دیمانە/ هاوڕێ كرێكار
سوبحی مەهدی ئەندامی مەكتەبی سیاسی حزبی شیوعیی كوردستان ڕایدەگەێنێت كە ئەم دۆخە نوێیە لە بەرژەوەندیی گەلەكەماندا نییە كە زۆرینەی هەژار و بێكار و چەوساوەن. باس لەوەش دەكات كە ئەركی حكومەتە ئاسایش و ئارامی، ژیانێكی شەرەفمەندانە، خزمەتگوزاری گشتی، دادپەروەری، ئازادییەكان، دامەزراوەی یاسایی بۆ خەڵك دابینبكات. جەختیش دەكاتەوە ئەگەر حكومەت نەتوانێت ئەم ئەركانە جێبەجێبكات، دەبێت ئەو متمانەیەی كە دەڵێن لە خەڵك وەریانگرتووە، بیدەنەوە بە خەڵكەكە.
ڕێگای كوردستان: هەڵوێستی حزبی شیوعیی كوردستان لەسەر هەموو ئەم گرفتانەی لەم ماوە ڕوودەدەن چییە، گرنگترینیان نەهاتنی مووچە؟
سوبحی مەهدی: ئێمە لە پێكهێنانی ئەم كابینەیە و كابینەكانی پێشوودا بەشدارنین، لەبەر ئەوەی بەرنامەی ئەو كابینانەمان پێ پەسەندنەبووە و لە پەرلەمان دەنگمان پێنەداوە، لە دواهەڵبژاردنیشدا كە زیاتر لە هەشت مانگی بەسەردا تێپەڕیوە، نە سەرۆكایەتی پەرلەمان و نە كۆمسیۆنەكان و نە كابینەی نوێ پێكنەهاتوون، ئێمە دەپرسین ئەی بۆچی هەڵبژاردنتان كرد و بە ئەنجامەكانی ڕازین؟ ئێمە لەو هەڵبژاردنە و هەڵبژاردنەكانی ڕابردوودا ڕەخنە و سەرنجمان هەبووە، ئەم دۆخە نوێیە لە بەرژەوەندیی گەلەكەماندا نییە، كە زۆرینەی هەژار و بێكار و چەوساوەن، لایەنگری دەكەین و بەئەركی حكومەتی دەزانین كە (ئاسایش و ئارامی، ژیانێكی شەرەفمەندانە، خزمەتگوزاری گشتی، دادپەروەری، ئازادییەكان، دامەزراوەی یاسایی) بۆ خەڵك دابینبكات. لەكاتێكدا نەتوانێت ئەم ئەركانە جێبەجێبكات، دەبێت ئەو متمانەیەی كە دەڵێن لە خەڵك وەریانگرتووە، بیدەنەوە بە خەڵكەكە و با ئەوان حوكمڕانێتی دڵخوازی خۆیان دابمەزرێنن.
ڕێگای كوردستان: خەڵك تاكەی بەبێ مووچە دەوام بكات؟
سوبحی مەهدی: بە دوو شێوە وەڵامی پرسیارەكەت دەدرێتەوە، با من خۆم بخەمە جێگای كرێكار یان فەرمانبەران، فەرمانبەرێك كە خۆبەخشانە هاتووە بۆ كاركردن و چاوەڕێی هیچ كرێیەك ناكات و پێویستی بەهیچ مووچەیەك نییە، ئەوجۆرە كەسانە دەتوانن تا هەتایە دەوام بكەن، مووچە هەبێت و نەبێت بۆ ئەوان بایەخێكی نییە، دیارە ئەمجۆرە كەسانە كەمینەن. جۆری دووەم، كرێكارێك یان فەرمانبەرێكە كە كارەكەی (ڕۆژانە بێت، یان مانگانە) بۆ دابینكردنی بژێوی و ژیانە و دەیەوێت و پێویستە خاوەنكار لە (كەرتی تایبەتدا كە بەڕێوەبەر یان خاوەنی كۆمپانیا یان بەڵێندەرێكە) یان كەرتی حكومی (كە خاوەنكارەكە حكومەتە و حكومەتەكەش حكومەتی هەرێمە )، لەهەردوو حاڵەتدا، یان هەر حاڵەتێكی تردا، كرێكار یان فەرمانبەر داوای كرێی كارەكەی دەكات، ئەگەر نەدرا پاساوی باوەڕپێكراوی دەوێت، ئەگەر پاساوەكە قبوڵكراو نەبوو، سەرەتا داوانامە (عەریزە) پێشكەشدەكات، ئەگەر دادی نەدا لەگەڵ هاوپیشەكانی پێكەوە و بەكۆمەڵ داوادەكەن، ئەگەر ئەنجامی نەبوو ڕێگاكانی مانگرتن یان خۆپیشاندانی ئاشتییانە ڕێكدەخەن، ئەگەر هەر دادی نەبوو، ئەوا هەر ڕێگەیەكی تری (سەندنی ماف) ڕەوایەتی هەیە تا ملكەچپێكردنی خاوەنكار و حكومەت بە پێدانی مافەكانی، چونكە ماف دەبێت (بسەنرێت، بەهەر ڕێگایەك بێت)، ئەگەر لە وادەی بڕیاردراوی خۆیدا نەدرا.
