جارێکی تر پرسی مووچەی فەرمانبەرانی هەرێمی کوردستان دەکەوێتە ناو بازنەی ململانێ داراییەکانی نێوان هەولێر و بەغدا، حکومەتی هەرێمی کوردستان بە فەرمی بەغدای ئاگادار کردووەتەوە کە بەهۆی کاریگەرییەکانی جەنگ و پێکدادانەکانی نێوان (ئەمریکا، ئیسرائیل و ئێران) لە ناوچەکەدا، داهاتی ناوخۆی هەرێم بە شێوەیەکی بەرچاو کەمی کردووە.
بەپێی سەرچاوە ئاگادارەکان، حکومەتی هەرێم ڕایگەیاندووە کە بۆ ئەم مانگە ناتوانێت بڕی 120 ملیار دینار وەک پشکی داهاتی ناوخۆ ڕەوانەی خەزێنەی دارایی بەغدا بکات.
هەر بەپێی سەرچاوەکان، بەغدا نەرمیی نیشان داوە بۆ ئەم مانگە ڕەچاوی دۆخەکە بکات و هەر بڕە پارەیەک کۆکرایەوە وەری بگرێت ، بەڵام تەیف سامی، وەزیری دارایی عێراق، ڕایگەیاندووە، بەبێ ڕەزامەندی ئەنجومەنی وەزیران، ناتوانێت بڕی ئەو 120 ملیار دینارە کەم بکاتەوە کە مەرجە بۆ ناردنی تەمویلی مووچە.
بەپێی ووتەی سەرچاوەیەک لە وەزارەتی دارایی و ئابوری هەرێم، بۆ ئەم مانگە تەنها توانای ناردنی 60 ملیار دیناریان هەیە.
لە ئێستادا، مووچەخۆرانی هەرێمی کوردستان کە چاوەڕوانی مووچەی مانگی سێ دەکەن، جارێکی تر ناچارن چاوەڕوانی کۆبوونەوەکانی ئەنجومەنی وەزیرانی عێراق بکەن. بڕیاری کۆتایی لە دەستی ئەنجومەنی وەزیراندایە کە ئایا تانە لە بڕیارەکەی وەزیری دارایی دەدەن و ڕەچاوی دۆخی ئابووری هەرێم دەکەن، یان جارێکیتر دابەشکردنی مووچە دوادەکەوێت.
