سوبحی مههدی
ئامادەبووانی خۆشەویست
بنەماڵەوکەسوکاری شەهیدان..
ئێوارەتان باش، وهەموو لایەکتان بەخێربێن.
سوپاس بۆ هاورێیانمان لە مەڵبەندی سۆران، کە لەڕۆژێکی مێژووییدا کۆیان کردینەوە، لە ناوچەیەکدا کە بەهەرلایەکیدا بڕوانی هێمایەکی تێکۆشان و قوربانیدانی حزبی شیوعی لێیە، ئەگەر کەسێکیش ئەو مێژووەی نەخوێندبێتەوە، ئەوا ناوی داستانی ( هەندرێن) ی بیستووە.
ئەمڕۆ لە جیهاندا بە ڕۆژی خۆشەویستی ناسراوە، ئێمە سەرەڕای پیرۆزبایی و خۆشەویستیمان بۆ گەل و نیشتمانەکەمان و تێکۆشەرانی ڕابردوو و ئێستا ، بە شێوەیەکی تر ئەم ڕۆژە مێژووییەمان تۆمارکردوە، کە ڕۆژی خۆشەویستی بۆ گەل و خاک وپەیام و رێبازێک کە ئاشتی و دادپەروەری و یەکسانی و مافی مرۆڤ و ژیانێکی باش و دیموکراسی بەدی بهێنێت.
عەشقی پەیامێکە، تا ڕادەی بەخشینی بەنرخترین سەرمایەی ژیان کە گیانە، لە پیناو ئەو خۆشەویستییەدا و بۆ تۆمارکردنی ئەو رۆژەی کە ناوی ڕۆژی شەهیدی شیوعی یە.
٧٥ ساڵ بەرلە ئێستا و لە ١٤ و ١٥ ی شوباتی ١٩٤٩ دا، دامەزرێنەری حزب هاوڕی یوسف سەلمان( فەهد) وزەکی بەسیم( سارم) و حسین ئەلشەبیبی( حازم) ، لەلایەن رژێمی کۆنەپەرستی پاشایەتی یەوە لە سێدارە دران، کەبەخوێنی گەش و ئاڵیان چەپکەگوڵی سوری خۆشەویستی ژیان و بەدیهێنانی ئازادی بۆ نیشتمان و بەختەوەری بۆ گەلیان دایە دەستی تێکۆشەرانی دوای خۆیان.
حزبی شیوعی بەهۆی ئەوەی لە ئامێزی تێکۆشانە نیشتمانی و چینایەتییەکانەوە هاتۆتە کۆڕی خەباتەوە، و لەسەردەمە جیاوازەکاندا ،ئاڵای تێکۆشانی لەبەرانبەر بە هەموو ڕژێمە دیکتاتۆر و چەوسێنەرەکاندا بەرز ڕاگرتووە.
تەنها حزبی سەرانسەری عێراق و کوردستانە،کەلەهەموو شاروشارۆچکەو گوندو لەهەموو نەتەوەو ئایین و پێکهاتەکانی کۆمەڵگادا بوونی هەبووە، هەرلەبەر ئەوە شەهیدانمان لەپێکهاتەی هەمەڕەنگی عێراق و کوردستانن، و بەمانای ئەوەی کە کۆکەرەوەی نیشتمانێکن کە
لەهەموو ڕەنگە جیاوازەکانی تێدایە.
حزبمان لە خەباتی نیشتمانی و چینایەتیدا پێشڕەوایەتی ڕاپەرین و مانگرتنەکانی کرێکاران وجوتیاران و تێکۆشانە پیشەییەکانی قوتابیان و مامۆستایان بووە.
لەم خەباتەدا، هیچکام لە ڕژێمە حوکمڕانەکانی عێراق لە ڕووبەڕووبونەوەی حزبدا، لەئازارو ئەشکەنجەی زیندانەوە بۆ ڕاوەدونان وئاوارەیی بۆ شەهیدکردن بەشێوازی جۆراوجۆر.