ڕێگای كوردستان: بۆچی بەناوی هاتن و نەهاتنی مووچەوە یاری بەم خەڵكە دەكرێت، ئەمە لەپێناو چیدایە؟
سوبحی مەهدی : ئەوە یاری نییە، تۆ كە خاوەن ماف بیت، كە سەرەتاییترینی ئەو مافانە كرێی گونجاو و مووچەی گونجاوە لەكاتی خۆیدا، جا ڕۆژانە بێت یان مانگانە، ئەوە یاری نییە، ئەو كارە چەوساندنەوەیە، لەمێژووی مرۆڤایەتیدا لە دێرزەمانەوە بۆ ئێستا لە بەرامبەر چەوساندنەوەدا مرۆڤە هوشیارەكان، ڕێگا جیاجیاكانیان لەشێوەی مانگرتن خۆپیشاندان تا ڕاپەڕین و شۆڕشیان گرتۆتەبەر. كاتێك چەوساوەكان بێدەنگدەبن، چەوسێنەرەكان پێیانخۆشە، چونكە كاریان دەڕوا و جار و باریش بەدەم هیوا و بەڵێنی درۆزنانەوە بە مەرگیان دەسپێرن.
ڕێگای كوردستان: یەكێتی بەشداری حكومەتی هەرێمە، بۆ خۆی بێبەری دەكات لەو كێشانەی هەیە؟
سوبحی مەهدی: نە یەكێتی و نەپارتی و نەگۆڕان و نە پێكهاتەكانی نەتەوەیی، ناتوانن خۆیان بێبەری بكەن لەو كێشانەی هەیە، چونكە ئەم حكومەتە ئەگەر لایەنێكیش حساب بۆ ئەوی تر نەكات یان جومگە سەرەكییەكانی لەدەستدابێت، حكومەتێكی هاوپەیمانییە (ئیتلافی)ە، یەكێتی و ئەو لایەنانە وەزیر و پۆستی گرنگیان لایە، بەرپرسیارن، ئەگەر خۆیان جیابكەنەوە، دەبێت حكومەت بەجێبهێڵن.
ڕێگای كوردستان: بۆ حكومەتی عێراق لە هەڵوێستەكانی پارتی نیگەرانە؟
سوبحی مەهدی : من باوەڕ ناكەم نیگەران بن، ئەوان تەواوكەری یەكترن بۆ گیانی میللەت لە بەغدا و لەهەرێم، پارتی زۆربەی پۆستە گرنگەكانی نموونەی سەرۆكی هەرێم و سەرۆكی حكومەت و وەزارەتە گرنگە سیادییەكان ... و تادوایی لایە و لەگفتوگۆكاندا پشكی گەورەی هەیە، لە بەغداش وەزارەتی گرنگ و جێگری ئەنجومەنی نوێنەران و دەوروبەری سی نوێنەری لە پەرلەمان هەیە. جگە لەوەش لەگەڵ یەكێتی لە ئەنجومەنی ئیدارەی دەوڵەتن لەگەڵ هێزە شیعە و سوننەكان، ئیتلافی حوكمڕانیان پێكهێناوە، تا ئێستا نەیانتوانیوە بۆ بابەتە هەڵواسڕاوەكان چارەسەر بدۆزنەوە، كوا چارەسەری مادەی ١٤٠ی دەستوور، كوا مافەكانی پێشمەرگە، كوا ئەنجومەنی ئیتحادی، كوا چارەسەری یاسایی بۆ نزیكەی پەنجا ماددەی تری دەستوور، ئەگەر لە هەردوولا ناڕازین ئەی بۆچی هاوپەیمانی حوكمڕانیان لەگەڵدا دەكەن و پلە و پۆستەكانیان لەگەڵدا برابەش دەكەن؟