لە میانی بەڕێوەچوونی کارەکانی کۆنگرەی نۆیەمی پارتی کرێکارانی فەرمانڕەوای کۆریای دیموکراتی، جارێکی دیکە سەرۆکی وڵات، کیم جۆنگ ئون، بە کۆی دەنگ وەک سکرتێری گشتیی پارتەکە هەڵبژێردرایەوە. ئەم هەنگاوە بەشێکە لە هەوڵەکانی سەرکردایەتیی پیۆنگیانگ بۆ زیاتر چەسپاندن و بەهێزکردنی پێگەی دەسەڵاتی ڕەهای کیم جۆنگ ئون لە ناوخۆی وڵاتەکە و دامەزراوە حزبی و حکومییەکاندا.
بەپێی ڕاپۆرتێکی ئاژانسی فەرمیی هەواڵی کۆریای باکوور، بڕیاری دووبارە هەڵبژاردنەوەی کیم جۆنگ ئون بۆ ئەم پۆستە باڵایە، ڕاستەوخۆ لەگەڵ ئیرادەی پتەو و خواستی یەکدەنگی سەرجەم نوێنەران و ئەندامانی بەشداربووی کۆنگرەکە یەکدەگرێتەوە.
ئاژانسەکە ئاماژەی بەوەش کردووە کە بڕیارەکە بەبێ هیچ دەنگێکی دژ یان ناڕازی پەسەند کراوە و هەمووان پابەندبوونی خۆیان بۆ سەرکردایەتییەکەی دووپات کردووەتەوە.
