رێگای كوردستان
بە سەرۆکایەتی (عەلی زەیدی)، ئەنجومەنی وەزیرانی عێراق کۆبووەوە و چەند بڕیارێکی چارەنووسساز و گرنگی لە بوارەکانی ئابوری، وزە و کارگێڕیدا دەرکرد. دیارترینیان بریتین لە ڕاگرتنی گەشتە دەرەکییەکانی (ئیفاد) فەرمانبەران بە ڕێژەی 60% و دیاریکردنی بڕی هەناردەی نەوت بۆ تورکیا.
لە چوارچێوەی هەوڵەکانی حکومەت بۆ کەمکردنەوەی خەرجییە گشتییەکان و ڕووبەڕووبوونەوەی قەیرانەکان، ئەنجومەنی وەزیران ئەم بڕیارانەی خوارەوەی پەسەند کرد:
• کەمکردنەوەی خەرجییەکانی ئیفاد: ڕاگرتنی سەرجەم گەشتە دەرەکییەکانی فەرمانبەران، تەنها بۆ حاڵەتی زۆر پێویست نەبێت کە ڕەزامەندی تایبەتی وەزیری لێبێت، لەگەڵ کەمکردنەوەی بودجەی ئیفاد بە ڕێژەی 60% (جگە لە وەزارەتی دەرەوە).
• هەناردەکردنی نەوت بۆ تورکیا: لە قۆناغی یەکەمدا، بڕی هەناردەی نەوتی خاو بۆ تورکیا دیاریکرا بە 33 هەزار بەرمیل لە ڕۆژێکدا، وەک بەشێک لە ڕێککەوتنی چوارچێوەی ئاو لە نێوان هەردو وڵاتدا.
• کەرتی نەوت و گەروی هورمز: ڕەزامەندی درا لەسەر هەموارکردنەوەی بڕیاری پێشو بۆ بەردەوامیی میکانیزمی فرۆشتنی نەوت و بەرهەمە نەوتییەکان تا کۆتاییهاتنی قەیرانی ئێستا و ئاساییبوونەوەی هاتوچۆی کەشتیوانی لە گەروی هورمز. هەروەها ڕێگە بە وەزارەتی نەوت درا گرێبەست لەگەڵ کۆمپانیای ئەمریکی "شیفرۆن" بۆ دابینکردنی نەوتی خاو و ڕاوێژی تەکنیکی واژۆ بکات.
• بڕیارە پەیوەندیدارەکانی دیکە:
o درێژکردنەوەی مۆڵەتی هاوردەکردنی دەرمان و پێداویستی پزیشکی تا کۆتایی ئەمساڵ.
o ڕەوانەکردنی پڕۆژەیاسای هەڵوەشاندنەوەی بڕیارێکی ساڵی 1989ی ئەنجومەنی سەرکردایەتی شۆڕشی (بەعس) بۆ پەرلەمان.
o پێدانی دەسەڵات بە وەزیری بازرگانی بۆ واژۆکردنی ڕێککەوتنی هاوکاری ئابوری و بازرگانی لەگەڵ سەرتبیا.
دەرکردنی ئەم بڕیارانە لە کاتێکدایە کە ناوچەکە بەهۆی گرژییەکانی گەروی هورمزەوە بە قەیرانێکی گەورەی گواستنەوەی وزەدا تێدەپەڕێت. لەم سۆنگەیەوە، عێراق هەوڵدەدات جێگرەوەی نوێ بۆ هەناردەکردنی نەوت بدۆزێتەوە، بەتایبەت لە ڕێگەی تورکیاوە. هاوکات بڕیاری کەمکردنەوەی خەرجییەکانی گەشتی فەرمانبەران، هەنگاوێکی حکومەتە بۆ کۆنترۆڵکردنی خەرجییە گشتییەکان و بەڕێوەبردنی دارایی وڵات لەم دۆخە هەستیارەدا.