خراپترین دژایەتیکردنی حزبمان وبزووتنەوەی نیشتمانی لە سەردەمی حوکمڕانێتی دیکتاتۆری حزبی بەعسدا بووە، کەهەرلەسەرەتای هاتنە سەرحوکمیان لە کودەتا ڕەشەکەی ٨ی شوباتی ١٩٦٣ ،و دەرکردنی بەیانی ژمارە( ١٣) ی بەدناو بۆ کوشتن وبڕین وڕەشبگیری بۆ ئەندامان وکادیرانی حزبمان، کەلەسەردەستی ئەوان سکرتێری حزبمان سەلام عادل و جەمال حەیدەری و محەمەدساڵح ئەلعەبەلی و نافیع یونس وسەدان هاوڕێی تر لەسێدارەدران و مەرگی بەکۆمەڵیان بەسەردا سەپاندن، تا کۆتایی هەفتاکان و پێش وەرگرتنی هەڵوێستی حزب بۆ سەنگەری بەرەنگاری لە ساخ و شاردا نزیکەی هەفتا هەزار ئەندام و کادیری حزب ڕووبەرووی لێپرسینەوەو سزا کرانەوە، و بەسەدانیان شەهیدکران.
لەخەباتی پێشمەرگایەتی ولەهەردوو شۆرشی ئەیلول و نوێدا بەوپەڕی دڵسۆزییەوە هاوڕێیانمان ، بەشێوازە جیاکانی خەبات رووبەرووی ڕژێمی دیکتاتۆری بوونەوەو، لەخەباتی هاوبەشدا لەگەڵ لایەنەکانی تردا، تاپێکهینانی بەرەی کوردستانی و سەرخستنی ڕاپەڕینی ئازارو وپێکهێنانی دامەزراوە فەرمییەکانی هەرێم و ،تاساڵی ٢٠٠٣ وکەبەیەکجاری ئەم رژێمە کۆتایی بەدەسەڵاتی ڕەشی هات، دەیان شەهیدی تری بەخشیوەتە ئەم نیشتمان و گەلە.
بەڕێزان
لەم یادەدا ئێمە نە ڕەش دەپۆشین و نەشین دەکەین، بەڵکو ئیلهامی خۆڕاگری و پشوودرێژی و خۆنەویستی شەهیدانمان دەکەینە بەرنامەی سووربوونمان لەسەر بەدیهێنانی ئەرکە نیشتمانی و چینایەتییەکانمان.
لەم ڕۆژەدا شانازی دەکەین کەئێمە شوێنکەوتووی ڕێبازو حزبێکین کەخاوەنی ئەو هەموو قوربانییە لە پیناوی گەل و نیشتماندا.
شانازی بەهەموو ئەو بنەماڵە تیکۆشەرانەوە دەکەین کەئازیزترینی رۆڵەکانیان بەخشیە حزب و گەلەکەیان، بەوەس دەتوانین بڵێین کەبنەماڵەی شەهیدانی حزبمان وتەواوی شەهیدانی بزووتنەوەی نیشتمانی، خاوەنی ڕاستەقینەی دەسکەوتەکانی ئازادین.
ڕەنگە کەسێک بپرسێت ، ئایا ئەوئامانجانەی شەهیدان هاتوونەتەدی کەئەم ڕووباری خوێن ودەریای فرمێسک وهەموو ئەو ساڵانەی خەبات ڕەنجیان بۆ دراوە؟
لەوەڵامدا دەتوانم لەلایەک بڵێم بەڵێ،کەئێستا کوردستان وعێراق لە سایەی ڕژێمی دیکتاتۆرو چەوسێنەری پێشوو نەماوە، بەڵام ڕازی نین ،لە بەرێوەبردنی دەسەڵات لەم هەرێمەو ڕەخنەو گازندەی زۆرمان هەیە، وبەردەوام دەبین لە تێکۆشان تا خستنەوە سەر سکەی ڕاستەقینەی خۆی.
ڕەخنەی ئێمە بنەماکەی مارکسیزمە کەتەنها بۆ شیکردنەوەو ولێکدانەوە نییە، بەڵکو خستنە ڕووی چارەسەرو جێگرەوەی باشترە.
بەڕێزان..
هێزە سیاسییەکانی ئەودەمی گۆڕەپانی خەبات، هەمووی لە بەرنامەی خۆیاندا، دووپاتی جێگرەوەیەکی دیموکراسییان،بە مانافراوانە (سیاسی- ئابوری- کۆمەڵایەتی) یەکەی دەکردەوە، کە ئێستا بەزەقی پێچەوانەی ئەم بانگەشەیە دەرکەوتووە.
