زیرەك كەمال
رۆژی 20/10/1986 هێزێكی پێشمەرگەی شیوعی كە ژمارەمان (67) شەست‌و حەوت پێشمەرگە بوو لە گوندی (كانی سوری) دەشتی كۆیە بووین، بڕیاردرا بۆ شەوەكەی هەر لەو گوندە بمێنینەوە، سەعات نۆی شەو لە رێگای هاوڕێ كاوە كەڵكەسماقی كە هەم فەرماندەی لقی بیتوێنی حزب بوو هەم خەڵكی ناوچەكە بوو هەواڵی ئەوەمان پێگەیشت كە رژێمی بەعس دەیەوێت هەر ئەمشەوە هێرش بكاتە سەر زنجیرە شاخی كەڵكەسماق‌و قازبەگیان، دواتر فەرماندە سەربازییەكانی هێزی پێشمەرگەی شیوعی بڕیاریاندا رووبەڕووی هێزەكانی رژێم ببنەوە‌و لێنەگەڕێن ئەو شوێنە گرنگ‌و ستراتیژییە داگیر بكات.
كاتژمێر دەی شەو مەفرەزەیەكی پێشمەرگەی ئەو هێزە كە ژمارەمان (16) پێشمەرگە بوو سەركەوتنینە سەر شاخی كەڵكەسماق‌و لە رێگا سەدان هاووڵاتی گوندی سارتكەو كەڵكەسماقمان بینی كە لە ترسی هێرشی رژیًَم گوندەكانیان بەجێدەهێشت‌و رووەو دەشتی كۆیە دەهاتن. ئەوە بوو لە بەرزاییەكانی سەر شاخ ماینەوە، سەعات چواری بەرەبەیانی هاوڕێ كاوە كەڵكەسماقی لە خەو هەڵیساندین‌و گوتی ئەمشەو هێزەكانی رژێمی بەعس سەركەوتوونەتە سەر زنجیرە شاخی سارتكەو كەلی كەڵكەسماق، بۆیە پێویستە رووبەڕوویان ببینەوە، ئەو شوێنەی شەو هێزەكانی رژێم سەركەوتبوونە سەری چەند سەد مەترێك لە ئێمە دووربوون، ئەوەبوو هەموومان خۆمان بەست‌و كەوتووینە حاڵەتی ئامادەباشی، دواتر هێزەكەی رژێم لەسەر زنجیرە شاخی سارتكەوە ویستیان لە كەلەكەوە بپەڕنەوە بۆ بەری كەڵكەسماق ئەو شوێنەی ئێمەی لێ بووین بۆ ئەوەی داگیری بكەن.
یەكسەر ئێمەش بە بڵاوی رووەو هێزەكەی رژێم رۆیشتین‌و گەیشتینە بەرامبەر یەكتری‌و كە نێوانمان تەنها دووسەد مەتر دەبوو، شەڕ بە قورسی دەستی پێكرد‌و بەرسنگمان لە هێزەكەی رژێم گرت، ئەگەرچی ئێمە سەرەتا ژمارەمان تەنها (16) هاوڕێ بوو ژمارەی هێزەكانی رژێمیش هەزاران بوو، بەڵام رووبەڕوویان بووینەوە لە شوێنی خۆیان رامانگرتن‌و لێنەگەڕاین لەبەری شاخی سارنكەوە بپەڕنەوە بۆ بەری كەلی شاخی كەڵكەسماق، بۆ ماوەی دوو سەعات شەڕ بە سەختی بەردەوام بوو دواتر چەندین كۆپتەر هاتنە ئاسمانی شەڕەكەوە بە خەستی كەوتنە بۆردوومانكردنی ئێمە، ئینجا هێزەكەی تری پێشمەرگەی حزبیش كە لەگوندی (كانی سووربوون) سەركەوتنە سەر شاخ‌و گەیشتنە لای ئێمە، واقیع‌و دیمەنی شەڕەكە هێندە دژواربوو بۆی هەیە گێڕانەوەی بۆ بەشێك لە نەوەی ئێستا مایەی سەرسوڕوومان‌و بڕوانەكردن بێت، ئاخر قورسەو یەكجار قورسە بۆ كەسێك لە ئێستای فەوزای سیاسی‌و بێ نرخ بوونی بەها جوانەكان بڕوابكات هێزێكی پێشمەرگە بە ژمارەیەكی كەم‌و كۆمەڵێك چەكی بچووك‌و سەرەتایی رووبەڕووی هەزاران كەس لە سوپای دوژمن ببێتەوە‌و دواتریش تێكی بشكێنێت، ئەوەبوو سەعات یازدەی بەیانی واتا دوای پێنج سەعات شەڕی قارەمانانەو بەرگری‌و داستانی گەورە هێزەكەی رژێم تێكشكاو بەناو رەز‌و باغ‌و وەرد‌و گوندەكانی