مۆنۆمێنتی شەهیدانی داستانی تازەشار وەک سیمبوولێکی هێماییی خۆڕاگری، قوربانیدان و بەرگریی ڕەوای گەل و نیشتمان دەرکەوت؛ ئەمە یادگارییەکی مەزنە بۆ ئەو پۆلە پێشمەرگەی یەکێتی و حزبی شیوعی و تێکۆشەران کە بە گیانفیدایی نرخێکی گرانبەهایان بۆ ئازادی و سەربەستیی گەلەکەیان بەخشیوە.
لە ڕوانگەی هەستکردن بە بەرپرسیاریی کۆمەڵایەتی و پاراستنی یاد و بیرەوەریی سەروەریی شەهیدان، کۆمەڵەی پێشمەرگە دێرینەکانی حیزبی شیوعی کوردستان و یەکێتی نیشتمانی کوردوستان مەڵبەندی ۱٦ حمرەین بە هاوکاریی لایەنە پەیوەندیدارەکان و کەسایەتییە نیشتمانپەروەرەکان، هەڤاڵ ملاکریم ملاحسن و هاوڕێ پێشڕەو هەنگاوی دروستکردنی ئەم مۆنۆمێنتەیان لە شوێنی ئەو داستانە نەبەردییەدا نا؛ ئەو شوێنەی کە تێیدا ١٢ پێشمەرگەی یەکێتیی نیشتمانیی کوردستان، ٨ شەهیدی حزبی شیوعی کوردستان و ٢ شەهیدی هاووڵاتی داستانێکی قارەمانانەیان تۆمار کرد.
لە ڕێوڕەسمێکی شایستە و پڕشکۆدا، بە ئامادەبوونی جەماوەرێکی فراوان لە خەڵکی ناوچەکە و ژمارەیەک لە بەرپرسانی حیزبی و حکومی، یادی ئەم شەهیدە نەمرانە بەرز ڕاگیرا. ئەم ئامادەبوونە بەرفراوانە، وێڕای نیشاندانی دڵسۆزی و وەفاداری بۆ ڕێبازی شەهیدان، پەیامێکی روونە بۆ بەردەوامیی خەبات و یادەوەریی ئەوان لە دڵ و ویژدانی کۆمەڵگەدا.
پێویستە ئاماژە بەوە بدرێت کە گوندی تازەشار، جگە لە شەهیدانی داستانی تازەشار، خاوەنی مێژوویەکی پڕ لە قوربانیدانە؛ لەوانە ٢٢ شەهیدی ئەنفال، ٢ شەهیدی سەنگەر و ٥ شەهیدی هاووڵاتی، کە ئەمەش فیدکارییەکی گەورەیە لەپێناو خاک و نیشتماندا.
ئێمە لە کۆمەڵەی پێشمەرگە دێرینەکانی حیزبی شیوعی کوردستان، بە هەستێکی بەرزی پێزانینەوە:
■ سوپاس و پێزانینی تایبەت ئاراستەی لیژنەی ئامادەکاری، بەتایبەت هاوڕێیان (فەرحان و ئیسماعیل ئاوباریکی) دەکەین کە بە هەوڵ و ماندووبوونی خۆیان کارەکەیان بە سەرکەوتوویی گەیاندە کۆتایی.
■ پێزانینی بێپایان پێشکەش بە خانه وادەی محمد شێخ غالب طاڵه بانی خۆشەویسته ی تازەشار دەکەین کە پارچە زەوییەکی بۆ دامەزراندنی ئەم مۆنۆمێنتە بەخشیوە، کە نموونەیەکی بەرزی هەستکردنە بە بەرپرسیاریی نیشتمانی.
■ سوپاسی ئەو جەماوەرە دڵسۆزە دەکەین کە لە گەرمیان، سلێمانی و کەرکووکەوە بە سەفەری چەندین کیلۆمەتری خۆیان گەیاندە ڕێوڕەسمەکە.
هیوادارین مۆنۆمێنتی شەهیدانی داستانی تازەشار هەمیشە هێمایەکی درەوشاوەی یەکڕیزی و قوربانیدان بێت و نەوەکانی داهاتوو فێری وەفاداری بکات بە ئامانجەکانی ئازادی و دادپەروەری.
یادی شەهیدان هەمیشە زیندوو و ڕێگایان بەردەوام بێت سڵاو لەو پێشمەرگە قارەمانانەی بە گیانی خۆیان فیداکارییان لە هێرشە بەدناوەکانی ئەنفالدا کرد.
کۆمەڵەی پێشمەرگە دێرینەکانی حیزبی شیوعی کوردستا