ئیستا هەرێم لە مەترسیدایە، سەرچاوەی سەرەکی مەترسییەکە، لە خراپ بەڕێوەبردنی حوکمڕانێتییە.کە
ڕەخسێنەری دەرفەتە بۆ هەوڵە نێوخۆییەکانی عێراق و هەرێمایەتی بۆ لەقاڵبدانی هەرێم.
ئەوەی پەیوەستە بەناوخۆی هەرێم وحکومەتی هەرێمەوە، لەچەندڕوویەکەوەیە دەخەمەڕوو:
* لەباری ئەمنییەوە:
کوشتن و کوشتنی بێ ناونیشان وکوشتنی ژنان و خۆکوشتن وداڵدەدانی تاوانباران، وگرتنی رۆژنامەنوسان،و ڕێگری لە چالاکییە مەدەنییەکان.
+ یەکنەخستنی هێزەکانی ( پێشمەرگە و ئاسایش و پۆلیس) ودیاردەی فرە کوێخایی چەکداری.
+ دەستدرێژییەکانی ئێران و تورکیا بەناوی ڕووبەڕووبونەوەی هێزە ئۆپۆزسیۆنەکانیان، کەچەکی قورسی تۆپ ودرۆن و موشەک و فڕۆکە بەکاردێت، ئەوەش نائارامی و دڵەڕاوکێی بۆ هاووڵاتیان و گوندنشینانی ناوچە سنورییەکان دروستکردوە، سەرەڕای زیانی گیانی و مادی، لەناوچەکانی خۆیان هەڵکەنراون و ئاوارەی نێوخۆ بوون.
+ مانەوەی کێشەکانی نێوان هەرێم و بەغدا، و بێدەنگی بەغدا لەهێزە لەیاسا دەرچووەکانی بەناو ( مقاوەمە)، لەهێرشەکانیان بۆ سەر فڕۆکەخانەو سەرچاوەکانی وزەی هەرێم، کەکاریگەری لەسەر دانیشتوانی دەوروبەری ئەو ئامانجانە دروستکردوە.
+ ململانێکانی نێوان ئەمریکاو ئێران،لەسەر خاکی عێراق وهەرێم، مەترسی ناجێگیری ئەمنییەکەی بۆ هاووڵاتیانی سڤیلە.
+دابەشبوونی هەرێم بەسەر دوو زۆنی جیاو هەرزۆنێک بۆ سەر دەوڵەتێکی هەرێمایەتی، ودواتریش دابەشبوون لەسەر بازنە گەورەکەی ململانێ لەناوچەکەدا ،مەترسییەکی ترە کە ڕووبەڕووی هەرێم دەبێتەوە.
* لەڕوویەکی ترەوە کە ئابوری و کۆمەڵایەتییە:
+ پشتبەستن بە یەک سەرچاوەی داهات، کە نەوتە، دواتریش دەرکەوتنی گازی سروستی، هەرێمی خستە بەرچاوی ووڵاتانی بەرهەمهێن و داخوازیکاری ئەم بەرهەمانە، سەرەڕای ململانێکانیان و بەغداش لە پلانەکانی خۆی نەوەستا بۆ خستنە ژێر کۆنترۆڵی خۆی ئەم سەرچاوانە.
+ دەرهێنان و بەکاربردن وبەبازاڕکردنی ئەم سەرچاوەیە لە یەکناوەندی حکومییەوە نەبوو، بەڵکو لە بەشێوەیەک بوو کە زیاتر بەسوودی بنەماڵەو چەندکەسێک بوو، کە ململانێکانی قوڵتر کردەوە.و نەیارانی زیاترکرد.
