ئۆفیسی هەواڵ
کۆمپانیای گەڵف کیستۆنی بەریتانی ئامادەیی تەواوی خۆی نیشاندا بۆ دەستپێکردنەوەی خێرای پرۆسەی بەرهەمهێنان و هەناردەکردنی نەوت لە هەرێمی کوردستان بۆ بازاڕە نێودەوڵەتییەکان. ئەم هەنگاوە دوای ئەوە دێت کە عەلی زەیدی، سەرۆک وەزیرانی عێراق، بەڵێنی گەرەنتییکردنی ئاسایشی کۆمپانیا نەوتییەکانی لە کێڵگەکانی هەرێمدا دا.
ڕاگرتنی کاتی و پاراستنی ژێرخان
کۆمپانیاکە لە ٢٨ی شوباتی ٢٠٢٦دا، بەهۆی تێکچوونی دۆخی ئەمنیی ناوچەکەوە، بەرهەمهێنانی لە کێڵگەی شێخان ڕاگرت، کە ئەمەش بووە هۆی وەستانی سەرچاوەی داهاتی سەرەکییان. سەرڕای ئەمەش، کۆمپانیاکە جەخت دەکاتەوە کە:
ژێرخانی کێڵگەکان و تیمەکانی کارکردن لە ئامادەباشی تەواودان.
توانای دارایی کۆمپانیاکە جێگیرە بۆ دەستپێکردنەوەی خێرا بەکۆی تواناوە.
ستراتیژی ڕووبەڕووبوونەوەی قەیرانەکە
بۆ خۆڕاگرتن لەم قۆناغی بێ داهاتییەدا، گەڵف کیستۆن کۆمەڵێک ڕێکاری توندی گرتووەتەبەر:
"خەرجییە نەختییەکانی مانگانەی خۆمان بەڕێژەی نزیکەی ٥٠٪ کەمکردووەتەوە، بەڵام پڕۆژە زۆر ستراتیجییەکانی پەیوەست بە سەلامەتی و کارایی کێڵگەکەمان بە بەردەوامی هێشتووەتەوە."
گەشبینی بە ئاسۆی سیاسی و ئەمنی
کارگێڕیی کۆمپانیاکە ئاماژە بەوە دەکات کە ئاسۆی ئاسایشی ناوچەکە بەرەو باشبوون دەچێت. ئەم گەشبینییەش زیاتر پشت دەبەستێت بە:
لێکتێگەیشتنی چوارچێوەی سیاسی لە نێوان ئەمریکا و ئێران.
چاوەڕوانییەکان بۆ کەمبوونەوەی گرژییە جیۆسیاسییەکان لە ڕۆژهەڵاتی ناوەڕاست و بەتایبەت لە عێراقدا.