەبەستی بەشداریکردن لە قۆناغی یەکەمی دانوستانەکان لەگەڵ لایەنی ئێرانی سەبارەت بە ڕێککەوتنی ئەتۆمی ئەگەری.
ئامادەکارییەکانی واشنتن بۆ ئەم هەنگاوە لە کاتێکدایە کە جارێد کوشنەر، زاوای ترەمپ، لە ئێستاوە لە سویسرایە بۆ ڕەخساندنی زەمینەی گفتوگۆکان.
ئەم جموجۆڵانە هاوکاتن لەگەڵ واژۆکردنی دیجیتاڵی و ئەلیکترۆنیی یاداشتنامەی لێکتێگەیشتنی نێوان واشنتن و تاران لە ١٨ی حوزەیراندا.
لەلایەکی دیکەوە، وەزارەتی دەرەوەی ئێران ساردوسڕی لە کاتی بەڕێوەچوونی کۆبوونەوەکە نیشان دەدات. ئیسماعیل بەقایی، وتەبێژی وەزارەتی دەرەوەی ئێران ڕایگەیاند:
"تاران پەلە ناکات لە ئەنجامدانی ئەو کۆبونەوەیە دوای واژۆکردنی ئەلیکترۆنیی یاداشتنامەی لێکتێگەیشتن، بەڵام ڕێکخستنەکان بۆ ئەنجامدانی دانوستان لە ڕۆژانی داهاتوودا بەردەوامن."
بەقایی جەختیشی کردەوە کە سەرکەوتنی دانوستانەکان و گەیشتن بە ڕێککەوتنی کۆتایی، بەندە بە جێبەجێکردنی بڕگە تایبەتەکانی ناو یاداشتنامەی لێکتێگەیشتنەکە و بەردەوامیی پابەندبوونی لایەنەکان پێیانەوە.
پاشخان و ناوەڕۆکی دانوستانەکان
ئەم خولەی دانوستانەکان کە بڕیاربوو ڕۆژی هەینی لە سویسرا دەستپێبکات، بۆ کاتێکی دیکە دواخراوە. ئامانجی سەرەکیی ئەم پرۆسەیە گەیشتنە بە ڕێککەوتنێکی کۆتایی لە ماوەی ٦٠ ڕۆژدا.
تەوەرە سەرەکییەکانی ڕێککەوتنە ئەگەرییەکە:
چارەنووسی بەرنامەی ئەتۆمیی ئێران.
پرسی سزا ئابوورییەکانی سەر تاران و داراییە بلۆککراوەکانی ئێران.
پێشکەشکردنی گەرەنتی بۆ کەمکردنەوەی ئاڵۆزییە ناوچەیییەکان.
ئەم پێشهاتە دیپلۆماسییە نوێیە دوای ڕێککەوتنێکی چوارچێوەیی دێت کە کۆتایی بە گرژییە سەربازییەکان هێنا. لەگەڵ ئەوەشدا، چاودێران پێیان وایە دۆسیەکانی وەک لوبنان، ئاسایشی گەرووی هورمز و گەرەنتییە ئەتۆمییەکان وەک تاقیکردنەوەی ڕاستەقینە بۆ جددییەتی هەردوو لایەنی ئەمریکی و ئێرانی دەمێننەوە.
