ئامادەکرن: وەلید محەمەد سلێمان
سەرپەرشتیارێ پەروەردەیی
بێگومان ئاڤاکرن و پەروەردەکرنا زارۆکان ژلایێ خێزانێڤە گەلەک یا گرنگ و پێتڤیە چۆنکی زارۆک توێژەکێ هەستیار و گەلەک گرنگە د ناڤ جڤاکی دا.
یا ئاشکرایە کو پەروەردەکردنا زارۆکان ژ خێزانەکێ بۆ خێزانەکا دی و ل ژینگەهەکێ بۆ ژینگەهەکا دی یا جودایە.
خێزان پێشەنگە بۆ پەروەردەکرنا زارۆکان، ژبەر هندێ ئاڤاکرنا زارۆکان ل وی دەمێ د زکێ دایکێ دا دەستپێدکەت هەتا ژیێ هەژدە ساڵیێ دەربازدکەت.
پێتڤیە دایک و بابا شارەزاییەکا زۆر باش د ئاڤاکرن و پەروەردەکرنا زارۆکاندا هەبیت چۆنکی ئەرکێ خێزانێ گەلەک یێ هەستیارو گرنگە بۆ پەروەردەکرنا زارۆکان.
دایک و باب بۆ پەروەردەکردن و ئاڤاکرنا زارۆکان چ بکەن؟
١- پێتڤیە دایک و باب هەردەم سۆز و ڤیانا زێدەتر ب زارۆکێن خۆ بدەن، چۆنکی ڕێزگرتن و ڤیان بناغێ سەرکەفتن و بەختەوەریا خێزانێیە.
۲- پێتڤیە ڕێک ب زارۆکان بهێتە دان دەربڕینێ ل بوچوونێن خۆ بکەن و ب ئازادی و بێ چ ڕێگری دەرببڕن .
٣- پێتڤیە خێزان ب بەردەوامی کار لسەر ئاڤاکرنا کەسایەتیا زارۆکی بکەت.
٤- لسەر خێزانێ پێتڤیە هەردەم ڕێنماییان بدەنە زارۆکێن خۆ و شیرەتان لێ بکەن و بەرێ وان بدەنە ڕێکێن ڕاست و دروست هەتا ب شێوەکێ ڕاست و تەندروست گەشێ و وەڕارێ بکەن و ل پاشەڕۆژێ خزمەتا نیشتمانێ خۆ بکەن.
٥- پێتڤیە دایک و باب دەمی تەرخان بکەن بۆ زارۆکێن خۆ و پێکڤە چیروك و پەرتووکان بخینن و یاریاو گەشتا بکەن و کلتورێ نەتەوەو و گەل و نیشتمانی بۆ زارۆکێن خۆ ڤەگێڕن داکو دیروکا خۆ فێرببن.
٦- هەروەسا دەربارێ کار و چالاکیێن قوتابخانێ دانوستاندنێ دگەل بکەن، ڕێنمایی و ئامۆژگاری بکەن ل ب کارئینانا یاریێن ئەلیکترونی و ئاگاهدار بکەن کو نابیت ل خار تەمەنێ 16 ساڵی مۆبایل و ئامێرێن دی یێن ئەلیکترونی بکاربینن.
٧- دەمێ ئامۆژگاریکرنا زارۆکی نابیت گەلەک یێ درێژبیت داکو زارۆک پشتی ئامۆژگاری بدوماهیک دهێت بیرا وی ل ئامۆژگاریێ بهێتەڤە و بزانیت کا سەبارەت چیەو چ تشتەکێ نوی لڤێ ئامۆژگاریێ فێربوو.
٨- ل لایەکێ دیڤە نابیت ب هیچ ڕەنگەکی زارۆک بهێتە ئێشاندن نە ژلایێ زمانیڤە و نە ژلایێ جەستەییڤە چۆنکی کاریگەرییەکا گەلەک خراب لسەر دەروونێ زارۆکی هەیە.
٩- پێتڤیە دایک و باب ب بەردەوامی هەوڵان بدەن هەڤاڵێن زارۆکێن خۆ زۆر بباشی بنیاسن و دگەل خێزانێن وان ببنە هەڤاڵ و سەردانێن ئێک و دوو بکەن.
ل لایەکێ دیڤە، پێتڤیە پەروەردەکا زۆر توند فێری زارۆکێن خۆ نەکەین و ئەو زارۆکێن ب چ ڕەنگەکی گوهـ ل بەرامبەرێ خۆ ناگرن و ئامۆژگاریا وەرناگرن ل وی دەمی پێتڤیە دایک و باب ب شێوازەکێ ڕێکخستی و گونجایی و پەروەردەییانە و ب هێمنی دگەل باخڤن، هاریکاربن ل فێرکرنا زارۆکێن خۆ کا چەوا چارەسەریا کێشێن خۆ بکەن ل داهاتی و بێی کو پێدڤی ب هاریکاریا چ کەسەکی هەبیت ، هەروەسا چ جارا ب شاشی بەرسڤا زارۆکێن خۆ نەدەن و ڕاستگۆ بن دگەل وان، هاندان، ستایش، پێزانین، پاداشت و خەڵاتکردن، کاریگەرییەکا زۆر باش و ئەرێنی لسەر زارۆکان یا هەی.
ئەرکێ خودانکرن و پەروەردەکردنا زارۆکی بتنێ ل ستۆیێ دایکێ نییە، بەلکو د ئەستویێ بابی ژی دایە و هەردووک دگەل ئێک بەرپرسن ل پەروەردەکرن و ئاڤاکرنا زارۆکان، هەروەسا پێتڤیە دایک و باب لسەر ئێک شێوازێ پەروەردەکردنا زارۆکان ڕێکبکەڤن.
دڤێرەدا دایک و باب بەرپرسن ل پەروەردەیا زارۆکی و چ جوداهی دنافبەرا واندا نییە، بەلکی ڕۆلێ هەردووکا زۆریێ گرنگەو هەرئێک ل وان بەشەکی ل کەسایەتیا زارۆکی پڕ دکەنەڤە.
نابیت چ جارا دایک و باب گازندەیان ل زارۆکێن خۆ بکەن چۆنکی کاریگەریەکا خراب دکەتە سەر دەروونێ زارۆکی.
ل ڤێرە گەهشتینە وی ئەنجامی کو دایک و باب کلیلا پەروەردەکردن و ئاڕاستەکرنا زارۆکانن ب شێوەکێ کاریگەرو تەندرووست.
