سەرۆكی سوریا لە دیدارێكدا رایگەیاند: مافەكانی كورد لە سوریا ئەم وڵاتە بەهێزتر دەكات و جەژنی نەورۆزیش جەژنێكی نیشتمانیە.
لە پێشهاتێکی نوێدا لە کۆشکی شەعب لە دیمەشق، ئەحمەد شەڕع، سەرۆکی کاتی سوریا، پێشوازی لە وەفدێکی نوێنەری پێکهاتەی کورد کرد. ئەم دیدارە کە بە بۆنەی هەردوو جەژنی رەمەزان و نەورۆزەوە ڕێکخرابوو، بە ئامادەبوونی پارێزگارەکانی حەلەب، ڕەققە، حەسەکە و نێردەی تایبەتی سەرۆکایەتی بۆ چاودێری ڕێککەوتنی ٢٩ی کانوونی دووەم لەگەڵ هێزەکانی سوریای دیموکرات (هەسەدە) بەڕێوەچوو، کە ئامانج لێی پتەوکردنی پەیوەندییە ناوخۆییەکان بوو.
لە میانی کۆبوونەوەکەدا، ئەحمەد شەڕع جەختی لەوە کردەوە کە جەژنی نەورۆز وەک جەژنێکی نیشتمانی ناسراوە و ڕەنگدانەوەی تایبەتمەندییە کلتورییەکانی پێکهاتەی کوردە لەناو چوارچێوەی گەلی یەکگرتووی سوریادا.
ئاماژەی بەوە کرد کە مافەکانی کورد مافێکی سروشتییە و فرەچەشنی کلتوری لە وڵاتدا نەک هەر کێشە نییە، بەڵکو سەرچاوەی سەرەکی هێزی سوریایە، هەروەک پشتیوانی تەواوی خۆی بۆ پڕۆژەکانی گەشەپێدان لە ناوچەکانی ڕۆژهەڵاتی وڵات دووپاتکردەوە.
لای خۆیانەوە، ئەندامانی وەفدە میوانەکە دەستخۆشییان لە دەرچوونی مەرسومی ژمارە ١٣ی ساڵی ٢٠٢٦ کرد کە تایبەتە بە زامنکردنی مافەکانی کورد لە سوریا و بە هەنگاوێکی مێژووییان وەسف کرد. لە کۆتایی دیدارەکەدا، هەردوولا هاوڕابوون لەسەر گرنگی پاراستنی یەکڕیزی نیشتمانی و بەهێزکردنی بەشداری سیاسی، لەگەڵ جەختکردنەوە لەسەر ئەو بنەمایەی کە پێویستە چەک تەنیا لە دەستی دەوڵەتدا بێت بۆ پاراستنی سەقامگیری گشتی.
