نووسینی: هیوا عومەر
سەردەمی ئەمڕۆمان، زیاتر لە هەموو چركەساتێكی مێژوو، تەژییە لە ڕووداوی خێرا و چاوەڕواننەكراو. دۆخێكی وەها دروستبووە، كە ئەم ناوچەیە پڕڕووداوترین ناوچەیە لە جیهاندا. لەگەڵ مانەوە لە دۆخی چەقبەستوویی لە ئاستی كولتووری و سیاسی و قەیرانی بونیادیدا، بووەتە چەقی ململانێی زلهێزەكانی جیهان، ئەمەش وایكردووە زیاتر لە ناوچەكانی تری سەر ئەم هەسارەیە نائارام و پەشێو و پڕ ژاوەژاو بێت، بووەتە ناوچەیەك كە تەنانەت كەس نازانێت سەری مانگ مووچەكەی وەردەگرێت یان لە كارەكەی بەردەوامدەبێت، تا دەگاتە ئەوەی نازانێت ئەم چوارچێوە سیاسییە جوگرافییەی تێیدا نیشتەجێیە چ چارەنووسێكی دەبێت. دواجار، زۆرینە بێچارە ماونەتەوە لە ئاست بینینی چارەنووسی خۆی و نەتەوە و نیشتمانەكەشی.
نەفرەتكردن لە سیاسەت:
لەگەڵ ئەوەی دۆخی ئەمڕۆمان بەرهەمی جۆرێك لە كاری سیاسیی دوێنێ و ئەمڕۆیە، لەبری ئەوەی بیر لە دەستكاریكردنی ئەم دۆخە دروستكراوە بكەینەوە بە سیاسەتێكی تری ئەڵتەرناتیڤ و جێگرەوە، دۆخێك دروستكراوە كە زۆرینە نەفرەت لە خودی كاری سیاسەت دەكات. ئەمەش وایكردووە بیر لە بەشداریی سیاسیی كارا نەكاتەوە و سیاسەت نەبێتە هۆی ڕاستكردنەوەی سیاسەت و گەڕانەوەی شكۆ و ئارامی و دادپەروەریی كۆمەڵایەتی.
ڕۆڵی چەپ لەم دۆخەدا:
یەكێك لە هۆكارە سەرەكییەكانی ناشیرینبوونی كایەی سیاسی و لاموبالاتیی سیاسی، پێشكەشنەكردنی مۆدێلێكی تری كاری سیاسییە كە جیاواز بێت لە مۆدێلی كاری سیاسیی بنەماڵەیی و بەرژەوەندیخوازیی كەمینەیەك، دوور بێت لە عەقڵییەتی پاوانخوازیی ناوەندەكانی بڕیار لەناو ژیانی حزبایەتی بۆ بەرژەوەندیی چەند كەسێكی دیاریكراو.
غیابی ڕوئیا و چوارچێوەیەكی تری كاری سیاسییە كە بتوانێت كاری سیاسەت گرێبداتەوە بە بەرژەوەندیی گشتی لەبری بەرژەوەندیی تایبەتی و بتوانێت سیاسەت بگەڕێنێتەوە بۆ شوێنی كاری كارمەندێك و كرێكارێك، ژنێك و گەنجێكی پەراوێزخراو، تا دەگاتە داكۆكیكردن لە نیشتمانێكی داگیركراو.
لە كاتێكدا باسی دووركەوتنەوە و نەفرەتێكی گشتی دەكەین لە كاری سیاسی، لەپاڵ ئەوەشدا چەندین هێزی سیاسی هەیە ئاوساوە بە هەزاران كەس بەناوی دۆست و ئەندام، بەڵام لە دەرەوەی بوونی ڕایەڵە و پەیوەندییەك لەسەر بنەمای فیكر و بەرنامەیەكی سیاسی.
چۆن و چی بكرێت بۆ ئەوەی جارێكی تر كاری پایەكانی سیاسەت لە جێگای نائومێدی، ئومێد و لەبری ناشیرینی، جوانی و لە جێگای گەمارۆدانی مرۆڤ، ئازادی و لە شوێنی بەرژەوەندیی تەسكی كەسی، بەرژەوەندیی گشتی، دواجاریش لە جێگای ڕۆحییەتی تەسلیمبوون، بەرەنگاری و بونیادنان بەرهەمبهێنێت؟
چۆن بتوانین كاری سیاسەت لە جێگای پەراوێزخستنی زۆرینە و كردنی كەمینەیەك بە بازرگان، بتوانێت دادپەروەری و كەرامەتی مرۆڤ بپارێزێت؟ بتوانێت لە هەمبەر نیشتمان و هزری مرۆڤێكی داگیركراو، نیشتمانێكی ئازاد و گەلێكی بەختەوەر و ئازاد بەرهەمبهێنێت؟
لە ئەمڕۆدا ئەمانە و چەندین پرسیاری تر ڕووبەڕووی هێزە چەپەكان دەبنەوە. ئایا دەتوانن لایەك لە كۆمەڵگە بكەنەوە یان جێیاندەهێڵین بۆ هێزە پۆپۆلیست و ئۆلیگارشییەكان؟
كردنەوەی دەرگایەكی كراوە بۆ گفتوگۆی ئەم پرسیارانە و چەندین پرسیاری تر لەسەر هۆكارەكانی پەراوێزی رۆڵی چەپ لەمڕۆی هەرێمی كوردستان و ناوچەكەدا، ئەركێكی هەنووكییە، لە بەشەكانی داهاتوودا تێگەیشتنی خۆم لەو بارەیەوە دەخەمەڕوو .
