ووتاری کۆمیتەی ناوەندی حزبی شیوعی کوردستان، لە ئاهەنگی ۳۳ ساڵەی ڕاگەیاندنی حزبی شیوعی کوردستان
میوانە بەڕێزەکان
هاوڕێیانی تێکۆشەر
ئێوارەتان باش و بەناوی کۆمیتەی ناوەندی حزبی شیوعی کوردستانەوە،بەخێرهاتنێکی گەرمتان لێدەکەین وسوپاسی بەشداریتان دەکەین لەم یادە شکۆمەندەدا.
بەڕێزان
٣٣ ساڵ بەرلە ئێستا لەڕۆژێکی وەک ئەمڕۆدا و لەکۆتا ڕۆژی کۆنگرەی دووەمی ڕێکخراوی هەرێمی کوردستانی حزبی شیوعی عێراقدا، بەفەرمی حزبی شیوعی کوردستان ڕاگەیەنرا.
٣٣ساڵ، تەمەنی خەبات و تێکۆشانی شیوعییەکانی کوردستان نییە، بەڵکو ئەم هەنگاوەمان درێژەدانە بەو کاروانەی کە لە چلەکانی سەدەی ڕابردوودا بەڕێکەوتووە و لەنێو ڕیزەکانی حزبی شیوعی عێراق و بە هاوشانی و هاوڕێیەتی هەموو پێکهاتەکانی گەلانی عێراق لەلقی کوردییەوە بۆ لقی کوردستان و دواتر بۆ ڕێکخراوی هەرێمی کوردستان و لە ٣٠ی حوزەیرانی ١٩٩٣ بەدواوە وەک حزبێکی سەربەخۆ لەهەموو مەسەلە کوردستانییەکاندا هاتە نێو گۆڕەپانی تێکۆشانەوە.
گەشەکردنی پەیکەری ڕێکخستنەکانی شیوعی لەکوردستاندا ،لەڕێکخراوەوە بۆ حزب، وەڵامدانەوەیەکی هاوتەریبی گەشەی ڕێکخراوەیی بوو لەگەڵ پەرەسەندنەکانی کارو خەباتی بزووتنەوەی ڕزگاریخوازانەی گەلی کوردستان تا لەڕاپەڕینی ئازاری ١٩٩١ دا گەیشتە ترۆپک و شیوعیەکانی کوردستان لەم خەباتەدا پەلێکی کارابوون ولە بزووتنەوەی جەماوەری نێو شارەکانەوە بۆ خۆڕاگری نێو زیندانەکان و گۆڕینی زیندان بۆ قوتابخانەی بەرگری وسووربوون لەسەر ئامانجەپیرۆزەکانمان، تا خەباتی پێشمەرگایەتی و داکۆکیکردن لەبوون و مانەوەی گەل و نیشتمانەکەمان.
شوێنێکی ئەم کوردستانە نییە، ئارامگای شەهیدێکی حزبمانی لێ نەبێت، پێکهاتەیەکی نەتەوەیی و ئایینی نییە ڕۆڵەکانیان لەم مێژووە پڕ سەروەرییەدا چەند لاپەڕەیەکیان نەنوسیبێتەوە، کە ئافرەتان لەم خەبات و قوربانیانەدا ڕۆڵی کارایان گێڕاوە
دیوارە کۆنەکانی شارەکان تا ئێستاش بەگەرمی دروشمە ڕەنگ سورەکانی قارەمانانی شارەکانیان لەسەرسنگیان داناوە، کە پڕ بوون لە حەماسەتی بەرگری و بەرەنگاری و هاندان بۆ تێکۆشان دژ بەستەم و نادادی لەپێناو دیموکراسی و یەکسانی ودادپەروەری کۆمەڵایەتیدا، کەهێمای تێکۆشان وبەرەنگاری ڕێکخستنە نهێنییەکانی نێو شارەکانە.
ئامادەبووانی بەڕێز...
ئەگەر باس لەشانازی وسەروەرییەکان بکەین ڕەنگە، نە(کات )و نە(شوێن )و نە(لاپەڕە)و نە(پێنوس) توانای ئەوەیان نەبێت هەموو لایەنەکانی تۆمار بکەن.