سارتكەو كەڵكەسماق رووەو دووكان هەڵهاتن‌و دوای خۆیان سەدان پێًڵاویان بەجێهێشت، وەكو باسم كرد رژێم جگە لە هێرشی زەمینی بە نۆ هەلیكۆپتەریش بۆردومانی ئێمەی دەكرد‌و جگە لەوەش لە دووكان‌و كۆیەو تەق تەق‌و چەمچەماڵا‌و سوسێ وە بەردەوام بە تۆپی نەمساویو جۆرەها تۆپی تر بەخەستی بۆردومانی ئەو هێزەی ئێمەیان كرد، لە رۆژانی دواتریش دوژمن لە زەمین‌و ئاسمانەوە بەردەوام بوو لە هێرش‌و پەلاماری خۆی بۆ سەر هێزی پێشمەرگەو لە هەموو لایەك نەعرەتەو هەڵمەت‌و ورەو ئیرادەی پێشمەرگە هێرش‌و پەلامارەكانی دوژمنی تێك دەشكاند، بۆ مێژوو ئەوەش دەڵێم ئێوارەكەی هەمان رۆژ‌و دوای ئەوەی دوژمن بە قورسی لەلایەن پێشمەرگە شیوعییەكان تێكشكا مەفرەزەیەكی یەكێتی نیشتمانی كوردستان كە لێپرسراوەكەیان ناوی كاك محەمەد شینە بوو جێگری تیپی (93)ی كۆیەی یەكێتی بوو مەفرەزەیەكی حزبی سوسیالیست كە بەرپرسەكەیان كاك حەمەسوور بوو گەیشتنە لای ئێمەو دەستخۆشەی ئەو سەركەوتنەیان لە پێشمەرگە شیوعییەكان كرد.
لە 23/10/1986 واتا چوار رۆژ دوای داستانەكەی كەڵكەسماق‌و سەركەوتنی هێزی پێشمەرگەی شیوعی بەسەر دوژمندا هێزەكانی رژێمی بەعس بە شەو گەیشتنە لوتكەشاخی گوندی قازبەگیان كە هەر بەشێك بوو لە زنجیرە شاخی كەڵكەسماق، هەمان شەو هێزێكی پێشمەرگەی حزب بە هاوكاری هێزێكی پێشمەرگەی یەكێتی نیشتمانی كوردستان لە دوو قۆڵەوە هێرشمان كردە سەر هێزەكانی رژێم لە قوللەی گوندی قازبەگیان‌و لە ماوەی دوو سەعات زنجیرە شاخەكەمان گرتەوەو دوژمنیش دوای دەیان كوژراوو بریندار رووەو ناحیەی خەلەكان رای كرد.
دیارە كە هاوڕێیانی پێشمەرگەی شیوعی لە داستانی كەڵكەسماقدا ئازایەتی‌و قارەمانێتی گەورەیان نواند، ئازایەتییەك مەگەر لە مێژووی خۆی بگەڕێتەوەو داروبەرد‌و شاخی كەڵكەسماق‌و سارتكە زمانیان لێ بڕۆیت‌و باسی قارەمانێتی شیوعییەكان بكات، بەڵام بۆ مێژوو ئەوەش دەڵێم (هاوڕێ كاوە كەڵكەسماقی) كە ئەوسا فەرماندەی لقی بیتوێنی حزب بوو خەڵكی ناوچەكە بوو لە كۆئازایەتی‌و كۆكردنەوەی زانیاری لەسەر دوژمن رۆڵێكی گەورەی نواند، هەروەها بە پێویستیشی دەزانم ناوی ئەو هاوڕێیانە بنووسم كە لەداستانەكە بەشداربوون‌و بەداخەوە ناوی هەموومانم بیرنەماوە: مام جوامێر، كاوە كەڵكەسماقی، محەمەد حەللاق، موحسین یاسین، هەڵكەوت كەركوك، سنوور، جووتیار، ئەبوراستی، ئاكۆقەیەباشی، شوانەی مامە سەعید، حاكم وریا، سەركەوت، شاخەوان حەساری، هەڵۆ، حەمەدی مام عەوڵا، نەوزاد، فراس.
داستانی كەڵكەسماق سەرفرازیو دەستكەوت و قارەمانێتییەكی گەورەو نەمری بزووتنەوەی ئازادیخوازی گەلەكەمان بە گشتی‌و هێزی پێشمەرگەی حزبی شیوعیمانە لە مێژووداو شایانی ئەوەیە تاهەتایە شانازی پێوە بكرێت، بەڕاستی من لەم نووسینەدا ناتوانم هەق بدەمە تەواوی داستانەكەو ئەگەر تەمەنیاربێت‌و مەرگ بەرسینگی پێ نەگرتم داستانی كەڵكەسماق دەكەمە نامیلكەیەك.
