1
وێنەی نیوسەدە لە تەمەن
نیوسەدە عومری بەسەرچوو
نیوەی ئەم گەردوونە گەڕام
شتێکم لێ مەعلووم نەبوو!
2
چەند بێزارم
لە دەنگی چرکەی سەعاتی
سەر دیوارە شێدارەکەم
چەند بێشەرمانە پێم دەڵێ
خۆت کۆکەوە،
ئامادە بە، بەرەو عەدەم!
3
چەند دڵتەنگم
کاتێک زەنگی ساڵێکی نوێ
دێتە بەر گوێم
جێگەی داخە، دەمرم و
ناشزانم من کێم!؟
4
جانتای ژینم
خەریکە تەواو پڕ دەبێ
لە ساڵانی هەڵوەریووی عومری شیرین
بڵێی مەرگ، مۆڵەت بدات
سەری جانتام پێ دانەخات
تا مەست دەبم،
بە شەرابی عیشق و ئەوین!
5
چەند زوو ڕۆشت
نیوسەدە تەمەن!
لە دوو خولەکدا تێپەڕی
توایەوە بەفری عومر
بە خۆری غەداری زەمەن!
جەمال حەمید