بیست و سێ‌

هـاوڕێ سیزیف

سەیران:ئازیزان، ئێره دەڤەری بڤە و

مەملەكەتی تابووتە

ڕێزان:ئێرە سنووری نەریت

و 

دوورگەی زەقنەبووتە

بێخاڵ:لێرە ڕۆژ نییە خوێنی دوو ئاشق

نەڕێژن و تەرمی دوو لێو بەتاوانی ماچ

نەنێژن

سەیران:لێره لێناگەڕێن گوڵی ئامێز

چرۆ بكات

و كەس لە زاراوەی ئیشق

تێناگات

ڕێزان:لێره هەر دەیجورە دادەگیرسێت

و هێشووی تریفەی مانگەشەو

هەرگیز پێ ناگات

بێخاڵ:لێره

گوڵەكان بە گەنجی سەردەنێنەوە

و

وەرزی بەهار بەكاڵی دەكوژێتەوە

سەیران:خۆشەویستی لە سەر نووكی چەقۆ

ڕێ دەكات

و

مۆركی مەرگ بۆ ئاشقان

دەبڕدرێتەوە

ڕێزان:ئازیزەكەم، ئێمە لە ناو قەفەزی

مەزهەب و لە كیشوەری

خێڵین

بێخاڵ:وەرن باچیتر

شەتڵی گریان

لە زێدی عەزابا نەڕوێنین

و

كێڵگەی خەم نەكێڵین

سەیران:وەرن با

ئەم فەسڵی هەڵوەرین

و

مەوتنەی زام

جێ بێڵین

ڕێزان:وەرەبا لێ نەگەڕێین چیتر

پەڕەی دەفتەری خەندەكانمان

بە تیغی فرمێسك

كون بـێ

بێخاڵ:وەرە با بڕۆین

بۆ دوور دوور

و

ناونیشانمان

لەو نیشتمانەی سەراب

ون بـێ..

سەیران:كچینە با واز لە وڕێنە بێنین.

ڕێزان:چۆن؟

بێخاڵ:خەو دەرمانی مێشكی ماندووانە، خەو خۆشترین ژەمە سرووشت بە ژیانی بەخشیوە.(٭)

سەیران:لەوەتەی بەبیرم دێت هەر پاییزە ژیان !

ڕێزان:ئاخ لەدەست ژیان.

سەیران: ئەی تەنیایی، تۆی نیشتمانی من.(٭)

بێخاڵ:هاوڕێیان، كێ تۆزی ئەو هەموو دڵتەنگی و قەلەقییەم لێ دەتەكێنێت؟

سەیران:فرمێسكەكانت.

ڕێزان:چی؟

بێخاڵ:گوتم:نوكتە و گاڵتە و گەپ.

سەیران:هەست دەكەم گەر گیرۆدەی خەمێكی وەك ئەو خەمەی تۆبم، لە مرۆڤەكان دوورناكەومەوە وەك ئەوەی تۆ لێیان دوور دەكەویتەوە.(٭)

ڕێزان:ئەوە تۆ شێت بوویت؟

بێخاڵ:دیارە ئەقڵی لەدەستداوە!

سەیران:كچینە گاڵتەم كرد.

ڕێزان:منیش قەڵەقیم لێدەچۆڕێت.

بێخاڵ:چارەسەر؟

سەیران:بێ ئاگایی!

ڕێزان:پێكێك بێ هۆشی.

بێخاڵ:كەوچێك پووچی.

سەیران: بژی عەبەسییەت.

ڕێزان:دەی با بخەوین.

بێخاڵ:بۆچی؟

سەیران:ڕاحەت تەنها لەوێیه.

ڕێزان:هاوڕێیان، تكایە لێم گەڕێن، بەو هەموو پڕش و بڵاوییەم با جگەرەیەك داگیرسێنم.

بێخاڵ:من لەتێكم لە نەفرەت

سەیران:زۆر پەشیمانم كە لێرەم.

ڕێزان:یەع لە بوون.

بێخاڵ:خۆشكان، ئەرێ گوتتان لەكوێوە هاتووین؟

ڕێزان:نازانم !

سەیران:ُئەی بۆ لێرەین؟

بێخاڵ:ئەوەش نازانم!

ڕێزان:ئەی بۆ كوێ دەڕۆینەوە؟

سەیران:گوتم نازانم.

بێخاڵ:ئەها بیرم كەوتەوە !

ڕێزان:چی؟

سەیران:ئێمە لەكوێ هاتووین.

بێخاڵ:لە عەدەمەوە.

ڕێزان:ئەی چی دەكەین لێرە؟

سەیران:تا ڕووبەڕووی قەدەر ببینەوە.

بێخاڵ:بەچی؟

ڕێزان:بە ڕەش بینییەكەی شۆپنهاوەری گەواد و چەكوكەچەی نیچەی سمێڵ حیز و بەردەكەی هاوڕێ سیزیفی گەمژە.

سەیران:هاوڕێیان، ئەرێ هــەر نەتان گوت بۆ كوێ دەڕۆینەوە؟

بێخاڵ:بۆ قوزی قەحپە، بۆ عەدەم، بۆ جەهننەم، جا ئەوە كەی كێشەیه؟

ڕێزان:تكایە، بمگەڕێننەوە سەر ڕەچڵەكی ڤایرۆسە حیزەكە.

بێخاڵ:ئەرێ بەچی هەوساری ئەو هەموو گومان و نا دڵنیایی و قەڵەقییەی وجود، و  ئاژاوە و شەڕانگێزی مرۆڤەكان و قێزەونی و ناعەدالەتی ژیان بكەین؟

ڕێزان:دیسان هەر قانوونی عەبەس!

سەیران:عەبەس، تاقە ڕێگای ڕزگاربوون.

هەرسێكیان پڕ بە گەروو دەگوڕێنن:بژی عـەبەسییەت.

-------------------------

٭لە "ماكبێس"ی شكسپیرم وەرگرتییە.

٭وتەیەكی نیچەیە.

٭وتەیەكی دۆیستۆیفسكییە و لە ڕۆمانی" تاوان و سزا"م وەرگرتووە.

 


 رێگای كوردستان ماڵپەڕێكی سیاسی، رۆشنبیری، گشتییە ئۆرگانی حزبی شیوعی كوردستانە، مەكتەبی راگەیاندنی ناوەندی بەڕێوەی دەبات

میدیا

   

   تەلەفۆن:   797 4635 750 964+

   ناونیشان:  هەولێر - گەرەکی ئازادی - نزیك نەخۆشخانەی نانەکەلی

   ئیمێل:  regaykurdistan@gmail.com

تابلۆی هەفتە