🔻هەڵوێست
🔻ئەو دەنگە بەرزەی حزب لە هەولێری قەڵا و منارەوە دەستی پێکرد، وەک بڵێسەی ئاگر تەواوی شار و شاروچکەکانی گرتەوە.
نیوز ڕووم
لەو ساتە وەختە مێژووییەدا کە گەلەکەمان ڕووبەڕووی پیلان و پەلاماری دەرەکی دەبێتەوە، هەڵوێستی حزبی شیوعی کوردستان وەک پشکۆیەکی گەشی خەبات و بەرگری مایەی شانازییە. کاتێک هێرشی هێزە چەکدارەکانی سەر بە ئەحمەد شەرع بۆ سەر ڕۆژئاوای کوردستان دەستی پێکرد، حزبی شیوعی کوردستان، وەک ئەرکێکی نیشتمانی و ئەخلاقی، پێشەنگایەتی بەرخۆدانی گرتە ئەستۆ و بانگەوازی گشتی بۆ بەهاناوەچوونی ڕۆژئاوا ڕاگەیاند.
ئەو دەنگە بەرزەی حزب لە هەولێری قەڵا و منارەوە دەستی پێکرد، وەک بڵێسەی ئاگر تەواوی شار و شاروچکەکانی گرتەوە. خەڵکی هەولێر بە دەنگی بانگەوازەکەوە هاتن و وێنەیەکی شکۆداری یەکڕیزییان لە بەردەم بارەگای مەڵبەندی هەولێر نەخشاند.
ئەم جوڵە جەماوەرییە بەرفراوانە، گوزارشتێکی ڕاستەقینە بوو لەوەی کە ویژدانی نەتەوەیی بە زیندوویی ماوەتەوە و دەنگی ئازادیخوازان ناتوانرێت کپ بکرێت.
هاوتەریب لەگەڵ فشاری مەیدانی، کادیرانی حزب بە هاوکاری ڕێکخراوە حزبی و جەماوەریەکان، کەمپینی بەرفراوانی کۆکردنەوەی هاوکاری مرۆییان بەڕێخست، کە ئەمەش ئەوپەڕی مرۆڤدۆستی و نیشتمانپەروەری بوو.
تەنانەت لە ئاستی دژایەتیکردنی هێرشەکانی ئەم دوایانەی سوپای ئێران بۆ سەر کەمپی ئاوارەکانی ڕۆژهەڵاتی کوردستان، حزبی شیوعی دەستپێشخەری کردو لە ناوجەرگەی شاری هەولێردا، جارێکی تر دەنگی ناڕەزایی دژی داگیرکاری و پێشێلکارییەکان بەرزکردەوە.
مێژوو بە شانازییەوە ئەم هەڵوێستانە تۆمار دەکات، چونکە حزبی شیوعی کوردستان، نەک تەنها لە قۆناغە سەختەکاندا وەک بەرگریکارێکی سەرسەختی مافەکانی گەل و ئازادیخوازان دەرکەوت، بەڵکو توانیویەتی بە کردار بیسەلمێنێت کە ئینتیمای ئەو بۆ پاراستنی خاک و مرۆڤ، لە سەرووی هەموو ئاستەنگەکانەوەیە. ئەم مێژووە پاکە، چرایەکی ڕووناکە بۆ نەوەکانی داهاتوو، کە تێیدا سەلمێندرا بەرگری و مرۆڤایەتی دوو ڕەهەندی دانەبڕاوی خەباتی شۆڕشگێڕانەن.