ڕاپۆرت/ ڕێگای کوردستان
لە کاتێکدا هاووڵاتیانی هەرێمی کوردستان چاوەڕوانی پێکهێنانی کابینەی نوێی حکومەت دەکەن بۆ چارەسەرکردنی قەیرانەکان، چاودێرانی سیاسی ئاماژە بەوە دەکەن کە گرێی سەرەکیی دواکەوتنی حکومەت لە هەولێر نییە، بەڵکو لە بەغدایە و پەیوەستە بە ململانێی توندی پارتی و یەکێتی لەسەر پۆستی سەرۆک کۆمار.
بە بڕوای چاودێرانی سیاسی، ململانێی نێوان پارتی و یەکێتیی چووەتە قۆناغێکی مەترسیدارەوە، چاودێرانی سیاسی پێیان وایە، پارتی دەیەوێت پرسی پۆستی سەرۆک کۆمار لە بەغدا وەک کارتێکی فشار بەکاربهێنێت بۆ بەدەستهێنانی دەسەڵاتی زیاتر لە کابینەی داهاتووی هەرێمدا، لە بەرامبەردا یەکێتی پۆستی سەرۆک کۆمار بە هێڵی سوور و پشکی مسۆگەری خۆی دەزانێت و ئامادە نییە سازشی لەسەر بکات.
ئەم تێکەڵکردنەی دۆسیەی بەغدا و هەرێم وایکردووە دانوستانەکانی پێکهێنانی حکومەتی هەرێم تووشی ئیفلیجی ببێت و هیچ ئاسۆیەک بۆ ڕێککەوتن دیار نەبێت.
چاودێران هۆشداری دەدەن کە مانەوەی دۆخەکە بەم شێوەیە و بەردەوامیی حکومەتی کاربەڕێکەر و پەکخستنی پەرلەمان و دواخستنی پێکهێنانی حکومەت، زیانی گەورە بە پرۆسەی دیموکراسی و قەوارەی هەرێم و هەروەها بە پرۆژە خزمەتگوزارییەکان دەگەیەنێت، بە وتەی چاودێران ، دوو هێزە دەسەڵاتدارەکە خەمی قەوارەی هەرێم و هاووڵاتییان نییە، بەڵکو خەمی ئەوەیانە کێ زۆرترین پۆستی سیادی و هەستیار بۆ حیزبەکەی دەستەبەر دەکات، ئەمەش جۆرێکە لە سزادانی بە کۆمەڵی خەڵک.
تەوەرێکی دیکەی قسەی چاودێران، پەیوەستە بە ڕۆڵی هێزەکانی ئۆپۆزسیۆن لەم قۆناغەدا، بە پێچەوانەی ساڵانی ڕابردوو کە ئۆپۆزسیۆن دەنگی بەرزی ناڕەزایەتی بوو، ئێستا جۆرێک لە کپبوون باڵی بەسەردا کێشاون.
شرۆڤەکارانی سیاسی لەم بارەیەوە دەڵێن، بێدەنگیی ئۆپۆزسیۆن لە ئاست دواکەوتنی پێکهێنانی حکومەت و ململانێی پۆستەکان جێگەی پرسیارە، وا دەردەکەوێت ئۆپۆزسیۆنیش چاوەڕێی ئەوە دەکەن بزانن دەرەنجامی ڕێککەوتنەکان بەکوێ دەگات تاوەکو هەڵوێستی خۆیان دیاری بکات، یان ئەوەتا نائومێد بوونە لەوەی کە فشارەکانیان هیچ کاریگەرییەکی هەبێت.
چاودێرانی سیاسی کۆکن لەسەر ئەوەی تا گرێ کوێرەی پۆستی سەرۆک کۆمار لە بەغدا نەکرێتەوە یان لایەنێک سازش بۆ ئەوی دیکە نەکات، پێکهێنانی حکومەتی هەرێم تەنها وەک خەون دەمێنێتەوە و هاووڵاتیانیش دەبنە قوربانی یەکەمی ئەم ململاننییە سیاسییە.
