لە پێشهاتێکی ئەمنی مەترسیداردا، ڕۆژنامەی فاینانشاڵ تایمزی بەریتانی ڕاپۆرتێکی بڵاوکردەوە و تێیدا ئاشکرای کردووە کە زیاتر لە ٢٠ هەزار زیندانیکراو، کە زۆربەیان لە خێزان و لایەنگرانی ڕێکخراوی دەوڵەتی ئیسلامی داعشن، لە کەمپی هۆل لە باکووری ڕۆژهەڵاتی سووریا هەڵاتوون، ئەم ڕووداوە گەورەیە ڕاستەوخۆ دوای ئەوە دێت کە هێزەکانی حکومەتی سووریا کۆنترۆڵی کەمپەکە و ناوچەکانی دەوروبەرییان گرتە دەست.
بەپێی ڕاپۆرتەکەی ڕۆژنامە بەریتانییەکە، ئەم هەڵاتنە بەکۆمەڵە بە یەکێک لە گەورەترین ڕووداوەکانی هەڵاتنی زیندانییان دادەنرێت لە ساڵانی ڕابردوودا، ڕووداوەکە لە ماوەی چەند هەفتەی ڕابردوودا ڕوویداوە، بەتایبەتی دوای ئەوەی هێزەکانی سووریای دیموکرات (هەسەدە) لە ناوچەکە کشانەوە و گروپەکانی سەر بە حکومەتی سووریا جێگەیانیان گرتەوە، لەو قۆناغی گواستنەوەیەدا، ئەو بۆشاییە ئەمنییەی دروست بوو، بووە هۆی ئەوەی کە زۆربەی هەرە زۆری دانیشتووانی کەمپەکە، کە ژمارەیان لەو کاتەدا لە نزیکەی ٢٤ هەزار کەس پێکهاتبوو، بێ هیچ ڕێگری و ڕووبەڕووبوونەوەیەک لە ڕێگەی کەلێنەکانی پەرژینی کەمپەکەوە بپەڕنەوە و دیارنەمێنن.
ئەوەی زیاتر جێگەی نیگەرانیی کۆمەڵگەی نێودەوڵەتی و وڵاتانی دراوسێیە، شوێنی ئێستای ئەم هەڵاتووانەیە، فاینانشاڵ تایمز، لە زاری سەرچاوەکانییەوە ئاماژەی بەوە کردووە کە ئەو دەیان هەزار کەسە بەسەر ناوچە جیاجیاکانی ناوخۆی سووریادا بڵاوبوونەتەوە، مەترسیدارتر لەوەش، ژمارەیەکی زۆریان توانیویانە بە شێوەی قاچاخ و نایاسایی سنوورەکان ببڕن و بچنە ناو خاکی عێراق و تورکیاوە، ئەمەش زەنگی مەترسییەکی گەورەی بۆ دەزگا ئەمنییەکانی هەردوو وڵات لێداوە، چونکە ترس هەیە لە دووبارە ڕێکخستنەوەی شانە نوستووەکانی داعش و تێکدانی سەقامگیریی ناوچەکە.
لە ئێستادا تەنها نزیکەی ٢ هەزار هاووڵاتی سووری و عێراقی لە ناو کەمپەکەدا ماونەتەوە، سەبارەت بە چۆنیەتی ڕوودانی ئەم هەڵاتنە بەرفراوانەش، گومانێکی زۆر هەیە؛ بەشێک لە ڕاپۆرتەکان ئاماژە بەوە دەکەن کە لەوانەیە هەندێک بەرپرس یان هۆزە ناوچەییەکان کە هاوسۆزن لەگەڵ ڕێکخراوی داعش، ئاسانکارییان بۆ کردبن.
لە هەمان کاتدا، کۆمسیۆنی باڵای پەنابەرانی سەر بە نەتەوە یەکگرتووەکان لە سووریا، لە ڕێگەی وتەبێژەکەیەوە پشتڕاستی کردووەتەوە، کە لە چەند هەفتەی ڕابردوودا کەمبوونەوەیەکی زۆر گەورە و بەرچاو لە ژمارەی دانیشتووانی کەمپی هۆل بەدیکراوە.
جێی باسە، کەمپی هۆل کە دەکەوێتە پارێزگای حەسەکە لە باکووری ڕۆژهەڵاتی سووریا، بۆ چەندین ساڵ وەک بۆمبێکی تەوقیتکراو لێکدراوەتەوە، کەمپەکە لە دوای ڕووخانی دوایین مۆڵگەکانی داعش لە ساڵی ٢٠١٩، بووە شوێنی کۆکردنەوەی دەیان هەزار کەس لە ژنان و منداڵانی چەکدارانی داعش، کە هەڵگری زیاتر لە ٤٠ ڕەگەزنامەی جیاوازی جیهانی بوون و زۆربەی وڵاتەکانیان ڕەتیان دەکردەوە وەریانبگرنەوە، ئەم ڕووداوەی دوایی کۆتایی بە یەکێک لە ئاڵۆزترین دۆسیە ئەمنییەکانی ناوچەکە هێنا، بەڵام هاوکات دەرگای بەسەر قەیرانێکی نوێی ئەمنی و تیرۆریستیدا کردەوە کە ڕەنگە باجەکەی بۆ تەواوی ڕۆژهەڵاتی ناوەڕاست قورس بێت.
