كەریم دەشتی
تا لووتکە شیر و ژەکی خۆی
نەداتە دڵی بناری
تا دەریا کەفی سپیی خۆی
نەبەخشێتە سینەی پڕ لمی کەناری
تا ئینسان جەستەی خۆی ڕانەخات
بۆ بلێسە و رۆشنایی
بۆ ئەبەد ناگاتە ترۆپکی دڵنیایی
تا پەنجەی ئاگرنووس تینی خۆی
نەڕژێنتە ناو دڵی وشەی پڕ جونبوجۆش
تا عاشق شەرابی کڵپەی ناو دەروونی
بەتاو هەڵنەڕێژێ
بۆ ناو قاپی سپیی هزرو هۆش
نە بنار ئەبێتە فەرشی ڕێ و
نەکەنار شین ئەبێ
نە وشە گڕ ئەگرێ و نە عاشق
گراوی مەبەستی هەڵئەگرێ
سەرزەمین هەمووی یەک بەستەو هاوارە
یەک دادو بێدادی وەرەسی و ئازارە
هەر هەمووی هەزاران ئەڵقەی یەک زنجیرە
لە هەوکی ئێمەی دیل
تا ئازادیی وەکو خۆری جاویدانی
تیشکی خۆی هەڵنەخات
بەسەر ئەم وجوودە
کۆیلێتی دەبێتە سەرمەشقی ئەبەدیی و
مرۆڤیش بۆ ئەبەد بێهوودەو و نابوودە