هیوا عومەر
جەژنی نەورۆز لە خۆیدا مانا و مەغزایەكی نەتەوەیی و هەمیش چینایەتیی ڕوونی هەڵگرتووە، لە ئاستی نەتەوەیی و نیشتمانیدا نەورۆز بۆتە ڕەمزی پاراستنی شوناس و نوێبوونەوە و ڕووبەڕووبوونەوەی زوڵم و عقڵیەتی شۆڤینی و لەناوبردنی كورد لە هەموو بەشەكانی كوردستاندا.
پۆشینی جل و بەرگی ڕەسەنی كوردی و هەڵپەركێ و خواردنی كوردەواری و گوێگرتن لە گۆرانی كوردی و تێكەڵاوبوون و چالاكییە گشتی و هاوبەشەكان هتد ... بەشێكن لەو ئەكتە نەتەوەییە نیشتمانییە، وەك وەڵامێك بۆ ڕەتكردنەوەی هەژموونی زمان و كلتوور و هێرشی هزری و فیزیكی، نەتەوەی سەردەست.
چیرۆك و ئەفسانەی سەركەوتنی كاوەی ئاسنگەر بەسەر زوحاكی ستەمكار و كردنەوەی ئاگری سەركەوتن لە مێژوودا، جەوهەر و مەغزایەكی تەواو چینایەتیمان بۆ دەگێڕێتەوە، ئەگەر بمانەوێت تێیبگەین .
كورد هەم لە ڕەهەندە نەتەوەییەكەی و هەمیش لە ڕەهەندە چینایەتییەكەیەوە لە باكووری كوردستان، رۆژهەڵاتی كوردستان، رۆژئاوا و باشووریش بەتوندی دەستی بە نەورۆزەوە گرتووە لە مێژووی كۆن و نوێدا .
لە نەورۆزی 2025دا، گڕوتینی ئەم نەورۆزە هەم لە رۆژهەڵات و رۆژئاوا و باكووری كوردستان جیاوازبوو، لەوێدا كەرنەڤاڵی نەورۆز پر گڕوتین و جۆش و خرۆشان بوو، ئومێدێكی گەورەی مرۆڤی كوردی پیشاندەدا بۆ توانای هێنانەدیی ژیانێكی تر، هۆكارەكەشی ئەوەیە لەو بەشانەی كوردستاندا زیاتر هەست بە چەوساندنەوەی نەتەوەیی و چینایەتی دەكرێت لەسەر بنەمای سڕینەوەی ناسنامە، گەلی كورد لەوێدا ڕاستەوخۆ ڕووبەڕووە لەگەڵ دەسەڵات و كلتوورێكی پر زەبر و زەنگ و توندوتیژ .
بەڵام ئەگەر دیقەت بدەین لە باشووری كوردستان بەم جۆش و خرۆشییە پێشوازی لە نەورۆز نەكرا، ئەمەش راستەوخۆ گرێدراوە بە بێزاری و نارەزایەتی خەڵك لە شێوازی حكومڕانی زیاتر لە سی ساڵەی دەسەڵات، ئەمە بەزۆر هۆكار لە جێگای ڕووبەڕووبوونەوە جۆرێك لە نائومێدی گشتی دروستكردووە .
لەم هەرێمەی لەمەڕ ئێمەدا خراپی بەڕێوەبردن و گەندەڵی و نادادپەروەری هتد ... كاریگەری راستەوخۆی لەسەر تەواوكردنی قۆناغی رزگاری نیشمانی و هەستی هاوبەشی گشتیش دروستكردووە، ئەمەش نەك تەنها ئەزموونی هێزە دەسەڵاتدارەكان دەخاتەژێر پرسیار، بەڵكو ئەزموون و رۆڵی هێزەكانی دەرەوەی دەسەڵاتیش دەخاتە ژێر پرسیارێكی جدییەوە ؟
لە لاكەی تر، خراپی بەڕێوەبردن، هەڵكشانی داتاكانی بێكاری و هەژاری و نادادپەروەری وایكردووە چینی ناوەڕاست بەرەو پووكانەوەیەكی خێرا بڕوات، ناوەندێكی گەورەی هاووڵاتی پلە دوو و سێی پەراوێزخراوەكان دروستبووە و بەتەنها جێهڵدراون، ئەمەش بۆتە هۆی ئەوەی هێزی سەلەفی و بەشێك لەئیسلامی سیاسی بەئاسانی ئیستغلالیان بكەن و بیانكەن بە بەشێك لە پرۆژەی مۆدێلی دینداری مەلا و بانگخوازی وەهابییەت و سەلەفییەتی سعودی و خەلیجی، كە یادكردنەوەی نەورۆز لە چوارچێوەی ڕەچەتەی حەرام و حەڵال و كوفر و ئیمان و عقڵیەتی تەكفیركردن و مەرگدۆستیدا، وێنادەكات.
