عوسمان زیندانی
لەجاڕنامەی گەردونی مافەكانی مرۆڤدا هاتووە بەتایبەت لەبەندی (١٤و ١٥) ؛
لەبەرامبەر ئەشكەنجەو ئازاردان و ڕەودونان هەر كەسێك مافی ئەوەی هەیە بەشوێن پەناگەیەكدا بگەڕێت و پەنا بباتە بەر ووڵاتێكی دیكە ٠
هەركەس مافی ئەوەی هەیە(تابعیت) مافی هاونیشتمانی پێ بدێت٠
هەرێمی كوردستان بووەتە پەناگەی زۆرێك لە پەنابەرانی كوردانی سوریا وتوركیا وئێران بەهۆی جەنگی دەرەكی و ناوخۆیی و زوڵم وستەمی دەسەڵاتی ئەو ووڵاتانەوە لە ناوخۆدا دژی چالاكانی سیاسی و هەڵسوڕاوانی بزوتنەوە سیاسی وكۆمەڵایەتیەكان٠
لەباری كۆمەڵایەتی و ڕەفتاری خەڵكەوە هەمیشە ڕێزلێگیراوو بوون وهاوكار بوون لەگەڵیاندا ، بەڵام ئەوەی جێگای داخ ونیگەرانی و ڕەخنەی جدییە و دەبێت هەڵوێستی لەبەرامبەردا وەربگیرێت مامەڵەی دەوڵەتانی ناوچەكەیە كە لە ووڵاتی دووەمیش وازیان لێ ناهێنن و بەردەوام ژیانیان لەبەرامبەر مەرگ و فڕاندن كوشتن و دڵەڕاوكیدا ڕاگرتوون ٠
هێرش و پەلاماردانی ئەم دەوڵەتانە پێچەوانەی یەك بەیەكی بەندەكانی جاڕنامەی گەردوونی مافەكانی مرۆڤە كە لە ناو هەرێمی كوردستان ئەنجامی دەدەن ٠
دۆخی پەنابەرانی سیاسی ناو هەرێمی كوردستان سەرەڕای مەترسی دەرەكی لەسەریان بەڵام لە ناو عێراق و هەرێمی كوردستانیش وەك یاسا وڕێسا نێو دەوڵەتیەكان مامەڵەیان لەگەڵدا ناكرێت و پێشێلی مافی پەناهەندەی و مافی ژیانێكی شایستە كەئەمنیەتی سیاسی كۆمەڵایەتی و ئابووریان پارێزراو بێت دەكەن ، ئەو هەموو تاوانە دەبینن بەبەرچاوی دەسەڵاتەوە دەكرێت وهیچ هەڵوێستێكیان نیە ، بگرە خۆیشیان بەندەكانی جاڕنامەی گەردوونی مافەكانی مرۆڤ جێبەجێ ناكەن و بەسەدان پەنابەری سیاسی كە بەدەیان ساڵ دەبێت نیشتەجێێ هەرێمی كوردستانن مافی مانەوەیان پێ نادەن یان مافی كاركردنیان نیە و ڕێگری دروست دەكەن بۆ تازە كردنەوەی پەنابەرێتیان ، وە ڕێوشوێنی پێویست ناگرنە بەر بۆ هاوكاری مادیی ومەعنەوی خۆیان و مناڵەكانیان لە ڕووی پێداویستی خۆراك و تەندروستی وجلوبەرگ و هەر پێوستیەكی تری مرۆیی لە ئاستی ناوخۆ و هاوكاری جیهانیدا ٠
لە كاتێكدایە هەردوو ئەنجومەنی وەزیرانی عێراق و
هەرێمی كوردستان لە ساڵی (٢٠٢١) دا بەئامادەبوونی نێردەی نەتەوە یەكگرتووەكان پلانی جێبەجێكردن مافی مرۆڤ یان داناوە بۆ ساڵانی (٢٠٢١ تاكو ٢٠٢٥) بەڵام لەم ساڵانەدا زۆرترین پێشێلكاری كراوە بەرامبەریان ، جگە لەوەی لەپێشەنگی ئەو ووڵاتانە بوون كە جاڕنامەكەیان لەكاتی خۆیدا واژۆ كردووە ٠
هەڵوێست و مامەڵەی دامەزراوەكانی دەوڵەتی عێراق و هەرێمی كوردستان تاوانێكی گەورەیە و بێبەڵێنیە لە ڕەفتار كردن لەگەڵ پرسە ئینسانیەكانی ناو كۆمەڵگەی نێودەوڵەتی و لەهەمانكاتدا پێشێلكردنی مافەكانی مرۆڤە كە لەبەرامبەر پەناهەندەكاندا دەكرێت و لەباری سیاسی و مەعنەویشەوە كارێكی دوور لەڕەوشتی مرۆییە كە بەهەزاران ئینسانی كوردی هاوزمان كەبەهۆی ستەمی دەوڵەتانی دیكتاتۆری ناوچەكەوە پەنایان بردۆتە بەر هەرێمی كوردستان ، بەڵام هەمیشە لەژێر هەڕەشەی دەوروبەردان و لەناو خۆیش هاوكاریان نین بۆ بدەیهێنانی مافەكانیان ٠
بۆیە ئەركی ڕێكخراوەكانی تایبەت بەمافی مرۆڤ و ڕێكخراوە مەدەنیەكانن كەداكۆكی بكەن لەم پەناهەندە و چالاكوان و لایەنی سیاسی و بەكردەوە فشاری بەردەوام هەبێت بەرامبەر ئەو مەترسیانەی لەسەریانە و ئەو بێ مافیەی لە هەرێم و عێراقدا دەرحەقیان دەكرێت ٠
ئەمە لایەنی كەمی هەڵوێستێكی ئینسانی و سیاسیە بۆ ناچار كردنی دەسەڵات لەبەدیهێنانی بەندەكانی مافی مرۆڤ كەزۆر جار لاڤی پێوە لێدەدرێت وبانگەشەی بۆ دەكرێت ٠
عوسمان زیندانی
٥-شوباتی ٢٠٢٤
