– لە پێناو دەستەبەرکردنی ئازادیی کەشتیوانی و پاراستنی یەکێک لە گرنگترین ڕێگا دەریاییەکانی ئابووری جیهان، سوڵتانییەتی عومان بە هەماهەنگی لەگەڵ ڕێکخراوی دەریایی نێودەوڵەتی (IMO)، کردنەوەی ڕێڕەوێکی دەریایی کاتیی بۆ تێپەڕبوونی کەشتییەکان بە گەرووی هورمزدا ڕاگەیاند.
پابەندبوون بە یاسا نێودەوڵەتییەکان
سوڵتانییەتی عومان لە بەیاننامەیەکی فەرمیدا ئاماژەی بەوە کردووە کە ئەم هەنگاوە لە سۆنگەی بەرپرسیارێتی وڵاتەکەیەوە دێت بەرامبەر بە گەرووی هورمز و گرنگییەکەی بۆ ئابووری جیهانی. هەروەها جەختی لە پابەندبوونی پتەوی خۆی بە یاسا نێودەوڵەتییەکان و یاسای دەریاکان کردووەتەوە، کە گەرەنتی ئازادیی کەشتیوانی لە گەرووەکەدا دەکات بەبێ سەپاندنی چەندین جۆر کرێی ترانزێت.
ڕێککەوتنی ئەمریکا و ئێران
لە بەیاننامەکەدا هاتووە کە ئەم بڕیارە هاوتەریبە لەگەڵ ئەنجامی ئەو هەوڵانەی کە ئەمریکا و ئێران پێی گەیشتوون. عومان بە هەماهەنگی لەگەڵ ڕێکخراوی دەریایی نێودەوڵەتی کاری کردووە بۆ دابینکردنی بژاردەی بەکارهێنانی ئەم ڕێڕەوە کاتییە بۆ هەموو کەشتییەکان، بەپێی ئەو ڕێکارانەی کە لەلایەن ڕێکخراوەکە و دەسەڵاتدارانی عومانەوە ڕاگەیەندراون.
تێبینی بۆ کەشتییەکان:
ئەو کەشتیانەی دەیانەوێت ئەم ڕێڕەوە کاتییە بەکاربهێنن، پێویستە پێشوەختە و بەگوێرەی ڕێکارە پەسەندکراوەکان، هەماهەنگی تەواو لەگەڵ ڕێکخراوی دەریایی نێودەوڵەتیدا بکەن.
هاوکاریی دووقۆڵی نێوان عومان و ئێران
عومان و ئێران جەختیان لە گرنگیی بەردەوامی هاوکاریی نێوانیان کردووەتەوە بۆ بەرزکردنەوەی سەلامەتی دەریایی، ئازادیی کەشتیوانی و سەقامگیری ناوچەکە. هەردوو وڵات ئاماژەیان بەوە کردووە کە لەگەڵ "دەوڵەتە کەنارییەکانی ناوچەکە و هەر لایەنێکی دیکەی پەیوەندیدار" گفتوگۆ لەسەر بەڕێوەبردنی گەرووەکە و تێچووەکانی پەیوەست بەوەوە دەکەن.
هەروەها کۆکن لەسەر درێژەدان بە گفتوگۆکانیان لە ڕێگەی گروپێکی کاری هاوبەشەوە، بە ئامانجی گەیشتن بە ڕێککەوتنی کۆتایی لەسەر چۆنیەتی بەڕێوەبردنی داهاتووی کەشتیوانی لە گەرووی هورمزدا.