+ ئەودەوڵەتانەی کەسیستمی ئابورییان( بەرخۆر- ریعی) یە کەهاوشێوەی هەرێم و بەغدان، ئازادی سیاسی و سەقامگیری سیاسییان نابێت، وداهاتی نەتەوەییان لەڕێگەی فرۆشتنی نەوتەوەیە( دیارە هەرگۆڕانکارییەک لەبەرهەمهێنان و بەبازاڕکردنیدا) کاریگەری دەبێت لەسەر ئابورییەکەیان، وبەرهەمی ناوخۆییان گرانتر دەبێت لەهاوردەی دەرەکی،( لەنمونەی تەماتەی شارەزوور و هاوردەکراوی ئێران)کە دوەم هەرزانترە، و سیستمی باج رێک ناخرێت کەدەبێتە ڕێکخەری داهاتی ووڵات، ئەوەش وادەکات هاووڵاتی(باجدەر) توانای لێپرسینەوەی لە حکومەت( باج وەرگر) نەبێت، لەوەوە هاووڵاتی دەبێتە منەتباری حکومەت،و حکومەتیش خۆی بەخاوەنی وڵات دەزانێ، وکەمینەیەکی دەسەڵاتداری دەوڵەمەند دێتەبوون لەگەڵ زۆرینەیەکی هەژار، ئەم دەسەڵاتدارە دەوڵەمەندانە پەیوەست بوونی هاووڵاتی، و تەنانەت هەندێک لەنەیارەکانیشیان بە پارە دەکڕن.
ئەم دەرئەنجامە سیستەمێکی سیاسی ناجێگیرو پڕ قەیران دروستدەکات،کەکاریگەری سلبی دەکاتە سەر هەڵبژاردنەکان و ئاڵوگۆری ئاشتیانەی دەسەڵات، ومافی ڕادەربرین.
لەمجۆرە سیستمانەدا تواناکانی گۆرانکاری کەمدەبنەوە، کار بۆ هەڵمژینی ناڕەزایەتییەکان و پەراوێزخستنی ڕەخنەگرەکان و ناڕازییەکان دەکرێتەوە، و دژایەتی دەکرێن.
ئەم هەنگاوانە بەرەو دەسەڵاتێکی ستەمکار دەڕوات.
+بەهۆی ئەو بێسەرەوبەرییە ئابورییەوە، ئەم ئەنجامانە( کە لەناوەندە زانستییەکان، وکەناڵەکانی نزیک لە دەسەڵاتەوە) وەرگیراون، ئەم دەرئەنجامانە هاتوونەتە بوون.
+ پایتەخت( هەولێر) بوەتە پێشەنگی شارە پیسەکان لەبواری ژینگەدا.
+ تەنها لە شاری سلێمانی زیاتر لە ٥٠٠ موەلیدەی ئەهلی کارەبا بەرهەم دەهێنن.
+هەموو ئەو سەرچاوانەی ووزە لە( نەوت، بانزین، ڕۆنی ئوتومبیل و ئامێرەکان،گاز) بەکوالیتی زۆر خراپ دێنە هەرێم، کە پاشەڕۆو گازی زیان بەخش بەناو شاردا بڵاو دەکەنەوە.
+ داوو دەرمان بەشێوەی خراپ لە بازاردایە، و هەندێک لە کۆمپانیاکانی دەرمان، بەدەست کەسانی نزیک لە دەسەڵاتەوەن.
+ بەهۆی ئەوانەی سەرەوەو بایەخنەدان بەژینگەیەکی خاوین، نەخۆشییە درێژخایەنەکان و نەخۆشی سەرەتان،و پێست...تاد لە پەرەسەندندان.
+ حکومەتی هەرێم لە ٢٠١٤ەوە تووشی قەیرانی دارایی بوە، بەهۆی برینی بەشە بودجەی لەلایان بەغداوە. لە سەرانسەری جیهاندا، کاتێک حکومەتێک توشی قەیرانی دارایی دەبێت، هەولدەدات بەکەمکردنەوەونەهێشتنی خەرجییە لابەلاو ناپێویستەکانی، کەچی لەکوردستان بارەگرانەکە خراوەتە سەر خانەنشینان و موچەخۆران، بە ناوی پاشەکەوت و لێبڕینی رێژەیی...تاد، کەتائێستا نەک پلانێک دیارنییە بۆ قەرەبوکردن و گێڕانەوەی ئەو موچانە بگرە، ئەو پارانەی کەلە سندوقی خانەنشینی دانراون، بەسندوقەکەوە لەناوبراون، کە ئەوکارە ئەگەر یاسا رۆڵی خۆی ببینێ، کەمتەرخەمەکان رووبەڕووی سزای یاسای دەکاتەوە.
