دیمانە/ دهۆک بەڕۆژی
عایشە عومەر ساڵی 2002 لەدایکبووە. قوتابی زانکۆی سۆران بەشی زانستە گشتییەکان قۆناغی چوارەمە. ئەم خانمە گەنج و دەستڕەنگینە کۆشکێکی خواردنەوە لەنێو گەلیی عەلی بەگدا بەڕێوەدەبات. ڕێگای كوردستان بەسەریکردۆتەوە.
ڕێگای كوردستان: چی وای لێکردیت ئەم قاوەخانەیە بکەیتەوە؟
عائیشە عومهر: حەز و خولیای خۆم وەک کچێک بۆ دروستکردنی جۆرەکانی قاوە و شیرینی وایلێکردم بڕیاری کردنەوەی قاوەخانەیەک بدەم. بێگومان ئاسان نەبوو، بەڵام پشتگیری خێزان و دۆست و هاوڕێکانم یارمەتیدەر بوون تا بتوانم بە خەونەکەم بگەم.
ڕێگای كوردستان: پێش ئەوەی کافێکە بکەیتەوە، هیچ ئەزموونت لە بوارەکەدا هەبوو؟
عائیشە عومهر: کاتێک بیرۆکەی قاوەخانەکەم بۆ دروستبوو، هیچ ئەزموونێکم نەبوو، بەڵام حەزم بۆ کارەکە وایکرد هەوڵبدەم و بتوانم پێبگەم. ئێستا کارەکم زۆر باش ئەنجامدەدەم، میوانەکانمان زۆر لێمان رازین و هیوای بەردەوامیمان بۆ دەخوازن. تێڕواینیان زۆرباشە بۆکاری خانمان. شوێنەکەمان بۆتە جێی سەرنجی گەشتیارەکان.
ڕێگای كوردستان: کێ یارمەتیدەرت بوو تا بتوانیت ئەم کافێیە بکەیتەوە؟
عائیشە عومهر: سەرەتا خۆم بەتەنیا بووم، بەڵام دواتر خێزانەکەم و کاک ئەحمەد خاوەنی کۆمپانیا میجر زۆر هاوکارم بوو، هەمیشە یارمەتیدەر و هاندەرم بوو بۆ پێشخستنی بیرۆکەکەم.
ڕێگای كوردستان: چی پەیامێکت بۆ کچان هەیە کە دەیانەوێت کاری خۆیان هەبێت؟
عائیشە عومهر: پەیامم ئەوەیە کە جگه له خوێندن و بڕوانامە، با فێری كارێكی نوێ ببن و لەسەرپێی خۆیان بوەستن و گوێ نەدەنە قسەی خەڵکی، بەتایبەتی ئەو جۆرە کەسانەی کە پێیانوایە نابێت ئافرەت کاربکات و خاوەن ئابوورییەکی سەربەخۆبێت. واته دەكرێت دكتۆر بیت و میوزكژەنیكی باش بیت. دەكرێت جگه له تایبەتمەندیی بڕوانامەکەت كاری تر بزانیت و بیكەی به داهات.
ڕێگای كوردستان: ئەو رۆژەی یەکەم کڕیارت هات، چی هەستێکت هەبوو؟
عائیشە عومهر: ئەو کاتەی یەکەم کڕیارم هات دڵم زۆر خۆش بوو، لە دوای ماندووبوونێکی زۆر توانیم بەوە بگەم کە دەمەوێت، بۆیە خواردنەوەکەمان بە دیاری پێشکەشکرد و میوانەکەشمان دڵی زۆر پێ خۆش بوو، دەستخۆشی لێکردین .
ڕێگای کوردستان: سوپاس بۆ ئەم دەرفەتە، بەهیوای کاری جوانتر.
عائیشە عومهر: زۆر سوپاس بۆ ڕۆژنامەی ڕێگای کوردستان کە منتان بەسەرکردەوە، زۆر گرنگە پەرە بە توانا و کاری خانمان بدرێت تا بتوانن زیاتر بناسرێن و لەسەر پێی خۆیان بوەستن.