(٢)
حسن محمود محمد
مرۆڤە سیاسییەكان لەوانەن كە تێكەڵەیەكن لەزانست، ڕەوشت، خۆبەخشی، كۆمەڵایەتی، هەستی بەرپرسیارێتی، خوێندنەوەی بەردەوام، خزمەتكردن، پلاندانان، پاكدەستی، بەرژەوەندی گشتی، ڕەوشتبەرز و جوان، توانای وتاردان، ڕێكخستنی بیرۆكە، هەبوونی زانیاری گشتی و هتد... كە من پێموایە ئەندامانی كۆنگرە دەتوانن لەو مرۆڤە سیاسییانە بن نەك؟
+(ماركس) دەڵێت هەر ئینسانەكان بوون مێژووی ڕابردوویان دروستكرد، بەهەمان شێوەش هەر ئەوانن دەتوانن ئایندە وەك مێژوویەكی جوان و بەسوود بنووسنەوە، بۆیە مرۆڤەكان نەگۆڕنین، واتە بەو مانایەی بەردەوام لەگۆڕاندان، گۆڕانەكانیش لەگشت ڕووەكانەوە. بەپێی ئەم بیركردنەوەیەی (ماركس) بێت، مرۆڤ دەتوانێت گۆڕانكارییەكان ئەنجامبدات. لەئێساتدا ئێوەن ئەندامانی كۆنگرە، كە دەتوانن مێژووی چوار ساڵی ڕابردوومان لەهەموو ڕووەكانی ناوخۆیی و دەرەوە شرۆڤەبكەن لەڕووی باش و خراپیەوە، هەر ئێوەشن دەتوانن ئایندەی چوار ساڵی بەردەممان بە ڕوانگە و بیرێكی نوێ و پێشكەوتووخوازییەوە بەسوودی هاووڵاتییان و حزبماندا نەخشبكەن، چونكە دواتر ئێوە مرۆڤن، مرۆڤیش دروستكەرە بەباش و خراپەوە!!.
+(لینین) دەڵێت دەیان ساڵ هەیە هیچ ڕونادات، هەفتە هەیە دەیان ساڵ ڕوودەدات، بەهیوام ئەگەر لەچوار ساڵی ڕابردووماندا بەپێی تمووحمان
بۆ گۆڕانكاری هیچ ڕووینەدابێت، ئەوا ڕۆژانی كۆنگرە گۆڕانكارییەكان بەڕووی باشیەوە بۆ ژیانی حزبی و بەتایبەت لەژیانی هاووڵاتییانەوە باشە ڕووبدات، هەرچەندە هەر ئەوەش ڕادەبینم لەئەندامانی كۆنگرە، خۆ ئەگەر نا نابێتە جێگای؟.
+ بیردۆزێك هەیە بەناوی (بیردۆزی ئەسپی مردوو)، بیردۆزێكی ڕاهێنانی و كارگێڕییە، لەبواری پرۆژە و كارەكاندا بەكاردێت، پێتدەڵێت كە پرۆژەیەك مرد هەوڵمەدە و پارە و ماندووبوونی تێدا سەرف مەكە، بەڵكوو بیر لەپرۆژەی كارامەتر و بەسوودتر بكەرەوە، ناكارامەكان پشتگوێ بخە. ڕەنگە بتوانین لەم بیردۆزەیەشدا شێوازێك لەتێڕوانینی سیاسی بۆ بخوێنینەوە، چونكە دواتر گرنگی پرۆژەكە قسەیە لەسەر سوودەكان سەرمایەكە بەنسبەت كەسە سیاسییەكانەوە بەتایبەت ئێمەوە سەرمایە چەقی گرنگی مەسەلە چینایەتییەكانە، كە من پێموایە نەك ئێمە مردووبێتین، بەڵكوو زیندوویەكی بەهێزیشین تا ئێستا، بەڵام نازانین ئەم بەهێزبوونەمان چۆن بە سیاسەتێكی ڕوون و سوودبەخش و سادە بەخۆمان و هاووڵاتییان بگەیەنین. پێموایە چەوساندنەوە چینایەتییەكان و هەلومەرجە سیاسییەكە و ئامادەگی هاوڕێیان و دۆستانمان و هەڵگرانی ئەم بیروباوەڕە هێشتا توانای ئەوەیان ماوە ئەم ئەركەیان لەم قۆناغەدا لەسەر شان بێت.
دەمێنێتەوە ئێوەی ئەندامانی كۆنگرە چی دەكەن و چیمان بۆ بەرهەمدەهێنن؟
+ سوێندی پزیشكی (هیپۆكراتس) سوێندێكی پزیشكییە كەه ەموو پزیشكێك دەیخوێنێت لەوكاتەی كە دەبێتە دكتۆر. بەكورتی دەڵێت پاراستنی ژیانی نەخۆش، پاراستنی نهێنییەكانی نەخۆش، یارمەتیدانی نەخۆشەكان، ڕێزگرتن لەژیان وهتد.. ئەركی پزیشكە.
بەپێی ئەم سوێندە پزیشكییە بێت، لەئێستای ئێمەدا نەك پێویستیمان بە سوێندەكەیە، بەڵكوو تاڕادەیەكی زۆریش خۆمان نەخۆشەكەین، بۆیە پێویستیمان بەدەستنیشانكردنی كەموكوڕییەكانە پاشان چارەسەركردنیان. ڕێكخستنەوەی سیاسیمان پێویستە دواتر نهێنییەكان و گلەییەكانی خۆمان لەناوخۆدا بەگیانێكی هاوڕێیانە چارەسەر بكەین، بیپارێزین، پاشان خەڵكیش پێویستی بەوە هەیە، كە حزبێك ببێتە پارێزەری ژیان و مرۆڤبوونی هاووڵاتی و یارمەتیدانی هاوڕێیان و خەڵكیش بەگشتی ئەركی لەپێشینەی ئێمە بێت بۆ چوار ساڵی ئایندە، چونكە دواتر كە سیاسەت بۆ خەڵك بكەین، كەواتە ڕێز لەژیان دەگرین، پێش هەر ئەركێكی تر لای ئێمەش مرۆڤ جێگەی ڕێزە نەك بەزەیی.