حزبی شیوعی کوردستان لە ڕاگەیاندیدا و لەپڕۆگرامی خۆیدا، جەختی لەوەکردۆتەوە کە حزبێکی نیشتمانی و چینایەتی کوردستانییە،لەپاڵ ئەرکە نیشتمانیەکانیدا کە ئامانجی ڕزگاری و دامەزراندنی قەوارەی نیشتمانی سەربەخۆیە، خۆی بە داکۆکیکاری چینی کرێکاران و زەحمەتکێشانی بیرو بازووی کوردستان دەزانێت و لەوباوەڕەدایە کە ئەرکە نیشتمانی و چینایەتییەکانی گرێدراو وتەواوکاری یەکترن.
ئەم ڕێبازو بیرکردنەوەیەی حزبی شیوعی کوردستان، کە سەرچاوەکەی لە مارکسیزمەوە وەرگرتووە، تەنها لەتیۆرییەکی ئابوری دەست پێناکات بەڵکو خەونی مرۆڤەکانە بۆئازادبوون لەسەرکوتکردن و نامۆبوون و هەژاری.
ئەم ڕێبازە پشت ئەستوورە بەبیرۆکەیەکی سادەو شۆڕشگێڕانە کە ئەوسامانەی لەکۆمەڵدا بەرهەم دێت ،پێویستە بۆ هەموو گەل بێت نەک لەژێر دەستی کۆمەڵێکی بچوکدا بێت.
حزبی شیوعی کوردستان
بۆ بەدیهێنانی یەکسانی ودادپەروەری کۆمەڵایەتی خەبات دەکات.
ئەم حزبە تەنها بەڵێنی مادی بەخەڵک نادات، بەڵکو مانایەکی ئەخلاقی ومێژووییە بۆ باوەڕهێنانی گەل بۆ بنیاتنانی کۆمەڵگایەکی جیاواز لە سەرمایەداری، کەنرخی ئینسانەکان بەبەرزی بهێڵێتەوە. وزامنی مافەکانیان بێت لە یەکسانی و ژیاندا.
تێکۆشانی ئێمەو شۆڕشگێڕە دڵسۆزەکانی هاوڕێ و هەڤاڵمان لە ڕۆڵەکانی تری گەلەکەمان بۆ کۆتایی هێنان بوو بە دیکتاتۆریەت و نەهێشتنی نایەکسانی و نادادی و جیاکاری و دامەزراندنی سیستمێکی دیموکراسی گەل پەسەند کە لەسایەیدا ئازادییەکان فەراهەم بکرێن و پێکەوەژیانی ئاشتیانە باڵا دەست بێت و یەکسانی و ژیانێکی ئاسودەو ئارام ودادپەروەری کۆمەڵایەتی بێتەدی.
خوشک وبرایانی بەڕێز..
مەخابن هەموو ئەو ڕەنجەی کەدرا، هەموو ئەو خوێنەی کە بە سەخاوەتەوە بەخشرا، هەموو ئەو دەربەدەری و ماڵوێرانییە، مەرگەساتەکانی ئەنفالی گەرمیان وبارزانیەکان وکیمیاباران و ووڵات بەدەرکردنی فەیلیەکان وگۆڕەبەکۆمەڵەکان و ڕووخاندنی شارو گوندو خانووەکانمان تەحەمول دەکرا، لەبەر ئەوەی لەتێکۆشاندا بووین بۆ ئامانجە پیرۆزەکانمان. بەهیواوە بووین بۆ حوکمڕانی خۆماڵی تا هەموو ئەونەهامەتیانە بسڕێتەوە، ژیانێکی ئازادو ئارام و بەختەوەرمان بۆ بەدی بهێنێ.
