ئەنجومەنی وەزیرانی عێراق لە نۆیەمین کۆبوونەوەی ئاسایی خۆیدا بە سەرۆکایەتی عەلی زەیدی، سەرۆک وەزیران، چەندین مەلەفی گرنگ و پڕۆژەیاسای چارەنووسسازی لە بوارەکانی ئابووری، وزە و چاکسازیی کارگێڕیدا تاوتوێ کرد و چەند بڕیارێکی گرنگی پەسەند کرد.
بەگوێرەی ڕاگەیەندراوی نووسینگەی سەرۆک وەزیران، کۆبوونەوەکە هاوکاتە لەگەڵ بەڕێوەچوونی "ئۆپراسیۆنی بەرەبەیان" کە لە یەکشەممەی ڕابردووەوە دەستی پێکردووە و تێیدا ژمارەیەک بەرپرسی سیاسی، حکومی، پەرلەمانتار و سەرمایەدار بە تۆمەتی گەندەڵی دەستگیرکراون.
عەلی زەیدی لە کۆبوونەوەکەدا ڕایگەیاند:
"ئەم دەستگیرکردنانە تەنها سەرەتای قۆناغی یەکەمی جەنگی دژی گەندەڵییە. حکومەت بەردەوام دەبێت لە گەڕاندنەوەی سامانی گشتی، چیتر بەرامبەر گەندەڵی بێدەنگ نابین و کار بۆ بەهێزکردنی دەوڵەت، قۆرخکردنی چەک و پاراستنی بەرژەوەندییەکانی گەل دەکەین."
- چاکسازیی کارگێڕی و ڕێوشوێنەکانی دژە گەندەڵی
ئەنجومەنی وەزیران بە مەبەستی پاراستنی سامانی گشتی و خێراکردنی ڕێکارەکان، ئەم بڕیارانەی خوارەوەی دا:
- خێراکردنی لێکۆڵینەوەکان: پێویستە سەرجەم لێکۆڵینەوەکانی پێوەست بە گەندەڵی لە ماوەی 60 ڕۆژدا یەکلایی بکرێنەوە.
- وەرگرتنەوەی پارەی دزراو: بەدواداچوونی چڕ بەڕێگەی دادگاوە بۆ گەڕاندنەوەی پارە دزراوەکان دەکرێت.
- پابەندبوون بە چاودێری دارایی: سەرجەم دامەزراوەکان پابەند دەکرێن بە جێبەجێکردنی ڕاپۆرتەکانی دیوانی چاودێری دارایی.
- سزای کۆمپانیا ڕاوێژکارییەکان: کۆمپانیا ڕاوێژکارییەکان بەرپرسیارێتی یاسایی و دارایی هەر زیادبوونێکی تێچووی پڕۆژەکان یان هەڵەی تەکنیکی لەئەستۆ دەگرن.
- ڕێکخستنی کەرتی کار و ڤیزا
- ئاسانکاری دەکرێت لە پێدانی مۆڵەتی کار و ڤیزای چوونەژوورەوە بۆ کرێکارانی بیانی (بە هەماهەنگی وەزارەتەکانی ناوخۆ، کار و دەستەی وەبەرهێنان).
- بڕیاردرا بە داخستنی نووسینگەی کار لە دەستەی وەبەرهێنان، ئەمەش دوای ئەلیکترۆنیکردنی تەواوی سیستەمی ڤیزا.
- کەرتی وزە و نەوت (گرێبەستە نوێیەکان)
حکومەتی عێراق چەند هەنگاوێکی گرنگی بۆ پەرەپێدانی کەرتی وزە نا، لەوانە:
- گرێبەست لەگەڵ GE: ڕێگە بە وەزارەتی کارەبا درا گرێبەست لەگەڵ کۆمپانیای (GE)ی ئەمریکی بۆ گەشەپێدانی کەرتی بەرهەمهێنان و گواستنەوەی وزە واژۆ بکات.
- گرێبەست لەگەڵ Chevron: ڕەزامەندی درا لەسەر واژۆکردنی ڕێککەوتن لەگەڵ کۆمپانیای (Chevron)ی ئەمریکی بە مەبەستی زیادکردنی بەرهەمهێنانی نەوت.
- ڕێککەوتنی عێراق-چین: بۆ پاراستنی پێگەی دارایی وڵات، بڕیاردرا بڕی 25 هەزار بەرمیل نەوتی ڕۆژانە بۆ ڕێککەوتنی (عێراق-چین) زیاد بکرێت.
- پڕۆژە ستراتیژییەکانی هەناردەکردنی نەوت
عێراق لە ڕێگەی هاوپەیمانییەکی نێودەوڵەتییەوە دەست دەکات بە جێبەجێکردنی دوو پڕۆژەی ستراتیژی بۆ هێڵەکانی بۆری هەناردەکردنی نەوت:
- هێڵی (بەسرە - حەدیسە - کەرکوک - جیهان).
- هێڵی (بەسرە - حەدیسە - بانیاس).