+ مامۆستایانی کوردستان بەهۆی نەدانی موچەکانیانەوەلە سێ مانگی ساڵی ٢٠٢٣، کە( بەغدا لەرێگەی پەرلەمانتارەکوردەکانەوە، ڕایگەیاندوە کە دوانزە موچەی ساڵی ٢٠٢٣یان ناردوە). و دانەمەزراندنی مامۆستایانی گرێبەست و ژمارەیەک داواکاری تر، لەسەرەتای ساڵی خوێندنەوە بە خۆپیشاندان و بایکۆت کردنی هۆڵەکانی خوێندن بەردەوامن، و تائیستا دەسەڵات، لە لاکردنەوەیەکی بەرپرسیارانە کەمتەرخەمەو و ئەوەش کاریگەری خۆی هەیە لە گەشەو پێشکەوتنی خوێندن وپەروەردەی نەوەکانی داهاتوو کە سامانی گەلن.
خراپی باری دارایی هاووڵاتیان، و ئەمجۆرە سیستەمەی ئابوری و ئەو بێباکییەی دەسەڵاتداران، بەرهەمەکەی بێهودەیی وبێکاری و هەژاری وجیابوونەوەو هەڵوەشانەوەی خێزان وزیادبوونی ئالودەبوون بەمادەی هۆشبەرو و زیادبوونی تاوان و دروستبوونی گەنجی توڕەو گوێ پێنەدەر وتوندوتیژی و ڕاکردن لەو ژینگە تاڵەو وگرتنەبەری رێگای هاتونەهاتی کۆچکردن بۆ دەرەوەی ووڵات و سەرهەڵدانی گروپە توندڕەوە ئاینی وڕەوتە سەلەفییەکانی لێ کەوتۆتەوە.
هەبوونی دەستوری هەمیشەیی بۆعێراق،کە رێکخەری پەیوەندییەکانی هەرێم و بەغدایە، سەرەڕای هەبوونی کەلێن وکەموکوڕی ،دەسکەوتێکی گرنگە.
سروشتی بۆرژوازی نەتەوەی باڵادەست لەووڵاتێکی فرەنەتەوەدا، لەکاتێکدا بەدەسەڵات دەگات،وباڵادەستە لەبەها و جوانییەکانی مرۆڤایەتی وپێکەوە ژیانی ئاشتیانە دوور دەکەوێتەوە، وئەوەندەی بۆی بکرێت هەوڵی سەپاندنی خۆی دەدات وئەوانی تر لەبری هاوبەشی بەبەردەست ودەرباری بەرماڵی خۆی دەزانێت.
هەمووئەو هێزانەی پێش ڕووخاندنی رژێمی دیکتاتۆری بەعس،کەبستێک خاکیان لەبەر دەستدانەبوە، لەکۆبونەوەکانی واشنتۆن و پاریس ولەندەن تا سەلاحەدین( پیرمام) ،تاڕادەیەک، دانیان بەمافەڕەواکانی کورددا دەنا. وتاباڵادەستی داگیرکاری ئەمریکاو هاوپەیمانان ولەئەنجومەنی حوکم و لەسەروبەندی نوسینەوەی دەستوردا لەم هەڵوێستە پۆزەتیفە بەردەوام بوون. لەگەڵ خۆگرتن وفراوانبوونی پێگەو دەسەڵاتیان لەکات و بەشێوازی جیا لەهەموو بەڵینەکان پاشگەز دەبنەوە.
هەبوونی سەرچاوەکانی هێز لە( زۆرینەی پەرلەمانی ،و هێزی سوپاو چەکداری حەشدی شەعبی و دادگای فیدراڵی و پشتیوانی ئێران وپشتیوانی نێودەوڵەتی بۆ یەکپارچەیی عێراق...تاد) وایکردوە، پلان بۆ هەڵپاچینی دەسکەوتەکانی هەرێم رێکبخەن.
