ئۆفیسی هەواڵ
ئەحمەد شەرع، سەرۆک کۆماری سوریا بۆ قۆناغی ڕاگوزەر، لە چاوپێکەوتنێکی نوێدا ڕایگەیاند کە وڵاتەکەی بە نیاز نییە بچێتە ناو هیچ گرژی و هەڵکشانێکی سەربازی لەگەڵ لوبنان. جەختیشی کردەوە کە ئامانجی ئەوان گەیشتنە بە چارەسەرێکی ئاشتیانە کە خزمەت بە بەرژەوەندی هەردوو وڵات بکات و سەقامگیری ناوچەکە بپارێزێت.
شەرع لەبارەی پەیوەندییەکانی لەگەڵ لوبنان و دۆخی ناوخۆی ئەو وڵاتە چەند خاڵێکی سەرەکی ڕوون کردەوە:
دیالۆگ و کێشەی حزبوڵا: شەرع ئاماژەی بەوە کرد کە بڕوای بە دیالۆگ لەگەڵ لایەنە دژبەرەکان هەیە و وتی: "ئێمە کێشەیەکی قووڵمان لەگەڵ حزبوڵادا هەیە، بەڵام نامانەوێت هەموو لوبنان ببێتە کێشە بۆمان. دەمانەوێت کێشەی حزبوڵا چارەسەر بکەین بۆ ئەوەی لوبنان بە زیندوویی بمێنێتەوە."
ئەگەری دانیشتن لەگەڵ حزبوڵا: سەبارەت بە ئەگەری ئەنجامدانی گفتوگۆ لەگەڵ ئەو حیزبە، سەرۆکی ڕاگوزەری سوریا ڕایگەیاند: "ئەگەر ئەمە لە بەرژەوەندی لوبناندا بێت و بەرژەوەندییەکانی سوریاش مسۆگەر بکات، بۆچی نا؟"
ڕێککەوتنی لوبنان و ئیسرائیل: لەسەر پرسی ئاشتی، شەرع ڕایگەیاند کە کۆمەڵێک مەرجی بابەتیی هەن کە دەبێت جێبەجێ بکرێن بۆ ئەوەی ئاشتییەکی ڕاستەقینە بێتە ئاراوە، و وتیشی: "ئێمە پاڵپشتی ناوچەیەکی ئارام و سەلامەت دەکەین کە هیچ جۆرە شەڕێکی تێدا نەبێت."
هەڵوێستی ئەمریکا لەم گۆڕانکارییانەدا
ئەم لێدوانانەی ئەحمەد شەرع لە کاتێکدایە کە پێشتر دۆناڵد ترەمپ، سەرۆکی ویلایەتە یەکگرتووەکانی ئەمریکا، نیگەرانی خۆی لە ئەدای ئیسرائیل بەرامبەر حزبوڵا دەربڕیبوو. ترەمپ ئاماژەی بەوە کردبوو کە بیر لەوە دەکاتەوە بەرپرسیارێتی ڕووبەڕووبوونەوەی حزبوڵا ڕادەستی سوریا بکات، چونکە بە بڕوای ئەو "سوریا بە وردتر و کاریگەرییەکی زیاترەوە دەتوانێت ئەو کارە لە دژی حزبوڵا ئەنجام بدات."