حەسەن محمود محەمەد
حکومەتى لەسەر بنەمای گوڵ دروست نەبوو بێ، هەردەبێت چاوەڕوانی (فت) بوون بێت.
وشەیەکە لەناوفەرهەنگی(هەمبانە بۆرینەدا) بەمانای (ناڕاستگۆی)دێت. کەم جارلەیارییە پاک وبێ غەشەکاندا، بەدەم وزاردا دێت، بەڵام گەر پێچەوانەکەی بوو، ئەوکات وشەکە کورت وخۆشە بۆ ووتن، تا ئەوئاستەی بەگاڵتەوگەمەپێکردن دێت، دەچێتە سەر زاری هەموان هەرچۆنێک بێت لە یاریەکاندا، پاکانە هەڵدەگرێت بڵێیت ووشەکە بەگیانی وەرزشیەوە، وتراوە ئەوکات لەدڵدا تەنگ وناخۆش نابێت.
ئێستا بابزانین حکومەتەکەی لای خۆمان، لەڕابردو ئێستادا چەند ئەم ووشەیەی دوور لە گیانی وەرزشی دابڕیوە بەژیانی ڕۆژانەماندا ، چونکە ئەمان باکیان بەهاوڵاتی بوون ومافەکانیان نییە گرنگیان بەخەباتی، شەهیدان، پێشمەرگایەتی نییەونەبوەو نابێت، بەداخەوە هەرچۆنێک پێناسەی دەوڵەتداری ئەم جۆرە سستەمانە بکەیت جگە لە (فتەکان) هیچ گوڵێک و خونچەیەکی گەشاوە نابینیت، ئەمان زاناو دانای (فتکردنن)، زۆر سادەوئاساییە لایان چۆن کرانەوە، دیموکراسی، مافی مرۆڤ، کەرتی گشتی، کارەبا، ئاو، تەندروستی، پەروەردە، دەستور، یاسادانان، هەڵبژاردن، موچە و بژێوی خەڵک و ماف و ئازادییە سەرەتایەکانی هاوڵاتی خێر لە خۆ نەدیوی ئەم هەرێمە بەشانازیەوە (فت)کەن، تا ئەو ئاستەی خەڵک وکەسە نزیکەکانی لای خۆشیان کەکاریان پێیان نەما دەبێت(فت)بکرێت، چونکە نرخی کات وساتیان لانییە، ئاساییەلایان تەمەنیشمان بۆئەوان بێت یان لە خزمەتی ئەوان بێت.
سات بەسات جوانی ژیانمان لێدەسەننەوە، ناشیرینیەکانی ژیانمان پێ ڕەوادەبینن، ڕۆژبەڕۆژ سیاسەتی ناعەقڵانی وسستەمی دواکەوتویمان بۆهاوردە دەکەن، جوانیەکان و ڕابردوەپاکەکانمان لێدەسەننەوە، کورت بینن لە سیاسەت و دەوڵەتداری درێژبین و چاوکراوە لە گیرفان پڕکردن وتاڵانی،
بێباک بەرامبەرخەڵک ، بێ ئەمەک بۆیان، پشت ئەستورو بەسود بۆبنەماڵەو کەسە زۆر نزیکەکانی خۆیان، لاواز بەرامبەر بەنەیارەکانیان لەناوخۆو دەرەوە،بەجوڵەوبەتوانا بۆ خۆمان،بێ هەست و بێ گوێ بەرامبەربەهاوڵاتی ئەم هەرێمە، دەمڕاست وجێبەجێکەر بۆ دەرەوە وهتتد.
مێژوی ڕابردو نەک زۆر دوور بەڵکوو نزیک، پێمان دەڵێت، کە ڕەوڕەوەی ئەم جۆرە حوکمڕانیانە درێژ نییە، چونکە، لە یەکەی حوکمڕانی سەلیم وباشدا ئەوەی پێویستە، کە حوکمڕانیەکە سەربەخۆ و یاسایی بیت، بەڵام ئەمان نەسەربەخۆبوون، نە یاساشیان جێبەجێکرد بۆ نمونە... بەتێڕوانینی (مارکس..ململانیەکان لەجیهاندا..ململانێی چینایەتییە) بۆیە گەر زۆر بەسادەیی بڕوانین بۆ سستەم وحوکمڕانی چەندساڵی ڕابردوو مەسەلە چینایەتیەکان تا ئاستێکی زۆربەرز بەدیارکەوت وزەقتر بوەوە، تائاستی کەمینەیەکی کەم بژاردەی دەوڵەمەندو زۆرینەیەکی لەڕەها بەدەری هەژارو هەژارە، بۆیە بەپێی بەرنامەوسیاسەتەکەی ئەمان هەموو شتێک بەڕوی هاوڵاتیدا فت کراوە تائەو ئاستەی زیاتر درزی چینایەتی فراوانتر بووە، چەند دەیەی ڕابردوش پێمان دەڵێت هەرئەم جۆرە لە شێوازی حوکمڕانیەتیەیان لێ چاوەڕوان دەکرا.
یەک هەڵوێستی و باوەڕ بە خۆبوون، یەکگرتووی سەرجەم هاوڵاتیان بۆ ئەم جۆرە گۆڕانکاریانە وەک ئەرکێکی ئەخلاقیە، تائەو ئاستەی چیتر لەو بازنەی کەپێی دەوترێت (سڕینەوەی) یەکتری ئێمە هەوڵی(فتکردنی)دەسەڵاتە ستەمکارەکان بدەین، پێچەوانەبێتەوە بۆ (فت)بوونی ئەوان.
