سەدیق سەعید ڕواندزی
جارێكیان، حوسنی موبارەكی سەرۆكی پێشووتری میسر، بە مەبەستی چارەسەری دەچێتە یەكێك لە نەخۆشخانەكانی بەرلینی پایتەختی ئەڵمانیا، دوای ئەوەی پزیشك دێت بۆ پشكنینی، یاوەری سەرۆك پێی دەڵێت ئەمە موبارەكە سەرۆكی میسر، ئەویش دەڵێت چەند ساڵە سەرۆكە؟ یاوەرەكەش دەڵێت سی ساڵێكە، پزیشكەكە بە توانج و گاڵتە پێكردنەوە، بە یاوەرەكەی سەرۆك دەڵێت، ئەمە چۆن سەرۆكێكە؟ كوا ئەمە سەرۆكە! سەرۆكێك نەتوانێت لە ماوەی سی ساڵدا نەخۆشخانەیەك لە وڵاتەكەی دروست بكات بۆ ئەوەی خۆی تیادا چارەسەر بكات، كوا شایەنی ئەوەیە پێی بگوترێت سەرۆك؟! لە هەرێمی كوردستانیشدا، حكومەت خۆی زەوی بۆ بەرپرسە باڵاكانی حزب دابین دەكات، بۆ ئەوەی بیكاتە نەخۆشخانەی تایبەتی وخەڵكی لێ بڕوتێنێتەوە. ئێمە ئێستا كە یادی سی و سێ ساڵەی ڕاپەڕین دەكەینەوە، كە هەندێك بە ناماقۆڵی و هەندێكیش بە ڕۆژە سەهووەكە ناوی دەبەن، بە داخەوە لە هەمووكاتێك زیاتر، لە بەردەم مەترسی هەڵوەشاندنەوەی هەرێم و بە عێراقیبوونەوە داین. ئێستا گرفتی مووچە، نەبوونی خزمەتگوزاری تەندروستی، مرۆیی، پێداویستی سەرەكی ژیان، بیمەی كۆمەڵایەتی و تەندروستی هەیە. سی و سێ ساڵە، نەتوانراوە هێلێی شەمەندەفەر لە نێوان شارەكانی هەرێم دروست بكرێت، لە كاتێكدا ئەحمەد موختار جاف، سەد ساڵ لەمەو بەر، خەونی بە هێنانی هێڵی شەمەندەفەرەوە بۆ هەورامان و هەڵەبجە دەبینی. بە چوار مانگ جارێك، مووچەیەك دابەش دەكرێت، ژینگەی كوردستان، كە بیست ساڵ بوو، هەوڵی بوژاندنەوە و سەوزكردنی دەدرا، كرایە قوربانی نەبوونی یەك بەرمیل سووتەمەنی. ئایا لە هەرێمێكدا، كە دانیشتووانەكەی ئەوەندەی شارەدێیەكی چین نابێت، كارەسات نییە مووچە و سووتەمەنی و پڕۆژەی گەورە و ژێرخانی ئابووری تۆكمە نەبێت، بۆ ئەوەی وەك سواڵكەر چاومان لە دەستی بە غدا نەبێت؟ بە مەرجێك ئەو هەرێمە نەوت و گازی سرووشتیش بەرهەم بێنێت؟ داخەوە لە سایەی بێ پلانی و نەبوونی ستراتیژیەت و نا تەكنۆكراتی و بە حزبیكردنی هەموو بنەماكانی كارگێڕی لەلایەن حزبە فەرمانڕەواكانەوە، دۆخێك هاتۆتە ئاراوە، كە وا لە خەڵكی كوردستان دروست بكات پەشیمان ببنەوە لەوەی هەر ڕاپەڕینیشیان كردووە. بەرهەمی ڕاپەڕین، هەر تەنها دەسكەوتە نیشتمانییەكان نەبوو، بەڵكو دەركەوتنی هەزارەها گەندەڵ، هەڵپەڕست، بەرژەوەندیخواز و ڤێلاچی بوو، كە هەر شار و سەیرانگەیەك بگریت، ڤێلایەكیان لێ دروست كرد. كەسانێك هاتنە سەر خوانی ڕاپەڕین، كە هەتا دوای ڕاپەڕینیش، لە سەنگەری كوردایەتی نەبوون و لە ژێر دەستی ڕژێم دەژیان و خۆیان و باوكیشیان جاش بوون. ئێستا دیوەخان، دەرەبەگایەتی و كوێخایەتی و ئاغایەتی مۆدێرن، لە سایەی كەشی ئازادی دوای ڕاپەڕین پەیدابوونەتەوە و لە هەوڵی بە كۆیلەكردنی مرۆڤەكان دان. چەندین قەیران و كێشەی كۆمەڵایەتی، پەروەردەیی، ئابووری و تەكنەلۆژی سەریان هەڵداوە و بە داخەوە لەوانە هەمووشیان ترسناكتر، وەك وتمان بە عێراقیكردنەوەی هەرێمی كوردستانە و ناونانیەتی بە باكوری عێراق. ئەگەر سیاسەتێكی ڕاست و دروستمان هەبووایە، لەگەڵ گەل ومیللەتەكەی خۆمان پاك و پەرێز خاوێن و ڕاستگۆ بوواینە، ئێستا بەو دۆخە دەگەیشتین؟ لە سایەی ڕاپەڕینەوە، سەدان بە ناو سەرمایەدار و بازرگان ، پیرەمێردی شاعیر وتەنی ( لە پرێ بوونە كوڕێ) وسەرمایەكانیان ملیاران دۆلارە، كە ئەمە لە وڵاتێكدا بە هەزار ساڵ كاركردن و وەبەرهێنانیش كەڵەكە ناكرێت، پێشمەرگەیەكی ڕۆژگاری شاخ و كوردایەتیش، لانەیەكی نییە وەك مرۆڤ تێیدا بژیت.ئێمە لە كاتێكدا یادی ڕاپەڕین دەكەینەوە، بە داخەوە لە هەموو كاتێك زیاتر خەڵكی تووڕە و نائومێدتر و نیگەرانترە، بە جۆرێك ئارەزوو دەكات، شتێك نەمێنێت بە ناوی دەسەڵاتی كوردی. گیڤاڕای شۆڕشگێڕو ڕەمزی مرۆڤایەتی، جوانی گوتووە كاتێ دەڵێت:_( شۆڕشگێڕ وەك ماسی وایە، هەر كاتێك لە شۆڕش هاتە دەر بۆگەن دەبێت ).
.