مەخابن تا ئێستا ڕوفاتی پیرۆزی ئەنفالکراوەکانمان لە بیابانەکانی عەرعەر نوگرەسەلمان بەبێنازی ماونەتەوە، سەدان برینداری کیمیاباران بەهیوای هەناسەیەکی ئاسودەوە شەو ڕۆژ دەکەنەوە، گوندەکانمان چۆڵ دەکرێن، ئازادییەکان بەرتەسک دەکرێنەوە، ژیانێکی ئاسودەوئارام لەمەترسیدایە، لەبری یەک حکومەتی یەکگرتوو ،دووئیدارەیی بەردەوامە، لەبری سوپای ڕزگاری کوردستان پێشمەرگەی سەربەحزب و کەس هەیە. دواجاریش ، ساڵونیوێک زیاترە
هەڵبژاردنێک ئەنجامدراو هەموو بانگەشەکان بەناوی هیواوئامانج و خەونە ئەرخەوانییەکانەوە کران، کەچی دەنگەکانمان ڕێزی لێ نەگیراو لە پێناوی پۆستێکی زیاترو داهاتێکی گەورەتر هەموو هیواکان بەرەو کەندەڵانی تاریکی دەبەن.
ڕاستە شەڕی ناڕەوای ناوخۆو دەنگی فیشەک وگرمەی ئاربیجی نەماوە، بەڵام هەموو هەڵسوکەوتەکان خۆشکەری ئاگری شەڕن و ئەوهەلومەرجە ناوچەیی و نێو دەوڵەتییەی کە ئەگەری گۆڕانی تێدایە بەئاڕاستەیەکی باش بۆ بەدێهێنانی ئامانجی سەرەکی لێ چاوەڕوان دەکرێت، لەسایەی ململانێی ناڕەواوە خەریکە ڕەنج خەسارمان دەکەن.
ئەگەرچی حزبی شیوعی کوردستان بەشێوازی جۆراو جۆر ڕەخنەو گازندەی خۆی ڕاگەیاندووە ، لەم دۆخەدا خوازیارە هەمووان بەگیانی بەرپرسیارێتی و لەئاست دۆخەکەدا هەڵسوکەوت بکەن، وچیتر کات بەفیڕۆ نەدەن یان پەرلەمان کارابکەن و کابینەی نوێ پێک بهێنن لەکەسانی دڵسۆزو خەمخۆری گەل، یان ئەمانەتەکە تەسلیم بەخەڵک بکەنەوە وهەڵبژاردنی پێش وەخت ئەنجام بدەنەوە .
پێویستە ئەمجارە گەلیش چاوکراوانەتر لەجاران بە بەڵێنی بێ بنەما باوەڕ نەکات.
ئەگەر ئەم دوولایەنە دەیانەوێت چارەسەری گرفتەکان بکەن بائەو پۆستانەی جێگەی ناکۆکین بسپێرن بە کەسانی دەرەوەی دووحزبەکەو وکەسانی بێلایەن،کەلەنێو ئەم گەلەدا سەدان زاناو داناو دەست وڕابردوو پاک هەن،تاحکومەتێک پێک بهێنن کە توانای چاکسازی و ڕووبەڕووبونەوەی گەندەڵی هەبێت و مافەکانی گەل و بەتایبەت چینە هەژارو زەحمەتکێشەکانی دابین بکات.
هەرلەم بۆنەیەدا ڕای دەگەیەنین بەپێچەوانەی هەنگاونانی نێگەتیڤانەی دەسەڵات، دەستی هاوکاری وکاری پێکەوەی بۆ هەرلایەک درێژبکەین کە بۆ خێرو بەرژەوەندی گەل ونیشتمانەکەمان هەنگاو بنێت.
ئێمە هەڵگری پەیامێکین کە گەل و نیشتمان وبەرژەوەندی هەژاران و زەحمەتکێشان لەپێشەوەی هەموو شتێک دادەنێین.
لەم قەیرانە گشتییەی هەرێمەکەماندا،زۆرجار دەکەوینە بەردەم گازندەی حزبێک یان زیاتر کە گوێز بەباری بەرژەوەندی ئەواندا ناژمێرین.
