ڕێگای کوردستان
بڕیارە ئەمڕۆ ئەنجومەنی نوێنەرانی عێراق بۆ متمانەدان بە کابینە وەزارییەکەی عەلی زەیدی کۆببێتەوە، ئەمەش لە کاتێکدایە کە هەردوو حزبی شیوعی عێراق و کوردستان گومان و هۆشداریی توند سەبارەت بە سەرکەوتنی ئەو کابینەیە دەخەنە ڕوو.
ڕائد فەهمی، سکرتێری کۆمیتەی ناوەندی حزبی شیوعی عێراق، چەندین جار جەختی لە سەر کردووەتەوە کە هەر حکومەتێک لەسەر بنەمای پشکپشکێنە پێکبهێنرێت، توانای چارەسەرکردنی قەیرانە سیاسی، ئەمنی و ئابوری و کۆمەڵایەتیەکانی وڵاتی نابێت و ناتوانێت کۆتایی بە گەندەڵی و دیاردەی چەکداری بهێنێت.
لەم چوارچێوەیەدا، ئەبو کاروان، سکرتێری کۆمیتەی ناوەندی حزبی شیوعی کوردستان، هەفتەی ڕابردوو ڕەخنەی توندی لە پێکهاتەی حکومەتی داهاتوو گرت و ڕایگەیاند، ئەم کابینەیە جێگای ئومێدی کەس نییە، چونکە هەمان ئەو هێزانە پێکهێنەری دەبن، کە لە ساڵانی ڕابردوودا بەرپرسیار بوون لە پەیڕەوکردنی سیاسەتی پشکپشکێنە. ئەبو کاروان ووتیشی، حکومەتێک کە لەسەر هەمان بنەما و بەرنامەی کۆن بونیاد بنرێت، ناتوانێت گۆڕانکاریی ڕاستەقینە لە ژیان و گوزەرانی خەڵکدا دروست بکات.
