بەرەی سیاسی کوردی لە باکووری ڕۆژهەڵاتی سووریا، کە لە ٢١ حزب و لە سەروویانەوە پارتی یەکێتیی دیموکرات (PYD) پێکدێن، بە فەرمی ئەنجامەکانی دیاریکردنی نوێنەرانی ناوچە کوردییەکانیان بۆ ئەنجومەنی گەلی سووریا ڕەتکردەوە. ئەم بڕیارە دوای پرۆسەیەکی دەنگدان هات کە لەلایەن دیمەشقەوە لە حەسەکەو قامیشلۆ و کۆبانێ ڕێکخرابوو.
هێزە کوردییەکان لە بەیاننامەیەکی هاوبەشدا ڕایانگەیاند کە کەسانی دەستنیشانکراو تەنها نوێنەرایەتی خۆیان دەکەن و ئەم شێوازە لەسەر بنەمای سیاسەتی پەراوێزخستن و سەپاندنی سەرەوە بۆ خوارەوە سەرچاوەی گرتووە. حزبەکان جەختیان کردەوە کە بنیاتنانی سووریایەکی دیموکرات پێویستی بە پرۆسەیەکی سیاسی گشتگیر و دادپەروەرانە هەیە، نەک گەڕانەوە بۆ عەقڵییەتی دەسەڵاتی ناوەندی.