هێز لە عێراق خرانە حاڵەتی ئامادەباشییەوە و سعودیە هۆشداریی توندی دایە عێراق.
ژووری هەواڵ
لە چوارچێوەی پەرەسەندنە ئەمنی و سیاسییە خێراکاندا، ئێوارەی دوێنێ بە فەرمانی عەلی زەیدی، فەرماندەی گشتی هێزە چەکدارەکانی عێراق، سەرجەم هێزە سەربازی و ئەمنییەکانی عێراق، خرانە حاڵەتی ئامادەباشییەوە، ئەمەش دوای ئەوە هات کە سعودیە هۆشداریی توندی لەبارەی جموجۆڵی هەندێک گرووپی چەکدار دایە عێراق.
هاوکات لەسەر ئاستی مەیدانی، زانیارییەکان ئاماژەیان بەوە دەکرد کە گرووپە چەکدارە عێراقییەکانی نزیک لە ئێران بە هەماهەنگی لەگەڵ حوسییەکانی یەمەن پیلانیان هەیە، لە یەک کاتدا هێرشێی مووشەکی بکەنە سەر سعودیە. هەرچەندە حوسییەکان هێرشەکەیان ئەنجامدا، بەڵام گرووپە چەکدارەکانی عێراق ئەنجامدانی هێرشەکەیان ڕاگرت و پاشگەز بوونەوە، چونکە ترسی ئەوە هەبوو جێبەجێکردنی ئەو هەنگاوە دۆخی ناوخۆی عێراق بەرەو ئاڵۆزییەکی گەورە و داڕمان ببات.
لەلایەکی ترەوە درەنگانێکی شەوی ڕابردوو، دەنگۆیەکی بەهێز لە چەندین میدیای عێراقیدا بڵاو بووەوە سەبارەت بە دەستگیرکردنی فالح فەیاز، سەرۆکی دەستەی حەشدی شەعبی، بەڵام پاش کەمێک ئەو دەنگۆیە بە فەرمی ڕەتکرایەوە.
هاوکات بەرەبەیانی ئەمڕۆ،هادی عامری، سەرۆكی رێكخراوی بەدر، لە پەیامێكی ڤیدیۆیدا داوای لە گرووپە چەكدارەكانی مقاوەی ئیسلامی عێراق کرد، لەپێناو بەرژەوەندییە باڵاكانی عێراق
وەڵامی هێرشە هاوبەشەكەی ئەمریكاو سعودیە دوابخەن.
