سوپای پاسدارانی ئێران ڕاگەیەندراوێکی بەپەلەی بڵاوکردەوە و تێیدا هاتووە کە وەک وەڵامێک بۆ هێرشەکانی ئەمریکا، بەرەبەیانی ئەمڕۆ هێرشێکی بەرفراوانیان کردووەتە سەر بنکەیەکی سەربازیی گرنگی ئەمریکا لە ناوچەکە.
بەپێی ڕاگەیەندراوی فەرمی سوپای پاسداران، هێرشەکە بە 12 موشەکی بالیستیک کراوەتە سەر بنکەی ئاسمانی و ناوەندی کۆنترۆڵی "ئەزڕەق" لە ئوردن، کە شوێنی جێگیربوونی هێزەکانی ئەمریکایە.
ئێران دەڵێت شوێنی نیشتنەوە و مانەوەی فڕۆکە جەنگییە پێشکەوتووەکانی جۆری F-35، F-15 و F-16 بە وردی پێکراون و بەشێکی زۆریان لەگەڵ دامەزراوە ستراتیژییەکانی ناو بنکەکە تێکشکێنراون.
سوپای پاسداران ئەم هەنگاوەی وەک "سزادانی دەستدرێژیکار" و تۆڵەکردنەوە داناوە لە بەرامبەر بۆردومانەکانی ئەمریکا بۆ سەر چەندین ناوچەی پیشەسازی، گەشتیاری، مەدەنی و سەربازی لە دەوروبەری کەرەج، نەزەرئاباد و ناوچەی پیشوا لە ناوخۆی ئێران. لە بەیاننامەکەدا سوپای ئەمریکا بە "تیرۆریست و منداڵکوژ" وەسفکراوە.
هاوکات لەگەڵ ئەم پێشهاتانە، سوپای ئەمریکا ڕایگەیاند کە بە فەرمانی دۆناڵد ترەمپ، هێرشی نوێیان کردووەتە سەر چەند ئامانجێک لە ناوخۆی ئێراندا، میدیا فەرمییەکانی ئێرانیش پشتڕاستیان کردووەتەوە کە دەنگی تەقینەوەی بەهێز لە چەند شارێکی کەناراوی لە باشووری وڵات بیستراوە.
دۆخی ناوچەکە بەرەو ئاڵۆزی زیاتر ڕۆیشتووە کاتێک ئێران بڕیاری جێبەجێکردنی توندترین کاردانەوەی ئابووری و سەربازی دا:
تاران داخستنی تەواوەتی گەرووی هورمزی بەڕووی هەموو جۆرە هاتوچۆیەکی دەریاییدا ڕاگەیاند.
فەرماندەیی ناوەندی ئەمریکا (سێنتکۆم) دەستبەجێ دروستیی ڕاگەیەندراوەکەی ئێرانی ڕەتکردەوە و جەختی کردەوە کە کەشتییە بازرگانییەکان هێشتا بە شێوەیەکی ئاسایی لە ڕێڕەوە ئاوییەکەدا تێپەڕ دەبن.
