زاهیر ئیبرهیم
لەگەڵ براکانی، بێگوێدانە ترس و تۆقاندن، و نمایشە سەربازی و هەواڵگرییەکانی دەسەڵاتی سەرکوتکەری بەعس، بووێرانە نامە و بەریدی حیزبییان لە شاخەوە دەگەیاندە سەنتەری شارەکان، تەنانەت هەر ڕاسپاردەیەکی ڕێکخستنە نهێنییەکانی حیزبیشیان وەک خۆی بۆ پێشمەرگە شیوعییەکانیان دەهێنایەوە.کە ئەو سەردەم شيوعییەکان لە پێناو ڕووبەڕووبوونەوەی داگیرکاری و تێکۆشان بۆ ئازادی و سەربەخۆیی کوردستان، چیاکانیان کردبووە وێستگەیەکی تری بەرخودان و سەنگەری بەرگریی لە خاکی کوردستان.
وەک هاوتەمەنەکانیان دەڵێن" ئەم خانەوادەیە لە هەر ئەرکێک بۆ گواستنەوەی زانیاریی لە بارەی جموجۆڵەکانی ڕژێم، سەر ڕاستانە وردەکاریی بارودۆخ و پێشهاتەکانیان دەگەیاندەوە هاوڕێیەکانیان". جگە لە گەیاندنی کۆمەک و پێداویستی بە سەنگەرەکان و بنکەکانی حیزب. ئەمە پیشەی هاوڕێ عبداللە و برا و کەس و کارەکەی بوو کە بە شێوەی جۆراوجۆر لە ڕیزی حیزب خزمەتیان بە گەل و نشتیمان کردووە.
هاوڕێ عبدللە جووتیارێکی گەڕیدە و ماندوو، مرۆڤ دۆست، خاکیی و میوان خواز. ئەستێرەیەکی هەڵکەوتووی ئاسمانی گەشی شیوعییەت، لە دایکبووی گوندی دەرگەڵەی لانەی باڵا بوونی دەیان شۆڕەسوار و خەباتگێری ڕێگای یەکسانی و ئازادی و سەربەخۆیی کوردستان،کە بۆ هەمیشە سەرکردە و جەنگاوەرەکانی دەرگەڵە جێگای شانازی و سەربەرزی حیزب و گەلەکەیانن.
هاوڕێ عبداللە دەرگەڵەیی، هەر لە تەمەنی لاوێتییەوە پەیوەندی بەڕیزی حیزب دەکات. ڕاستگۆیی و بووێریی و خۆنەویستییەکەی، وایکردووە هەر زوو ببێتە کەسێکی خۆشەویست و جێی متمانەی هاوڕێیان و پێشمەرگە شیوعییەکانی عێراق و کوردستان. ئەو بەهۆی گرفت لە پێکهاتەی زمان و ئەداکردن، ناتوانێت وەک خۆی تەواوی پەیام و قسەکانی ناخی بگەینێت! بەڵام بەکردار و ئاکاری جوان، ناوبانگی لە ناو هاوڕێیان دەرکردبوو. بەڵێ چالاکبوون و کردارەکانی، هەرگیز نەبووە کۆسپ لە بەردەم ژیانی حیزبی و کۆمەڵایەتیی، ئەم گرفتە تەندروستییە، نەک نەیتونی پەکی بخات، بەڵکو لە هەر دۆخێک بەهێزتر دەرکەوتۆتەوە، ئەمەش بە هۆی بەردەوامی ئەزموونکردن و بەریەککەوتنی لەگەڵ کادیران و هاوڕێیان، کە هەمیشە قوتابخانەی پەروەردە و فیکر و هۆشیاریی بوونە.
لە ساڵانی خەباتی بزوتنەوەی ڕزگاری خوازی کورد، و بەرەنگاربوونەوەی ڕژێمە داگیرکەرەکانی عێراق، کە شیوعییەکان خاوەن قوربانیدان و مێژوویەکی پڕ لە شکۆ و سەروەریی ئەم قۆناغەی گەلەکەمانن. ئەم هاوڕێیە پاڵاوان ئاسا پردی گەیاندنی شیوعییەکان بوو بە بنکە و بارەگاکانی حیزب،لە هەندرێن و کارۆخ و ناوچەکانی باڵەکایەتیی. هەر شیوعییەک کە لە بەسڕا و نەجەف و شارەکانی ناوەڕاست، کاتێک دەیانویست ڕوو لە بنکەو بارەگاکانی دەڤەرەکە بکەن، ئەو هاوشانی هاوڕێیەکانی ڕێنوێنی و چاوساغی بۆ گواستنەوەی دەکرد.
کورد گوتەنی" کوڕی ڕۆژی تەنگانەبوون".
ئەم هاوڕێیە، لە وێستگەی خەباتی ئەمڕۆی حیزبیشدا هاوڕێیەکی پابەند و دڵسۆزە لە جێبەجێ کردنی ئەرکەکانی ئەندامی حیزب. بەبێ ئەوەی بەرپرسە حیزبییەکەی داوای لێ بکات، مانگانە خۆی دێتە بارەگا و ئابوونەی بڕیاردراوی حیزبیی ئەدات! لە هەر ئەرکێکی حیزبی بە هەمان گڕوتینی جاران بەشداریی هەیە، سەرەڕای هەڵکشانی تەمەن، بەڵام دەیەوێت هەر پێشەنگ و ئامادەبێت لە ڕاپەڕاندنی ئەرکانیدا.
هاوڕێ عبداللە، برای هەر یەک لە تێکۆشەری کۆچکردوو مام" احمد کەژە" و هاوڕێ" واحید". هاوڕێ تا ئێستاش هەر نیشتەجێی دەرگەڵەیە. هەر تێکۆشەر وپێشمەرگەیەکی دێرینی شیوعیی کوردستانی یان عێراقی، کاتێک ڕێیان دەکەوێتە ئەم دەڤەرە سۆراغی مام عبداللە دەکەن و لە هەواڵ و باس و خواسی ئەپرسن.
جێی خۆیەتی بڵێن ئەم خانەوادەیە و کچ و کوڕەکانیان بە ئەوپەڕی وەفادارییەوە لە ڕیزی حیزب بەردەوامن لە تێکۆشان.
