سەروتاری رێگای كوردستان
لە مێژووی گەلاندا ساتەوەختی وەها هەڵدەكەون كە تێیدا سنوورە دەستكردەكان مانا تاقیكارییەكانی خۆیان لەدەست دەدەن و یەكگرتوویی نەتەوەیی و نیشتمانی، دەبێتە تاكە بزوێنەری ڕووداوەكان.
ئەوەی ئەمڕۆ لە دەوری پرسی ڕۆژاوا دەگوزەرێت، تەنها بەرگریی چەكداری نییە لە خاكێك، بەڵكو وەرچەرخانێكی مێژووییە لە هۆشیاریی سیاسی و فكری و نەتەوەیی كورددا، لە هەر چوار پارچەی كوردستان و ڕەوەندی كوردی لە تاراوگە، وەك یەك جەستەی سیاسی و مەیدانی مامەڵە دەكەن.
خۆپیشاندانە سەرتاسەرییەكان و بەدەنگەوەهاتنی گەنجان بۆ بەشداری لە خەباتی چەكداری و نیشتمانیدا، سەلمێنەری ئەو ڕاستییەن كە پرسی ڕۆژاوا چیتر پرسێكی ناوچەیی یان سنووردار نییە، بەڵكو ناسنامەیەكی نیشتمانییە و هەر هەڕەشەیەك بۆ سەر ئەو ئەزموونە، كاردانەوەیەكی فراوانی نەتەوەیی و خەڵكی ئازایخواز، بەدوای خۆیدا دەهێنێت.
ئەم جووڵە جەماوەرییە تەنها بۆ بەرزكردنەوەی مۆرالی شەڕڤانان و گەلی گەمارۆدراو نییە، بەڵكو فشارێكی دیپلۆماسیی كاریگەرە كە توانیویەتی كار بكاتە سەر ناوەندە بڕیاربەدەستەكانی جیهان.
چالاكییە بەردەوامەكانی ناوەخۆ و ڕەوەندی كوردی لە ئەوروپا و ئەمریكا، بە هاوكاری ڕێكخراوە مەدەنییەكان و جەماوەر، وای كردووە حكومەتە ڕۆژئاواییەكان پێداچوونەوە بە هەڵوێستەكانیاندا بكەن. نموونەی فەرەنسا لە ناساندنی مافە كولتوورییەكان و جەختكردنەوە لە دڵسۆزی بۆ كورد، لەگەڵ ناچاركردنی نەتەوە یەكگرتووەكان بۆ گفتوگۆكردن لەسەر پرسی سوریاو كورد، ئەمەش ئاماژەیە "شەقام" دەتوانێت هاوسەنگیی هێز بگۆڕێت.
مانەوەی ڕۆژاوا وەك ناوەندێكی دیموكراسی و فرەیی لە ناوچەیەكی پڕ لە ئاڵۆزیدا، تەنها تاقیكردنەوەیەك نییە بۆ ئیرادەی كورد، بەڵكو تاقیكردنەوەیەكی گەورەیە بۆ ویژدانی كۆمەڵگەی نێودەوڵەتی و پابەندبوونیان بە بەهاكانی مافی مرۆڤ. لەم سۆنگەیەوە، بەردەوامیی ئەم یەكگرتووییە و فراوانكردنی فشارەكان، پاڵپشتییەكی گرنگە بۆ ئەوەی پرسی ڕۆژاوا لە ئەجێندای نێودەوڵەتیدا بە زیندویی بمێنێتەوە و ڕێگری لە هەر هەوڵێكی پاكتاوكاری بكرێت.
پاراستنی ڕۆژاوا، پاراستنی كەرامەتی نەتەوەیی و ئەزموونێكی دیكەیە بۆ هێنانەدی دۆخێکی باشتر ، کە ئازادی ژن و پرسەكانی دادپەروەری لە خۆ دەگرێ.