لەنێو دەریادا گەلێ شەپۆل هەن
باڵایان بەرزە وەك درەختی چنار
دەنگیان ترسناك
تەكانیان خێرا
كەچی دەمرن و ناگەنە كەنار
وەك ئەو باڵندە وێڵ و برسیانەی
بۆ مشتێ گەنم
بەتۆڕ و داوی راوچیان گیر دەبن
وەك خەون و هیوای
ئەو جەنگاوەرانەی
هەرگیز پێی ناگەن
هەتا پیر دەبن.
×××××××××
گەلێ مرۆ هەن هەتاکو ئێستا
خۆیان بەهەڵۆ و پڵنگ دەچوێنن
وەکو باڵندەی نێو قەفەزەکان
کەس تێیان ناگا
داخۆ دەناڵن، یاخۆ دەخوێنن؟
×××××
تا دەست لە هەوا و پێ لە عەرزی بن
هەر لە خوارەوە،
هەنگاوەكانتان دژی بەرزی بن
وەک مەیموونەکانی وڵاتی بالی
منداڵەكانیشیان ناچار دەکەن
فێرە خزین و دواتر دزی بن.