هیوا عومەر
لەسەر بانگهێشتی حكومەتی چین، لەم ماوەیەدا لە پەكینی پایتەختی چینداین بۆ خولێكی رۆشنبیری تایبەت بە بەرپرسانی میدیا و مامۆستایانی زانكۆ. ماوەی ئەم خولە زیاتر لە دوو هەفتە دەخایەنێت، لەوێدا جگە لە ژمارەیەك كوردی هەرێمی كوردستان، دەیان بەرپرسی دەزگای میدیا و رۆشنبیر و رۆژنامەوان و مامۆستای زانكۆی وڵاتانی عەرەبیش تیایدا بەشدارن .
پرسە سیاسی و ئابووری و كۆمەڵایەتییەكانی ئەمڕۆ لە چوارچێوەی روئیای (چاكسازی و كرانەوە)ی نوێی حكومەت و حزبی شیوعیی چین، گفتوگۆی چڕی رۆژانەمانە.
رۆڵ و تێگەیشتنی رۆژنامەوانان و رۆشنبیران لە پرۆژەی رێگای ئاوریشمی تازە و پرسی ئاشتی جیهانی و پەیوەندییە نێودەوڵەتییەكان، بنەماكانی گەشەپێدانی ئابووری و مرۆیی سەركەوتنی چین لە چۆنیەتی نەهێشتنی هەژاری بەپێی پێوەرەكانی نەتەوەیەكگرتووەكان، بابەتەكانی تری پەیوەست بە دادپەروەری و بنیادنانی سۆشیالیزم بە تایبەتمەندی چینی، لە گۆشەنیگای چین و دەوڵەتانی دیكە، ناونیشانی ئەو بابەتانەن لەلایەن مامۆستایانی زانكۆ و رۆشنبیرانی چین پێشكەشدەكرێن .
لێرە لە چین ئەوەی بۆ ئێمە مایەی تێگەیشتن بوو لەو پێشكەوتنە هەمەلایەنەی پێیگەیشتوون، ئامادەیی فكر و روئیا و پلانی كاركردنی تایبەت بەخۆیانە بە تایبەتمەندی خۆیان بۆ گشت کایەکان، گەشەپێدانی ئابووری و مرۆیی و پرسی بنەماكانی ئاشتی جیهانی و پەیوەندییە نێودەوڵەتییەكان و چۆنیەتی ڕووبەڕووبوونەوەی هەژاری و تێگەیشتنیان بۆ بنیادنانی سۆشیالیزم لە داهاتوودا هتد.... بەشێكن لە پرۆژەیەكی گەورە لە چوارچێوەی پرۆژەی (چاكسازی و كرانەوە)دا.
هەر لێرە چەندین چاوپێكەوتن و دانیشتنی تایبەتمان هەبوو لەگەڵ مامۆستایانی زانكۆ و دیبلۆماتكار و بەرپرسان و رێكخراوە جیهانییەكان، هەرچەندە تێگەیشتن لە چین كارێكی وەها ئاسان نییە، بەڵام گفتوگۆكان تەژیبوون لە بابەتی هەنووكەیی و پێویست .
لەكاتی بەشداری و گفتوگۆی رۆژنامەوانە عەرەبەكان، چەند جارێك ڕووبەڕووی گفتوگۆی چڕ و هەندێكجار توندیش بووینەوە، ئەوان كاتێك باسی پرسی فەلەستینیان دەكرد لە روانگەی پرسێكی ڕەوا و نەتەوەییەوە داوای نەهێشتنی دەستدرێژییەكانی ئیسرائیل و دامەزراندنی دەوڵەتیان دەكرد، بەڵام كاتێك ئێمە لەیەككاتدا باسی پرسی نیشتمان و خاك و نەتەوەی كورد و كوردستانمان دەكرد لەگەڵ پاڵپشتی و باوەڕمان بۆ ڕەوایەتی پرسی فەلەستین، بەڵام ئەوان خۆیان بۆ نەدەگیرا و هەمووان بەیەكەوە هێرش، نەك گفتوگۆیان دەكرد، (ئینفصالی) ئێوە جوداخوازن، وەك تۆمەتێك و تاوانێك بەكاریاندەهێنا.
چەند جارێكی تر لەگەڵیان گفتوگۆمانكرد، بەڵام بۆ زۆرینەیان بێسوودبوو، پرۆژەی سڕینەوەی ناسنامە و داگیركردن، بۆ زۆرینەی سیاسی، رۆشنبیر و رۆژنامەوانی نەتەوەی سەردەستی ئەم ناوچەیە، هێشتا پرۆژەیەكی كراوەیە.
ئەوەی لێرەدا بۆ ئێمە وەك كورد و چەپێك گرنگ بوو، ئەم تێگەیشتنە خراپەی ئەوان نەبێتە هۆكارێك بۆ دابەزین بۆ ئاستی هۆشیاری سیاسی و فكرییان.
ئێمە جگە لە دەستگرتن بە پرنسیپ و بەها مرۆییە بەرزەكان و پاڵپشتی ئێمە بۆ پرسی فەلەستین لە ڕوانگەی باوەڕبوونمان بە بەهاكانی مافی مرۆڤ و دیموكراسی، هیچ بژاردەیەكی ترمان نییە لەپێناو شەڕی دەستگرتن و مانەوە و بەهێزكردنی شوناس و بنیادنانی دواڕۆژمان بە گرێدان بۆ دواڕۆژی هاوبەش و هاوچارەنووسی مرۆڤایەتی .