بڕینی بەشەبودجەی هەرێم ودواخستنی، و خستنەنێوی بۆمب بۆ یاسای بودجەو زۆر یاسای تر، وگێڕانەوەی نەوت و داهاتەکان بۆ ناوەندو وکەمکردنەوەی ریژەی لەسەدا ١٧ بۆ لەسەدا ١٢،٦٧ی بودجە بەبێ هەبوونی بنەمایەکی سەرژمێری ،وهێشتنەوەی ئەنجومەنی فیدراڵی ونزیکەی ٥٥ مادەی دەستوری بەهەڵواسراوی ،لە هەنگاوەکانی بچوککردنەوەی ڕۆڵی هەرێمن، بە ئاراستەی هەموارکردنەوەی دەستور تا کەمترکردنەوەی ماف و دەسەڵاتەکانی هەرێم،
لاوازی رۆڵی نوێنەرانی کورد لەبەغدا، وحکومەتی هەرێم، کەچارەسەری کێشەنێوخۆییەکان ناکەن ولەبری ململانێ بۆ پێشکەشکردنی خزمەتی زیاتر بەهاووڵاتیان لەخەمی پۆست ودەسکەوتی کەسی وحزبین، بەمکارانە ئاودەکەنە ئاشی هەوڵەکانی لایەنە بەرامبەرەکان لەبەغدا بۆ بچوککردنەوەی قەوارەی هەرێم.
ئەنجامنەدانی هەڵبژاردنی پەرلەمان و ئەنجومەنەکانی پارێزگاو شارەوانییەکان لەکاتی خۆیدا ونەبوونی شەفافییەت لە خەرجی وداهات وپەرتەوازەیی گوتار وپێشێلکاری ماف وئازادییەکان لەناوخۆ و دواکەوتن ولێبرین و پاشەکەوتی مووچە..تاد وایکردوە کەدرزەکانی نێوان هاووڵاتیان وحکومەت فراوانتر بێت و بەغدا بەفریادرەس بزانن. وتادێت متمانەی نێوان هاووڵاتی کوردستان و دەسەڵاتدارانی هەرێم لەلایەک و هەرێم و بەغدا لەلایەکی ترەوە،بەرەو لاوازی بڕوات.
* گرفت و ململانێ نێودەوڵەتییەکان وڕۆڵیان لەناوچەکەدا.
---------------------------
+کێشەکانی نێوان دەوڵەتانی گەورەی سەرمایەداری لەسەر داگیرکردن وفراوانترکردنی ناوچەی قەڵەمڕەوی وخۆپرچەک کردن و دابینکردنی بازاڕ و بازارگەرمییە بۆ کۆمپانیاکانی بەرهەمهێنەری چەک، بەهۆی زۆری شەڕەکانەوە، ڕێژەی فرۆشتنی چەک لەئەمریکا بە لەسەدا ١٦ بەرزبوەتەوە، لەمبارەیەوە، لێکۆڵەرێک بەتەنزەوە دەڵێت( کۆمپانیاکانی چەک دابخەن، شەڕوبارگرژییەکان نامێنن).
+مەترسی لەسەر فراوانبوونی شەڕەکان لەسەر هەرێم وعێراق هەیەو سەرەتاکانی دەرکەوتووە.
+ ململانێی دەوڵەتە گەورەکان بە ئاراستەی گواستنەوەیە لە دونیای تاکجەمسەری بۆ دروستبوونی لە جەمسەرێک زیاتر.
+ لە شەڕەکاندا، ئێستا تەکنۆلۆژیای سەربازی پێشکەوتوو و چەکی زیرەک بەکاردەهێنرێت.
+شەری ڕوسیا کە خۆیان ناویان ناوە بە ( کردەی سەربازی سنوردار) و ئۆکرانیا، لە کێشەی نێوان دوو دەوڵەتی هاوسنورەوە، گۆڕراوە بۆ شەری نێوان ڕوسیا و هاوپەیمانێتی ناتۆ.
ئەم شەڕە تێچوی ملیارەها دۆلارە( لەم رۆژانەدا نوێنەری دیموکراتەکان لە کۆنگرێسی ئەمریکا داوای ڕەزامەندی ٧٥ ملیاری دۆلاری هاوکاری بۆ ئۆکرانیا کردوە) ، جگە لە هاوکارییەکانی یەکێتی ئەوروپا و ووڵاتانی تری ناتۆ.
