ئەحمەد ئەنساری، توێژەری کاروباری سیاسی، جەختی کردەوە کە تێپەڕاندنی هەر کاندیدێک بۆ پۆستی سەرۆکایەتی کۆمار لە قۆناغی ئێستادا ڕووبەڕووی ئاستەنگی گەورە دەبێتەوە، ئەمەش لەبەر ڕۆشنایی بەردەوامیی ناکۆکی و ململانێی نێوان لایەنە کوردییەکان لەسەر ئەم پۆستە سیادییە.
ئەنساری لە لێدوانێکدا بۆ "بەغداد تودەی" ڕایگەیاند، ناکۆکی نێوان هێزە کوردییەکان چیتر تەنها جیاوازی لە بیروڕادا نییە، بەڵکو گۆڕاوە بۆ ململانێیەکی سیاسی کراوە سەبارەت بە مافی کاندیدکردن و میکانیزمەکانی هەڵبژاردنی کاندیدەکە، ئەمەش وای کردووە هەڵوێستی کورد ئەو یەکگرتووییە تەقلیدییەی خۆی لەدەست بدات کە لە خولەکانی پێشوودا فاکتەری یەکلاکەرەوە بوو بۆ تێپەڕاندنی سەرۆک کۆمار.
ڕوونیشیکردەوە کە نەبوونی تەبایی کوردی، چانسی هەموو کاندیدەکانی لاواز کردووە، تەنانەت ئەو کاندیدانەش کە لای فراکسیۆنە سیاسییەکانی دیکە تا ڕادەیەک پەسەندکراون.
ئاماژەی بەوەش کرد کە هێزە نەکوردییەکان بە وریاییەوە مامەڵە لەگەڵ ئەم دابەشبوونە دەکەن و پێیان باشە یان چاوەڕێ بکەن، یانیش وەک کارتی گوشار لە ململانێ سیاسییە فراوانەکانیاندا بەکاری بهێنن.
ئەنساری وتیشی: بەردەوامیی ئەم دیمەنە ئاماژەیە بۆ پەککەوتنی زیاتری پرۆسەی سیاسی و ڕەنگە ڕێگا خۆش بکات بۆ ڕێککەوتنێک کە لە دەرەوەی ماڵی کوردەوە بسەپێنرێت، یان پەنابردن بۆ چارەسەری کاتی کە ڕەگی قەیرانەکە چارەسەر ناکات.
ئەنساری هۆشداریشی دا کە درێژەکێشانی ناکۆکییەکان کاریگەری نەرێنی لەسەر سەقامگیری سیاسی و دامەزراوەیی وڵات بەجێدەهێڵێت.
لە کۆتاییدا ووتی، تێپەڕاندنی قەیرانی سەرۆکایەتی کۆمار بەستراوەتەوە بە توانای هێزە کوردییەکان بۆ دووبارە بونیادنانەوەی تەباییەکی ناوخۆیی ڕاستەقینە، کە لەسەر بنەمای شەراکەتێکی سیاسی ڕوون و دیدگایەکی هاوبەش بێت و بەرژەوەندیی ئیستیحقاقی نیشتمانی بخاتە سەرووی هەژمارە تەسکە حزبییەکانەوە.
