رێگای كوردستان
لە درێژەی هەوڵە ئەمنییە هاوبەشەکاندا بۆ ڕاوەدونانی پاشماوەکانی تیرۆر و پاراستنی سەقامگیری، دەزگای ئاسایشی هەرێم بە هەماهەنگی لەگەڵ دەزگای ئاسایشی نیشتمانیی عێراق، دو تیرۆریستی داعشیان لە سلێمانی دەستگیرکرد و ڕادەستی لایەنە پەیوەندیدارەکانی حکومەتی فیدراڵ کرانەوە.
وردەکارییەکانی ئۆپراسیۆنەکە
- ئاراستە و هەماهەنگی: ئۆپراسیۆنەکە بە پشتبەستن بە زانیاریی وردی هەواڵگریی بەڕێوەبەرایەتیی گشتیی ئۆپراسیۆنەکانی ئاسایشی هەرێم بە هەماهەنگی لەگەڵ ئاسایشی نیشتمانیی عێراق ئەنجامدرا.
- شوێنی خۆحەشاردان: هەردوو تۆمەتبارەکە کە لەلایەن دادگاکانی عێراقەوە بە ماددەی (4)ی تیرۆر داواکراو بون، لە سنوری پارێزگای سلێمانی خۆیان شاردبووەوە.
- ڕادەستکردنەوە: دوای تەواوبوونی رێکارە یاساییەکان و لێکۆڵینەوەکان، لە ڕێکەوتی 28ـی تەمموزی 2026، تیرۆریستەکان بەپێی تایبەتمەندیی شوێنی تاوانەکانیان ڕادەستی دەزگای ئاسایشی نیشتمانیی عێراق کرانەوە.
ئامانجی هاوبەش: ئەم هەنگاوە لە چوارچێوەی هاوکاری و هەماهەنگییە بەردەوامەکانی نێوان دەزگا ئەمنییەکانی هەرێمی کوردستان و حکومەتی فیدراڵدایە بۆ وشککردنەوەی سەرچاوەکانی تیرۆر و بنەبڕکردنی پاشماوەکانی داعش لە ناوچەکەدا.
ئۆپراسیۆنەکانی ئەم دواییە
جێگەی ئاماژەیە، ئەم دەستگیرکردنە دوای ئەوە دێت کە لە ڕۆژی 20ـی هەمان مانگیشدا، بەڕێوەبەرایەتیی گشتیی ئۆپراسیۆنەکانی ئاسایش بە هەماهەنگیی دەزگای دژەتیرۆری عێراق، توانیبووی دوو چەکداری تری داعش لە سنوری سلێمانی و ئیدارەی ڕاپەڕین دەستگیربکات و ژن و منداڵێکی دەستبەسەرکراوی پەیوەندیدار بەو تیرۆریستانەش ڕزگار بکات.