+ ئەم شەڕە، جیهان و دەوڵەتەگەورەکانی ناتۆو هاوپەیمانەکانی، لەلایەک و ڕوسیاو چین و هندستان و ئێران و کۆریای باکوری لە لایەکی ترەوە بەرەو دوو جەمسەربەندی گەورە بردوە، کە هەموویان خاوەن چەکی ئەتۆمین و بەدەست خستنە سەر دوگمەیەک مرۆڤایەتی بەرەو مەترسی لەناوچوون دەبات.
+ ئەگەرچی ڕوسیا لەسەردەمی پۆتین داهەردەم چاوی لەو بەشە ڕوسییەی ئۆکرانیا بوە، بەلام جوڵەکانی ناتۆ وپشتگیرییەکانی بۆ حکومەتەکەی زیلنسکی مەترسی گەورەی لەسەر ڕوسیا دروست کرد، کە بە بەهانەی بەرگری، دەستپێشخەری گرتنەوەی ناوچەکانی سنوری کرد.
+بەردەوامی شەڕی روسیاو ئۆکرانیا، دەرفەتی فراوانترکردنی بەرەی شەڕی کرد بۆ پەلامارەکانی حەماس بۆ سەرئیسرائیل و کاردانەوە توندەکانی ئیسرائیل لەسەر غەزەو وێرانکردنی و کوشتنی زیاتر لە ٢٨ هەزار هاووڵاتی و چەکداری فەلەستینی.
+ بەهۆی پشتیوانییەکانی ئێران لە چەکدارە شیعەکان و ئیسلامییە توندڕەوەکان بە چەکی پێشکەوتووی موشەک ودرۆن و پارە لە( حزبوللەی لوبنان،وحوسییەکانی یەمەن، ومقاوەمەوحەشدی ئێراق وحەماس لە فەلەستین...تاد)، ئێران شەڕی نێوان خۆی و ئەمریکای بردۆتە دەرەوەی سنورەکانی خۆی.
+ لەناو سنوری جوگرافی دەوڵەتی سوریادا جگە لەهێزە فەرمیەکانی سوریاو هێزەکانی سوریای دیموکرات، هەریەک لە ووڵاتانی( ئێران، تورکیا، عێراق، ئەمریکاو هاوپەیمانان، ڕوسیا) هێزو پێگەی سەربازییان هەیە.
+ ئەم شەڕانە، کاریگەری گەورەیان هەیە لەسەرهاووڵاتیانی سڤیل، بەهۆی (کوشتن و بۆردومانی بێسەروبەری ناوچەکانی نیشتەجێبوون، ئاوارەیی، سەرهەڵدانی نەخۆشی جۆراوجۆر، کەمی پێداویستییەکانی خۆراک ودەرمان، پەککەوتنی پرۆسەی خوێندن، کەمبوونەوەو وگرانبوونی خۆراک و سووتەمەنی، پێشێلکارییەکانی مافی مرۆڤ ودەستدرێژی بۆسەرژنان...تاد)ی لێکەوتۆتەوە.
+ پریشکی ئەم شەڕو بارگرژیانە بەڕوونی بە عێراق و هەرێمەوە دەرکەوتووە، وئەگەری زیاتر بەگۆڕەپان بوونی شەڕی لێ دەرکەوتووە، بەداخەوە کە هەڵسوکەوتی ژیرانەو کاری پێکەوەیی ولێک تێنەگەیشتنی لایەنەکانی ململانێ لە هەرێم و بەغداو و لە نیو ماڵی شیعە و لەنیوان شیعەوسوننەدا ئەگەری فراونتر بوونی مەترسییەکانی هەیەو لەبەر دەرگاماندایە.
ئێمە هەمیشە دووپاتی ئەوەمان کردۆتەوە کە، پاراستنی ئەم قەوارەیە بەکاری پێکەوەیی و هەماهەنگی و بەجێهینانی ئەرکە نیشتمانییەکان وچاککردنی باری ژیان وئابوری و خزمەتگوزارییەکان دەبێت.
لەوباوەڕەداین تێکۆشانی هەمەجۆری مەدەنیانە، بۆفشار خستنە سەر لایەنەکانی دەسەڵات، زامنی پتەوکردنی بەرەی نێوخۆیی و پارێزەری هەرێم ودەسکەوتەکانە.
شکۆمەندی بۆ شەهیدانی حزب و گەلەکەمان وبنەماڵە تێکۆشەرەکانیان.
ئێوەش شادو ئاسودەبن.