ئێمە لەم بۆنەیەدا دووپاتی دەکەینەوە کەدژایەتی هیچ کەس ولایەنێکمان لەبەرنامەدانییە، کێ لەگەڵ بەرژەوەندییە نیشتمانی ونەتەوەی وچینایەتییەکانی گەلەکەماندا کۆک بێت دەستی هاوکاری بۆ درێژ دەکەین، کاتێکیش لەگەڵ ئەم ماف و بەرژەوەندیانەدا ناکۆک بێت ناتوانین بێدەنگ بین و بەشێوازی مەدەنیانەو بەزمان و ڕەوشتی شیوعیانەمانەمان ڕووبەڕووی دەوەستینەوە.
ئێمە ئامادەین لەگەڵ هەموو لایەنە سیاسیەکان و جەماوەری گەلەکەمان کە فشارەکانمان زیاتر بکەین، لەمکارەشدا مەبەستمان تەنها پاراستنی قەوارەو دەسکەوتەکانی گەلە کەلەبەردەم مەترسی گەورەدایە.
حزبی شیوعی کوردستان پاش ڕاوێژ بەژمارەیەک ڕۆشنبیرو چالاکوانی سیاسی ئامادەکاری بۆ پڕۆژەیەک کردووە ،کەدواتر پێشکەشتان دەکرێت.
بۆ کۆتا ڕووداوەکانی عێراقیش، کەهەڵمەتێک دژی گەندەڵی و گەندەڵکاران دەستی پێکردووە، هەنگاوێکە شایانی پشتیوانیە.
حزبی شیوعی عێراق و کوردستان ،لە دەربڕینی ناڕەزایەتییەکان ولەچالاکی بەردەوامی سەرشەقامدا ڕۆڵی دیارمان هەبوو بۆ ڕووبەڕووبونەوەی ئەم دیاردە قێزەونە.
گەیشتن بەو ڕاستیانە، بەرهەمی خەبات وتێکۆشانی خەباتگێڕانی ناڕازی بووە دژبەگەندەڵی و بەشبەشێنەی تایفەگەری.
ئەمکارە تەنها بەگرتن و زیندانی کردن کۆتایی نایەت ،بەڵکو پێویستە کار لەسەر سەرە گەورەکان بکرێت وسیستمی سیاسی وئابوری گۆڕانکاری ڕیشەیی تێدابکرێت.
گەندەڵی دارایی تەواوکاری گەندەڵی سیاسیە،کە خۆی لەسیاسەتی بەشبەشێنەو ساختەکاری لەهەڵبژاردنەکان و دزینی دەنگەکان دا هەبووەو پێویستە لەهەرێمی کوردستانیش ، دامەزراوە پەیوەندیدارەکان بەم ئەرکە هەڵبسن و فشاری جەماوەری و ڕاگەیاندنی بۆ بخرێتە کارو تا بەپێی دەستەواژی (من این لک هذا؟) بەمانای( ئەمەت لەکوێ بوو؟) هەموان بگرێتەوە و سامانەدزراوەکانی گەل و موچە ومافەکان بۆ خاوەن ماف بگەڕێنرێتەوە.
بۆ هاوڕێیانی خۆشەویستمان لە حزبمان، حزبی شیوعی کوردستان، ئەم جۆرە یادکردنەوەو بیرەوەریانە دەبێت هاندەری خولێکی نوێی خەبات بێت لەپێناو گەل و نیشتمان و چینە هەژارو زەحمەتکێشەکاندا، بە گەشەپێدانی ڕێکخستنەکانمان و پتەوکردنی پەیوەندییەکانی لەگەڵ خەڵک و داکۆکیکردن لە داخوازییە ڕۆژانەییەکانی، حزبەکەمان بەپێشەنگی دەهێڵێتەوەو متمانەی جەماوەرەکەی پتەوتر دەکات.
سڵاو لەشەهیدانی نەمری حزب و گەلەکەمان .
سڵاو بۆ بنەماڵە تێکۆشەرەکانیان دەنێرین.
سەرکەوتووبێت خەباتی حزبەکەمان لەپێناوی بەدیهێنانی ئازادی نیشتمان و بەختەوەری گەلەکەماندا.
ئێوەش شادو سەرکەوتووبن.