نرخی نەوتی خاو لە بازاڕەکانی جیهاندا نزیکەی ٥٪ دابەزینی تۆمار کرد؛ ئەمەش دوای ئەوە هات کە دۆناڵد ترەمپ، سەرۆکی ئەمریکا، ڕایگەیاند وڵاتەکەی نزیک بووەتەوە لە گەیشتن بە ڕێککەوتن لەگەڵ ئێران، ئەوەش مەترسییەکانی پچڕانی گواستنەوەی نەوتی لە ناوچەکەدا کەم کردەوە.
بەپێی ئاژانسی هەواڵی رۆیتەرز:
• نەوتی برێنت: ٣ دۆلار و ٣٧ سەنت دابەزی و نرخی هەر بەرمیلێک گەیشتە ٦٥ دۆلار و ٤١ سەنت.
• نەوتی خاوی تێکساسی ئەمریکا (WTI): دابەزی و نرخی هەر بەرمیلێک بۆ ٥٩ دۆلار و ٧٨ سەنت تۆمار کرا.
هۆکارەکانی دابەزینی نرخەکە:
1. نزبوونەوەی ڕێککەوتن: دۆناڵد ترەمپ ئاماژەی بەوە کرد کە واشنتن زۆر نزیکە لە گەیشتن بە ڕێککەوتنێک لەگەڵ تاران بۆ هێورکردنەوەی گرژییەکان. ئەم لێدوانە وای کرد بازرگانانی نەوت پێشبینیی ئەوە بکەن کە خاوی ئێران بە بڕێکی زۆر و بەبێ بەربه‌ست بگەڕێتەوە بازاڕە جیهانییەکان.
2. کەمبوونەوەی ترس و پچڕان: شرۆڤەکارانی کەرتی وزە جەختیان لەوە کردەوە کە کەمبوونەوەی ترسی پچڕانی هەناردەی نەوت، هۆکاری سەرەکیی دابەزینی نرخەکان بووە.
3. لاوازیی خواست: لەپاڵ ئەمانەشدا، کەمبوونەوەی خواست لەلایەن کڕیاره گەورەکانەوە فشاری زیاتری خستووەتە سەر بەهای گرێبەستەکان لە بازاڕی فه‌رمیی نەوتی خاودا.
